Chin miphun hna lakah nan unau pakhat a simi; kei,a sal santlai lo Tluang lian nih, BAWIPA JESU KHRIH zumhtlak a si nak kong tehkhaan ka duh ko.
Galati.1:15
Ka Pa Phai Uk (Hakha&Salen khenglawt) le ka Nu Ngun Pum Zathang Sangpi Chung (Hakha&-Bahnawhtlang) nih Hakha khua ah fa pathum an kan hrin i a u pa bik ka si.A ka changtu ka nau pa te hi a chuahka ni tlawmpal ah a kan thih tak.Ka nau hniang nu Van lal Siam he unau tafar pahnih te lawng kan si.
Ka Nu le ka Pa hi mucu kai ka zat hlan deuh in an i then caah,Hakha ka Pi le ka Pu (Ka Nu i a Nu le a Pa) sin ah kan rak um.Ka Nu hi Tamu le Mawre hna ah Chawkawlrian a rak tuan ve i ka Pa tu cu Mizoram ah va um ve.
Ka Pa i a Nu le a Pa (Ka Pi le ka Pu) hi Thantlang ah an rak um ve.Hakha i ka Pi le ka Pu an har deuh paoh ah,Thantlang ah va kal an ka ti i Thangtlang ah ka rak kal.Thantlang ka Pi le ka Pu an har deuh ah Hakha ah va kal an ka ti i Hakha le Thantlang kha ka rak hlat tawn!Ka holh zong hi Hakha holh le Thantlang holh he a rak i cawh dih.
Chim ka duh mi cu 'dawttu dawtnak ti ka haal tuk,' hringhran!Mithmaitha a ka pe i a ka chawn mi paoh hin an ka daw taktak hnga maw?awaw?ti nak he ka rak zoh lengmang tawn hna.Tangcheu ka kai lio hrawng a si lai tiah ka ruah!zingkhat cu Sunday School ka rak kai ah,Sayama nu pakhat nih,"Bawi Jesu nih ngakchia tete hi an dawt tuk hna,Bawi Jesu cu Pathian Fapa a si i zeizong vialte a tuah khotu a si,"tiah a rak kan chimh.Va si taktak selaw,awaw!"Pathian Fapa Bawipa Jesu nihcun ka daw taktak selaw ka miak lai ning,awaw!"ti pah lengmang khin ka rak tiin!
Thaithawh kan ei dihcun,Ka Pi le ka Pu nih,"khah!kan i pum ve cang lai i nang Inn rak hngak ve cang;thil hna a tlau sual lai tha tein rak hngak,"an ka ti i an nih an va pum ve.Tappi hram i ka to ko lio ah ruahlopi in ka haa a fak!Tikor hmuampei a tha an ti kha ka ti i Tappi kam i Ka Pi le Ka pu Tikor an tohta mi te cu ka lak i ka hun hmuam ve!A dam hlei lo caah,Kuang chung i MB si tlang kha lak ka timh i tawh a rak i hrenh fawn.Vansang ngai khin tappi hram ahcun ka thu than.
Culio ahcun ka ruahnak ah thil pakhat a hung ra i,ee!Sayama Nu nih pei Bawi Jesu nih ngakchia an dawt tuk hna a kan ti kha!?"Pathian a um i Bawi Jesu nih ngakchia a kan dawt taktak a si ahcun,Biak Inn ah ka va kal lai i ka dam ko lai,"tiah ka ruahnak ah a hung um!
Biak Inn ahcun kal ka hun i tim i Inn tual ka phan cang!"Ee!tawhhrenh a um fawntung lo i thil a tlau sual lai," ti kha ka hun ruah fawn (Culio hrawng cu Mifir an rak um pah)!
Um!"Pathian a um taktak i Bawi Jesu nih ngakchia a kan dawt taktak a si ahcun,
Inn zong hi a rak ka ven piak ko lai,"tiah ka ruah than.Ka haa cu a fah ngai caah ka mithli he ka hnapduk he ka si i lamnai bik kan Inn Lunghlei-va cho he a naih biknak AG biakk inn (Dawrthar) ah ka va kal.A hnu Bik tlar hnih hrawng a rak lawng i a lawnnak ahcun ka va thu i,"Bawipa ka damter ko tiah,"a hmasa bik ka thlacamnak cu ka hun cam.Bawi Jesu min in ti zong ka rak hngalthiam rih lo.
"Pathian a um takatk lai i Bawi Jesu zong nih a ka dawt ko lai,"ti ka zumh caah,ka dam colh bak rua lai tiah ka rak ruah.Ka ruah ning bantuk a si ti lo;ka haa fahtu a zual chin mi a lo!"Ka dam fawn tung lo ahcun,ka tiin ah maw a that deuh hnga?thil hna a rak tlau sual hnga maw?"tiin ka ruah lengmang lio ah khin;thangthatnak hla an hun sa i Upa pipi an kut an hler i zapei an bengh ka hun hmuh hna tik ah,"aaa!Upa pipi i an thangthat mi hi cu a um ko lai,a ka damter te ko lai,"ka ti i ka thu ko!
Zapi thlacam a hun phan i thlacam awk ah ka mit cu ka hun i chinh ve.Halleluia!
Bawipa Pathian nih cun ka um taktak i Bawi Jesu zong nih kan dawt taktak ko ee!tinak caah thlacam caan te kha a rak i sel mi cu a rak si.Rak tiin taak sual ko ning law,a poituk ko hnga.Thlacam awk i ka mit ka hun i chinh cun,Bawipa nih mah hngal loin a ka um ter i ka rak i hngilh diam ai!Phungchimtu pa nih pulpit a hun cumh thawng nih a hun ka hlauh!Ka hun i hlau i,ziah?!thla pei kan cam kha?!
Ka haa pei a fak kha?!Ka hun i tong i ka rak dam diam cang!
Halleluia!Bawipa thangthat si ko seh!
Lunglawm eem eem in ka chuak i,ka ti a rak haal tawn mi dawtu dawtnak,Tikhor Bawipa Jesu cu kaa hmuh cang i Pathian a um taktak ti zong ka hngalh cang!!!Cuticun,"Pathian a um i Bawi Jesu nih a ka dawt,"ti hngal bu tein Inn ahcun ka lawi i,Inn zong him te in Bawipa Pathian nih a rak ka ven piak.A men,Halleluia!Thil hmuh chuah mi vialte lak ah Bawipa Jesu hmuhnak i a tha mi le a hlawk mi a um lo!
Pehthan te ding
Tluang Lian (martar)
Hakha
