Cawnnak 9nk
Baibal rel awk: Luka 4:1-15
Tinhmi : Jesuh nih tukforhnak a teinak an hngalhnak le Jesuh thawngin tukforhnak phun khip kan tei khawhnak an hngalhnak ding caah.
Nifate in kan nunnak ah sualnak tuah dingah tukforhnak kan ing zungzal. Cu bantuk tukforhnak cun kan luat lo caah zeitindah kan tei khawh lai ti ruah a hau. Jesuh nih Satan tukforhnak a tei cang ( Luka 4:1-15 ). Zeitindah tukforhnak kan tei khawh lai ti kan ruat hna lai.
1. Hmasa bik tukforhnak
Khuachia nih Jesuh cu voithum tiang a rak tukforh. Johan nih Jesuh cu tipilnak a pek dih cangkaa tein Thlarau nih Jesuh cu Tukforhnak inter awkah nelrawn ram king ah a kalpi. Jesuh cu ni 40 le zan 40 rawl loin a um. Jesuh nih a duh ngaingai dingmi in khuachia nih a hneksak. Thil paklhat paoh ei khawh awkin tuah sehlaw zei sualnak dah a um hnga? Jesuh nih le a rawl a tam ngaingai fawn.Khuachia nih cun "Pathian Fapa na si ahcun na paw a khim khawhnak dingah thil phundang tuah hnek ngat" tiah a ti. Lung cu rawl i canter a fial. Hi tukforhnak pakhatnak hi mah zawn lawng i ruahnak, duhfahnak tukforhnak a si. Jesuh nih biakam hlun Deuteronomi 8:3 chung bia in khuachia cu a leh " Minung hi rawl lawnglawng in a nung lo. Bawipa ka in a chuakmi bia tu in a nung deuh" tiah a ti ( Luka 4:4 ).
2. Jesuh tukforhnak pahnihnak;
Cun khuachia nih cun Jesuh cu a kalpi ( Luka 4:5-7 ). Jesuh nih fel tein cawlei uknak nawl a ngeih khawhnak lam zulh in tukforhnak a si. Khuachia nih Jesuh cu "Ka hmaika ah khukbil in kai law vawlei vialte n auk dih lai" a ti. Jesuh nih hi bantukin nawl ngeihnak nawl (aaaa) cu a duh lomi a si kha a hngalh. Vawleicung mi vialte khamh khawhnak caah sifah retheihnak le thihnak in a herh ti kha Jesuh nih a hngalh. Cucaah Jesuh nih Biakam Hlun Deuteronomi 6:13 chung bia i cherhchan in a leh than "Bawipa na Pathian cu na tih lai na biak lai i a min in chiat na ser lai lo" tiah a leh ( Luka 4:8 ).
3. Tukforhnak pathum;
Jesuh nih huham a ngeih zia langhternak ding i tukforhnak a si ( Luka 4:9-11 ). Khuachia nih Jesuh a tei khawh nakhnga caah Cathiang chung bia cherhchan in tukforhnak a si (Salm 91:11-12). Khuachia nih cun Jerusalem ah khan a kalpi i biakinn parpahlek ah khan a thutter. "Pathian Fapa na si ahcun hi ka hin vung zuang ngat. Pathian nih nangmah kha tha tein zohkhenh awkah a vancungmi kha a fial hna lai i an kut in an in cawi lai i lung ah na ke hmanh na khawnh lai lo" tiah a ti. Asinain hi tukforhnak zong ah hin Jesuh cu a ril hlei lo. Khuachia tukforhnak a si ti kha a hngalh caah cathiang chung bia cherhchan in Jesuh nih khuachia cu bia a leh. " Bawipa na Pathian cu va hneksak hlah" tiah a leh (Deuteronomi 6:16; Luka 4:12).
4. Kanmah tukforhnak;
Khuachia nih Jesuh a tukforhnak pathum bantuk khan kan nih zong tukforhnak kan tong zungzal ve. Jesuh nih khuachia tukfrohnak a tei bantukin kan tei ve awk a si.
(a) Tukforhnak pakhat;
Kan pumas duhnak ca lawng ruahnak, hakauhnak, a phunphun in tukforhnak a si? Cu bantuk tukforhnak cu zeidah a si? zeitindah kan tei khawh lai? Jesuh nih Baibal bia in khuachia tukfoehnak a tei bantukin kannih zong nih Baibal chung bia kan hngalh a herh ngaingai. Cathian chung i Pathian bia cherhchannak lawngin tukforhnak kan tei khawh lai. Kanmah ruahnak nakin Pathian nih a kan chimhmi bia cu a biapi deuh. Cucaah thil hark an ton tikah kanmah ruahnak men lawng bochan lin Pathian duhnak kan zulh hmasa ahcun tukforhnak kan tei khawh lai.
(b) Tukforhnak pahnih;
Hi tukforhnak cu pumas duhnak hmang in tukfrohnak a si. Har ngaiin tuan loin fawi tein hmuh duhnak a si. Jesuh nih hi bantuk pumas duhnak lam hi a zul duh lo. Khuachia hmaiah khukbil in khuachia kha bia ko sehlaw vawlei uktu siangpahrang a si ko hnga. Asinain cu bantuk cu Jesuh nih a duh lo. A zulh awk i Pathian nih a rak timhcaimi vaivam tahnak in thihnak lam a zulh hnuah thihnak in a tho than. Hi thihnak a tei hnuah vawlei le vancung uktu Siangpahrang a si. Cucaah kannih zong a dingmi lan zulh in sifah harnak kan ton zong ah kan in ko lai i a donghnak ahcun lunglawmhnak kan hmuh lai. Pathian duhnak zulh in amah lawng kan biak awk a si.
(c) Tukforhnak pathum;
Kan thawng tuk thil ka ti kho tuk tiin midang sinah kan nawl ngeihnak langhternak a si. Mi nih a fim a thiam ka ti hna seh ti duhnak mi nih ka thangthat hna seh ti duhnak a si. Hi bantuk hi tukforhnak nganpi pakhat a si. Cu bantuk ruahnak cu Khrihfabu chung le khuachung i a um tikah hnahnawhnak a chuak kho. Asinain Jesuh nih hi bantuk tukforhnak cu a tei cang. Jesuh nih hi bantuk i faknak le i titernak cu duh loin minung bantukin vawleicung ahtoidornak le nautatnak in a rung chuak. Kannih zong Jesuh hnu kan zul i toidornak in le mah le mah i nautatnak in midang caah riantuan in kan dawt kan zaangfahnak hna awk a si. Cu ti a si ahcun tukforhnak cu kan tei khawh lai.
(d) Ruah awk;
Nifatin kan nunak ah tukfrohnak kan hrial kho lo. Cucaah kan ruah awk le kan i cinkei awk bia tampi a um.
I. Khuachia tukforhnak kan ton caah misual kan si tinak a si lo. Mi tampi nih nifate an nunnak ah harnak le hneksaknak an ton tikah sualnak ah an ruah khawh men. Hneksaknak nih matha ah a kan canter khawh deuh. Sualnak a si ti kan hngal ko nain kan tuah khi sual a si.
II. Jesuh nih Cathiang chung bia cherhchan in tukforhnak a tei. Khuachia cu a fim ngaingai i a kan tei khawhnak dingah cathiang chung bia hmang in a kan tukforh lai. Cucaah fak piin Baibal chung bia le a chim duhmi kan hngalh a herh. Nifate in Baibal ca kan rel zungzal awk a herh. Cu ti lawng cun tukforhnak kan tei khawh lai.
III. Jesuh cu thla a cam zungzal. Vancung I a pa he thlacamnak in an i pehtlai zungzal lai. Jesuh hmanh nih cu bantukin thla a cam ahcun kannih cu thlacam kan herh chinchin. Nifate thla kan cam i Pathian he kan i pehtlai tik lawngah khuachia sual tukforhnak cu kan tei khawh lai.
IV. Tukforhnak kan ton caah kan sual tinak a si hlei lo. Sualnak kan tei khawh han caah Pathian nih kan bawmh hna lai tiah bia a kan kam cang ( Hebru 2:18 ). Tukforhnak kan cung i tlung lo dingah kan kham kho lo. Asinain sualnak chungah kan tluk lonak dingin Pathian sinah thla kan cam lai i kan tluk sual hmanh ah kan thawh than khawhnak dingah thawnnak a kan pek lai ( 1 Johan 1:9 ).
