Tukforhnak Chungah Kan Tlak Sual Nakhnga Lo Thlacam Usih.

         Chin Christian Church, Malaysia “Crusade”

                        Speaker- Tluang Za Uk Group

                Wednesday; Zan- Evan. Za Kian

A hmasa bikah tuzan tiang kan nunnak lam a kan hruaitu le taksa thinlung thlarau damnak le thluachuahnak he kan nunnak a hmangtu le amah thangthat kho dingin caantha a kan petu Pathian amin thiang thangthat si ko seh.

Bible relnak-  Matthai 24

          Nihin zumtu mi vialte hna nih nitin kan nunnak ah Tukforhnak chungah kan tlak sual nakhnga lo thlacam hna u sih tihi kan Bawipa Zisuh nih a kan fialmi a si. Zisuh le a zultu hna cu Oliv tlang leiah khi na va kai i, cu ka hmunah cun Zisuh thla a va cam. Cu lio ahcun a zultu hna cu a hnuah an rak tang i, Zisuh thla a cam lioah cun annih cu thla rak cam loin an rak i hngilh dih ai. Cu lioah cun Zisuh cu an sinah a rak ra i a zultu hna an rak I hngilh dih kha a hmuh tikah a zultu hna cu a thawh hna I zeicahdah thlacam loin nan rak I hngilh dih ko, tho u law tukforhnak chungah nan tlak lonak hnga ding caah thlacam u tiah Zisuh nih cun a ti. Nihin kannih zumtu zong Pathian nih kan nunnak rem khawhnak ding caah le thluachuahnak kan hmuh khawh nakhnga ding caah le tukforhnak chung kan tlaklo nakhnga ding caah Pathian sinah thlacam ve hna u sih. Cuti thla kan cam ahcun Pathian nih zeizong vialte hi a kan rem dih lai I a thluachuahnak a kan pek lai I tukforhnak zeihmanh nih a kan tei kho lai lo. Cucaah Pathian sinah thinlung dihlak nunnak dihlak in thlacam hna u sih.

Thlacamnak hi zeitlukin dah hmual a ngeih kan ti si ahcun Thlacamnak nih hin zeizong vialte kha a tlinter khawh dih I, a remh khawh lomi zeihmanh a um lo. Cun kan ramah Thlarau ruah a sur khawh nakhnga ding caah zumhnak in fak taktak in thlacam hna u sih. Cun kan nunnak ah Pathian duh lomi nunnak le a thianghlim lomi nunnak vialte hi hrawk dih hna u sih. Cu hnu lawngah kan ramah Thiang Thlarau a sur kho lai. Cu vialte zumtu kan nunnak ah a phuan khawh nakhnga ding caah thlacam hna u sih. “Laimi kan ramah Pathian biatak ruah a sur khawh nakhnga ding caah kan nunnak ah a tha lomi nun le a thiang lomi nunnak vialte hi kal tak dih hna u sih. Hi vialte Laimi zumtu nih kan kal tak si ahcun Laimi kan nunnak ramah thluachuahnak sur a si lai I, kan ram a dam ko lai. Cun thla hi kan cam zungzal ding hi a si” Hihi Pathian nih a kan fial vemi nunnak a si.

Cun thla kan cam tikah hin a phuan men in thla kan cam ding si lo, thinlung dihlak nunnak dihlak takin thla kan cam hi a herhmi a si. Zei ruangah dah Laimi kan nunnak thla kan cam ko nain Pathian nih kan thlacam nak a kan leh lo kan ti ahcun kan thinlung takin le kan nunnak takin thla kan cam lo I kan ai kan ceo men caah a si. Hiti thla kan cam ruangah Bawipa kan cungah aa lawmh lonak hi a si. Bawipa kan cungah a lawmhnak khawh nakhnga ding caah thla kan cam tikah hin thinlung tak nunnak takin Pathian ttihnak he thlacam hna u sih. Cuti thla kan cam ahcun kan nun a rem lai I kan nun a thleng lai I kan ram a dam lai I, thluachuah van ruah cu kan cungah a sur zungzal ko lai. Cucaah kannih nih cun Pathian hmai lawng kawl ko hna u sih. “Laimi kan nunnak ah ngaihchia ngaimi le ttih a nung takmi cu Pathian tu ttanh loin Pathian biatak kan doh hi a poi taktak mi a si” Laimi nih kan nunnak ah le kan zumhnak ah le thla tu cam loin kanmah duhning in khua kan sak tawn caah hin Laimi kan vaivuanh dihnak hi a si. Kannih Laimi nih cun kan zumhnak le kan nunnak le kan thlacam nak ah hin Pathian duhmi le lawmhmi si I zuam hna u sih. “Laimi kan nunnak ah Pathian thluachuahnak kan cungah a tlung khawh nakhnga ding caah Pathian thangthat hna u sih law, Pathian thlacam hna u sih. Cu thil vialte kan nunnak ah kan I nunpi a si ahcun Pathian thluachuahnak kan cungah a sur in a sur ko lai” Cun kan chungkhar le kan ram a dam I a thleng khawh nakhnga ding caah Pathian cu doh loin Pathian hi ttih hna u sihlaw, Thlacam hna u sihlaw, Pathian hmai kawl ko hna u sih. Hihi nunnak nih hin Bawipa cu a lawmhter lai I kan ram le kan chungkhar a rem lai I thluachuahnak cu kan cungah a tlung ko lai. Cun hi nunnak lam hi na zulh a si ahcun le thla na cam zungzal a si ahcun zeitikhmanh ah tukforhnak chungah hin na tlak kho bal lai lo. Zei ruangah Pathian nih a hmai na kawlnak hmangin le amah na ttihnak hmangin Pathian nih an ven zungzal ko lai. Bawipa duhning in na nun I thla na cam si ahcun Bawipa nih zeizong vialte na hngalhlo karah an rem piak dih lai I thluachuahnak cu nah mu ko lai.

Nihin ah kan nunnak ahhin Pathian kan ttih lo I thla kan cam lo a si ahcun Pathian he kan I hlat chinchin lai I Pathian he kan I hlat deuhdeuh a si ahcun kan nunnak cu tukforhnak chungah kan tlak deuhdeuh ko lai I, zeitin hmanh in Pathian thluachuahnak cu kan cungah a sur kho hrim lai lo. “Cun kan nunnak ah Pathian ttih loin le thla kan cam lo a si ahcun sualnak chungah kan pil chin lengmang ve ko lai” Hi sualnak chungah kan pil lonak hnga ding caah hin thlacam hna u sih. Thla kan cam peng a si ahcun tukforhnak chungah a tlak kho hrim lai lo, kan nun a rem cuahmah lai, kan ram a thleng deuhdeuh lai I, thluachuahnak cu kan cungah a tlung duahmah ko lai.