Cawnnak 8nk
Baibal rel awk: Luka 3:1-22; 7:19-29; Marka 1:1-8
Tinhmi : Sualnak kaltak in Jesuh khamhnak le ngaihthiamnak chungah luh khawhnak ding caah.
1. Johan nih ngaihchihnak kong a chim;
Tipil petu Johan cu ramlak ramcar ah a um i khaubok le khuaihliti in a cawm. Kalauk hmul in tahmi angki fual saupi aa hruk i saphaw taisawm aa sawmh. Pathian nih a riantuantu dingah a thim caah Johan nih cun mi vialte cu sualnak ngaihchih in Pathian sinah an kir than khawhnak ding caah a chim. A bia chimmi ngaih awkah mi tampi a sinah an ra. Johan nih bia a chim tikah aw nem tein chim loin fak piin a hrocer hna ( Luka 3:7 ). Ram uktu thawk in a kuttang I rian a tuanmi bawi pawl le midang tampi zong an ra. Johan nih bia a chimh tik hna ah an sual an I hngal i an sualnak an i ngaichih. Johan sinah an va kal i an sualnak an va phuan. An sualnak ngaihthiamnak dingah Johan nih Jordan tiva ah tipilnak a pek hna ( Marka 1:5 ).
2. Vancung pennak luh khawhnak innka ngaihchihnak
Khrihfa taktak kan sinak dingah sual ngaihchihnak a herh. Judah mi hna nih “ Kannih cu Abaraham hrinsor kan si caah khamhnak kan hmu lai†an ti bantukin atu chan zongah kan nule kan pa Khrihfa an si caah khamhnak kan hmuh lai tiah a ruatmi kan um kho men. Cu ruahnak cu a dik lo. Sualnak i ngaihchih loin Jesuh hnu zulh khawh a si lo. Sualnak kan i ngaihchih i Jesuh hnu kan zulh lo ahcun Khrihfa taktak kan si kho lai lo. Pathian pennak chungah luh khawhnak ding ahcun sual i ngaihchihnak lo cun lam dang a um lo ( Luka 3:8-9 ).
3. Sual ngaihnak theitlai
Johan phungchimnak ruangah mi tampi nih ngaihchihnak an ngeih ( Johan 3:1-14 ). Mitampi Johan sinah an ra i bia an hal. “Cu tia si ahcun zeitindah kan tuah lai†an ti. Johan nih angki zunhnih a ngeihmi nih a ngei lomi kha then seh a rak ti. Ngunkhuaitu hna sinah khan “ Nan kholh ding zat nakin tam deuh in khawl hlah u†a ti. Rakkap hna sinah “Midang chaw le tangka kha hramhram in va chut hna hlah u nan nihlawh ah khan nan lungtling ko u†a ti.
4. A ra than ding pa kong;
Lungthlen kan timi cu a ding lonak chungin i thlennak lawng si loin a dingmi lam zulhnak a si. Cu bantuk a dingmi lam zulh khawhnak dingah Jesuh kong Johan nih a rak chimnak cu a si ( Luka 3:15-17 ). Hi Baibal chungah Johan nih Jesuh kong a chim. Johan cu Pathian nih a fial bantukin a riantuantu a si caah a hun i a ra laimi pa caah lam a rak sialpiak kha aa hngalh.
5. Jesuh tipil innak;
Nikhat cu tipil in awkah Johan sinah Jesuh cu a kal. Hi bantukin tipil a in hi amah sualnak aa ngaihchih caah si loin minung sinak i lakzau in minung sualnak a phorhpiaknak hmuhsaknak a si ( Luka 3:21-22; Matthai 3:13-17 ). Jesuh nih tipilnak a in tikah midang sin i a phanh ( caang ) bal lomi thil pathum a phan ( caang ).
(a) Van kha aa hung. ( Matthai 3:16 )
(b) Pathian thlarau cu thuro bantukin a rung zuang i a cungah aa fu. ( Matthai 3:16 )
(c) Pathian aw thawng an theih. ( Matthai 3:17 )
6. Ngaihchihnak nih a donghnak i a chuahtermi
Johan nih tih hrimhrim loin Siangpahrang Herod sualnak kha a soisel i a chim ngam caah Herod nih Johan cu thongah a thlak ( Matthai 4:3-12 ). Mi cheukhat nih Johan thihnak cu ngaichiatnak ah an ruah. Mi tampi nih Pathian zumh paoh ahcun Pathian sifah harnak a kan phakter lai lo tiah an ruah tawn. Cu bantuk ruahnak cu a dik lo Jesuh hnu kan zulh ahcun zungzal nunnak kan co lai ( Luka 13:17 ).
