Cawnnak 10nk
Baibal rek awk: Luka 4:16; 5:39
Tinhmi : Jesuh Khrih cu Pathian nih thawnnak a pekmi thawngin kan harnak vialte a kan bawm khotu a si ti hngalh khawhnak caah.
Jesuh Khrih hmanh thlacam a herhmi a si ahcun kannih cu zeitluk in dah cam chinchin awk kan herh ti kha finag tein hngalh khawhnak caah a herh bikmi a si ( Luka 5:16 ). Kan hawikom hna caah thla kan campiak hna awk a si. Nan hawikom hna an herhnak cu nan hngalhpiak kho hna maw? an inn ah maw na campiak hna> bochannak an in ngei kho maw? cun pastor le sayate ca fimnak petu sayate ca zongah thlacampiak zungzal awk a si. cun nuli pa caah a hlei tein thlacam a herh.
1. Jesuh nih Nazaret ah phun a chim;
Biakinn ah Jesuh a kal tikah cathiang keng tupa nih Jesuh cu a rak pek. Cu cathiang cu Jesuh chuahhlan kum 700 hrawng i profet Isaiah i a rak tialmi a si. jesuh nih amah bia le a riantuan dingmi an rak tialmi a rel dih ( Isaiah 61:1-2; Luka 4:18-19 ). Mi tampi nih cathiang a relmi cu an ngeih i an khuaruah a har. Cathiang a rel dih tikah "Hi cathiang chung i a chimmi bia hna hi nihin ah a phan" a ti. Isaiah nih a rak chimmi pa kha keimah hi ka si a tinak a si. Mi vialte nih kum saupi an rak hngah komi cu a phan cang nain amah cu an zum duh lo hlei ah an hlawt dih. Amah kha thah an duh. Sihmanhsehlaw zapi lak khan aa zuk i a lan ( Luka 4:30 ).
2. Jesuh nih khuaruahhar a tuah
(a) Khuachia a chuah: Jesuh Nazaret khua in Kepernuam khua ah a kal i Sabbath ni ah Biakinn ah a kal. Mi nih a bia chim an theih tikah an khuaruah a har ( Luka 4:32 ). Cu lio ahcun khuachia thlarau nih a zawttermi mipa pakhat cu mizapi lakah a ra i fak piin a au len. Luka 4:34 cu pa nih cun Jesuh kha Pathian Fapa a si kha a hngal. Jesuh nih cu pa chungin khuachia cu chuak tiah a ti i a thawh. An dih lak in an khuaruah a har ngaingai ( Luka 4:40 ).
(b) Mizaw a damter: Cu hnuah Jesuh cu a chuak i Simon inn ah a leng. Simon nupi cu a rak zaw i a tak a lin ngaingai ( Luka 4:39 ). Jesuh nih chikkhat te ah a damter. Jesuh caah tuah khawh lomi zeihmanh a um lo. Mizaw tampi an ratpi hna i Jesuh nih a rak damter hna ( Luka 4:40 ).
(c) Jesuh thla a cam: Jesuh zong Biakinn ah a kal i thlacam awkah ram lak ah a kal tawn. Jesuh bantuk cun kan i zuam a herh. Jesuh bantukin midang kan bawmh awk a si. Jesuh nih thlighmui zawtnak a ngeimi zong a damter hna.
(d) Jesuh nih sualnak a ngaihthiam: Jesuh nih bia a chim lio ah Farasi pawl phungchim thiam pawl cazi le midang tampi nih an rak ngaih. Cu ti an um lio ahcun mizeng pakha a hawile nih an rak zawnh i Jesuh umnak inn cung in Jesuh hmaiah an vun thlak. Jesuh nih "Na sualnak cu ngaihthiam na si cang" tiah a ti ( Luka 5:20 ). Cu hnuah "Tho law na iphah kha i cawi law inn ah va tin" tiah a ti. A zawtnak cu a damter. A lung aa lawm i Pathian a thang-that. A hmuhtu vialte nih Pathian an thangthat cio (Luka 5:26).
(e) Jesuh nih A zultu a kawh: Galilee tili pawng ah Jesuh cu a dir lio ah tilawng cung in Simon cu sur a vorh len ko kha a hmuh. Zan khuadei an vorh nain nga pakhat hmanh an tlai lo. Jesuh nih a hmuh tikah "Ti thuhnak leiah hei vorh u" a ti. Jesuh nih a fial bantukin Simon Peter nih a sur cu a hei vorh tikah nga tampi an tlaih. Jesuh nih Peter sinah "Atu cu nga tlai ti loin minung na tlai cang hna lai" a ti.
Ngatlaitu Jeim le a nau Johan: Jeim le Johan cu lawng chungah an sur tlek an rak thlop len ko kha Jesuh nih a hmuh hna "Ka zul u" a ti hna i an sur kha an kal tak I amah kha an zulh. Voikhat cu lam pawng ah ngunkhuai khawltu Matthai ( Levi ) kha Jesuh nih a hmuh i "Ka zul" a ti. Matthai nih cun a rian cu a ngol tak i Jesuh cu a zulh.
