Cawnnak 4nk
Timhmi : Zeizong vialte sertu Pathian kha biak awk a si ti an hngalh khawhnak caah.
1). Pathian cu sertu a si;
Isaiah 40:12 chung kan zoh ahcun Pathian cu zeizong vialte sersiamtu le uktu a si zia kha fiang tein kan hmuh khawh. Kan umnak Vawelei pi zong hi dohtu zeihmanh ngei loin thli lakah a um ko. Hlan lio ah Baibal i a rak kan chimhmi hna cu atu chan ah mifim pawl nih an hngalh. Job 26:7 "Vawlei cu zei hmanh lo cungah aa thlai" tiin Job nih a ti. Kan umnak Vawlei pi cu thli lakah amah le a lam te ah rang ngaingai in aa mer nain a umnak ding hmun hrelh lo tein hmaan tein a kal khawh hlei ah a rihnak zong ahohmanh nih an tah khawh lomi a si.
Pathian sersiammi kan umnak vawlei pi hi khuaruahhar a si. A chungah tlangsang bik le rili thuk bik zong an um. Saram a hme bik in a ngan bik tiang zong in a ser hna. Cu lawng si loin zan i van ah kan hmuh tawnmi thlapa le arfi vialte hna nih Pathian lianhngannak le sunparnak cu an langhter (Salm 19:1). Isaiah 40:12 chungah hi hna vialte hi Pathian kutchung um an si tiah a kan chimh.
2). Pathian cu a lianngan bik
Isaiah 40:13 kan rel ahcun Pathian fimnak a kauh zia kha kan hmuh. Kan biakmi Pathian hi lianngan bik Pathian a sinak kha a tuahmi thil vialte kan hmuh tikah a lang chinchin (Salm 19:1). Hi thil hna a ser i a uk khawhnak ding ah ahohmanh nih ruahnak an pe lo. Kan Pathian cu a thawng i a ngan bik, cungnung bik a si. Cu tluk liannganmi Pathian cu voikhat tal na ruat bal maw? A sersiammi thil vialte hi ruat hnik hmanh, thangthat loin na um kho lai lo. A sersiam thil hna cu kal tak loin a zohkhenh i a kil ven zungzal hna.
3). Pathian cu thangthat aw;
Isaiah 40:18-20 cungah Pathian cu sersiamtu le uktu a si caah amah bangin hngalhtu ahohmanh kan um lo zia kha a kan chimh.Asinain mi cheukhat nih siasal milem mui dawhdawh ser in a chungah pathian kan hmter tawn. Pathian cu lei le van a sersiamtu thil vialte nakin a ngan deuh mi a si kha kan hngal kho naisai lo. Pathian kan biakmi cu kanmah nih ser ding si loin amah cu a kan sersiamtu deuh a si (Salm 100:3). Pathian cu thangthat awktlak le upat awktlak hrimhrim a si (Salm 145:3).
4). Pathian cu biak ding;
Salm 8:3-4 chungah David nih van le vawlei le thlapa le arfi a zoh hna tikah Pathian nih minung a zohkhenh i a kilven zia a hmuh khawh. Amah nih tha dih le zaangbat ti ngei loin kan thawn chinchinnak dingah thazaang thar a kan pek zungzal. Vawleile van i thil a ummi kan hmuh tikah Pathian cu biak awktlak le thangthat awktlak a sinak kha a lang. Cucaah Pathian kan biak kip te ah Pathian sunparnak le thangthat tlak a sinak kha ruat in upat le hmaizahnak in kan biak awk hrim a si.
Hmaizarh Cawnnak 5
