Cawnnak 6nk
Baibal rel awk; Luka 1:5-25; 57,80
Tinhmi: Johan cu Pathian biakamnak a tlintertu a si i Jesuh Khrih ratnak ding caah lamsialtu a si ti hngalhnak caah.
1. Tipil petu Johan chuahnak Vancungmi nih an chim;
Kum 1900 hlanah Judah ram chung khua hmete pakhat ah tlangbawi Zekhariah le a nupi Elizabeth an um. An inn chungkhar in Pathian a zum ngaingaimi le a nuam ngaimi an si. An nupa in Moses le Aaron te hrinthlak an si. Zekhariah cu Biakinnpi chungah rian ngai a si bantukin kum khat voihnih a kal theo. Atu atan zongah hin Pathian sinah raithawinak tuah dingah a kal i hmun thiang bik hmunah raitawinak tuah dingah thla a cam. Cu lioah Pathian vancungmi “Gabriel†cu a siah a rung lang. Messiah ratnak dingah bia a rak chimtu dingah amah chungkhar chungin pakhat a chuahnak ding kha a hung chim. Israel mi hna thlua-chuahnak a pe dingmi pakhat a chuak lai ti an lioah Zekhariah nih hi bia a theih tikah a lung aa lawm ngaingai Zeikhariah le Elizabeth cu fa ngeih kho lomi an si. Cu bantukin vancungmi nih fa ngei dingin a chim tikah Zekhariah nih cun a zum kho lo a thin a phang i a tih tuk lio ah Vancungmi nih “tih hlah na thlacamnak cu Pathian nih a theih i fapa pakhat an pek lai†a ti. A fapa min cu Johan a si lai ti le a tiantuan hngami hna a chimh ( Luka 1:15-17 ). Zekhariah cu Pathian a zum ngaingaimi a si ko nain Vancungmi i an chimhmi bia hi a zum kho ngaingai lo. Cucaah khualeng ah a va chuk i a rak hngak komi hna sin a va phanh tikah holh kho loin a um. Inn a phanh tik zong ah a holh hlei lo. Zeicahdah a si kan ahcun Vancungmi nih an chimhmi bia a zumh lo ruangah fapa a ngeih hlan tiang holh kho lo ding in bia a kam caah a si.
2. Pathian nih Biakam a tlingter;
Vancungmi chim natukin fapate cu an ngei taktak i a min sak awkah hawikom le rualchan an sawm hna. An dihlak hna hlaknak in a pa min loh lonak diangah Zekhariah sak an i tim. Asinain Zekhariah nih cun a si kho lai lo a ti i catialnak ah cafung le catlap a hal hna. A fapa min cu Johan nan sak lai tiin a tial. A ti bantukin Johan an sak. Mah cangkaa te cun a holh kho colh than. A lung aa lawm tuk i Pathian thangthatnak hla a si. A sakmi hla cu Luka 1:68-79 chung hi a si.
Johan ngakchiat lio bia hi fiang tein kan hngal kho lo nain a tlanval hnu in ramlak i amah te lawng a um le a tiding le a rawl eimi pawl cu kan hngalh khawh ( Marka 1:6 ).
3. Tuan awk kan herh;
Johan nih ramlak nelrawn lak i amah te lawng a um cu a chim dingmi bia cu raktha ngaiin biatak ( biadik ) a chim khawhnak ding a si. Kannih zong Pathian ram caah nifate timh tuah lengmangmi kan si. Kan nih zong Johan bantukin Jesuh ratthannak ding kan chim khawh nakhnga caah amah Jesuh kha kan pom i kan zumh hmasa a herh. Cu hnu lawngah mi dang sinah kan chim chin khawh lai.
A herhmi timhtuah awk hna cu;
(a) Thlacamnak: Midang sinah Jesuh bia kan chim khawhnak ding caah thla fak piin kan cam a herh. Thlacamnak tel loin kanmah fimnak lawng cun zeihmanh san a tlai lo.
(b) Chawva peknak: Khrihfa kan si ahcun amah sinin kan hmuhmi kan chawva le thilri hna cu amah kan pek than ve a herh. Pathian thawngtha bia karnak dingah chawva a herh i misifak bawmhnak caah ngeihnak a herh.
(c) Pathian bia chimnak: Pathian bia chim kan timi cu zarhpi zing fate hmai i bia chim khi a si khun hlei lo. Cu nakin a biapi deuhmi cu mi pakhat sia i va kal i va chim khi a biapi deuh. Zarhpi ni zingfate kan cawnmi bia hna hi kan nule kan pa sinah maw! Midang sinah maw chim chin lengmah awk a si. Kan i thutpi ko ahcun kan thlau chun lengmang ko lai i kan chim chin lengmang ahcun kan hngalh chin lengmang ko lai. Cun kan nunzia hrimhrim in langhter ding kan si.
