Cawnnak 5nk
Baibal rel awk: Salm 51:1-4; 103:1-12; 59:1-4
Timhmi : Abiakam a tlintertu Pathian cu zumh awk le biak awk a si i amah nawlbia ngaih awk a si ti hngalh khawhnak caah.
1. Pathian cu khamh khotu a si;
Khrihfami nunnak chungah khuaruahhar bik a simi bia cu Jesuh Khrih cu khamhtu le Bawi i pom tikah kan sualnak vialte ngaih thiam a si timi hi a si. David nih cun Pathian nih a man loin ka sualnak a ka thlahpiak ti a hngalh. Cu bantukin kanmah kan sualnak kan i ngaihchih ahcun kan sualnak cu Pathian nih a kan hlahpiak khawh ko. Pathian a panhtu paoh cu ahohmanh a dawn bal hna lo. Zeicahtiah Pathian nih minung cu a kan dawt tuk caah a si (John 3:16).
2. Pathian cu a kan pe khotu a si;
Pathian nih kan herhmi paoh a kan pek khawh. Pathian nih kan herhmi paoh a kan pek dih lo hmanh ah kan sualnak a kan ngaihthiam hi a za tuk cang. Asinain a Khamhnak cu a hramthawknak a si i kan herhbaumi vialte a kan bawmh rih lai. Cucaah David zong nih Salm 23 chungah fiang tein Pathian nih a kilven i a erhbaumi vialte a bawmhnak kha a phuan. Paul zong nih Filipi 4:19 chungah fiang tein a chim ve. Cu lawng si loin a dang Baibal chungah Pathian umpinak le bawmhnak bia kan hmuh khawh hna.
3. Pathian cu a kan cong zungzaltu a si;
Pathian nih tihphannak chungin a kan khamh i nifate kan nunnak caah tukforhnak a phunphun kan doh khawhnak diangah a kan bawmh rih. Kan takpum thinphannak chungin a kan kilven fawn. David zong kha Saul Siangpahrang le a fapa Absolom kut chungin a khamh i a kilven. (Salm 59:14).
4. Pathian cu kan Thlarau Khamhtu a si;
Kan taksa pum hrawktu ding hmanh a kan khamh ahcun kan thlarau chinchin cu a kan khamh duh tuk ko. Nifate kan nunnak chungah tukforhnak le tihnak chungin Pathian nih kham a kan duh (I Korin 10:13). Thlarau in kan tluk a si ahcun Pathian nih a kan khamh lo si loin Pathian kilvennak chungah kan um duh lo ca tu ah a si deuh.
5.Pathian nih kan herh lengin a kan pek;
Pathian nih kan herhbaumi nakin a hlei in a kan bawmh theo tawn. Kan caang thimmi chung i kan rel cang bantukin Efesa 3:20-21 "Pathian nih kan hngalh phak khawh lomi kan herhbaunak tiangin a kan bawmh" a ti. Hi bia nih hin vancung bia le vawlei cung bia a chimkemh. Asinain "Kei cu ka halmi nakin a hlei in ka hmuhmi ka hngal bal lo" a titu zong kan um kho ko. Hi kong ah hin Pathian cu zeizong vialte sersiamtu le a hngaltu a si bantukin fimnak sang bik zong a ngei. Cucaah tuah awk le tuah lo awk tlak lo zong a hngal dihtu a si. Cucaah kan hal bantuk le kan halnak tam i kan hmuh tawn lonak cu Pathian nih kan ca i thil tha kan herhbaumi taktak lawng a kan pek tawnnak cu a si. Amah mui sunparnak diang a si ahcun a thap in a kan pek chih rih ko.
6. Pathian nih pek a kan duhmi;
Salm 139:2-24chung i David thlacamnak bantukin, Pathian nih Amah mui chiatnak ding le kanmah chiatnak ding thil chungah cun kan hla zongah a kan pe hlei lo. Cucu Pathian fimnak kan hngalh phak khawh lomi a si.
Hmaizarh Cawnnak 6
