NUNAU MIPATNAK NUN THIANGHLIM

NUNAU MIPATNAK NUN THIANGHLIM

(SEXUAL PURITY)

Introduction

Bible in nunau mipa sualnak atimi ah nupi pasal neih awknak lenglamah nupa pawl awknak, nulenu palepa sualnak, ramsa sualpinak, hurkhuannak pawl a tel. Ruanak, suangtuahnak, tongkam, le rualpi pawlkom pehtlaihmi, siciihmi pawl, tiang a huap theh. Nun thianhlimnak in ruahnak, duhnak, tongkam, umnak, pehtlaihmi le tuahnak pawl khalah thianghlim ding kan si.

Mipa pakhat, nunau pakhat hrangah Pathian khuakhan

I Kor. 7:2-4

2Asinain nupa sualnak a tam ruangah mipa in amah ih nupi lawng nei sehla, nunau khal in amah ih pasal lawng nei seh. 3Mipa in pasal a sinak ṭuanvo cu kimter sehla nunau khal in nupi a sinak ṭuanvo cu kimter ve seh; an pahnih in an ṭulnak fingfingah diriamter ton-aw haiseh. 4Nupi in amah ih taksa ruangpi hi a uk lo, a pasal in a uk; cuvek thothoin pasal in amah ih taksa ruangpi hi a uk lo, a nupi in a uk a si

·        Mipa in nupi paziat a nei ding?

·        Nunau in pasal paziat a nei ding?

·        Nupi pasal neih awk hnu ah na ruangpum zo ih ta asi zo?

·        Nupi pasal duhnak lungawi aw ter ding asi maw?

Buainak Hram

Mathai 15:19 Ziangah tile mi a thattertu, ṭaangṭawm sualnak a tuahtertu, nupa sualnak a tuahtertu, ruk a rutertu, thuphan a pertertu, le mi a thangsiattertu ruahnak siava hmuahhmuah cu a thinlung sung ihsin a suakmi an si.

·Nupa sualnak khuitawk ihsin a thawk?

·Thinlung ihsin ziangthil thalo pawl a hringsuak?

·Ziangruangah kan thinlung sungah ruahnak, duhnak a ummi pawl kan fimkhur a tul?

·Nunau mipa sinak kan ruahnak, duhnak, (feeling, thoughts, immigination) pawl a tha lo lamah a fehtertu ziang pawl an si? Facebook, online, text message, rualpi, tv, tvp?

Mark 7:20-23

20Cule Jesuh in, “Mi a baaltertu ngaingai cu a sunglam ihsin a suakmi an si. 21Ziangah tile ṭhatlonak a tuahtertu ruahnak ṭha lo pawl cu minung sunglam ihsin a suakmi an si: nupa sualnak, rukruk, mithah, 22ṭaangṭawm sualnak, duhham, thil siava dangdang tuah, mibum, a mawi lo zetmi thilsual tuah, iksiik, misimsiat, puarthau le aat-thlakza thil tuahnak, 23hi thil siava pawl hi minung thinlung sung ihsin a suakmi an si ih hi pawl hin mi an baalter a si,” tiah a ti.

·Ziangmi in mi thianghlo, mi borhhlawh ah in canter-lenglam hmuh theih mi maw, sunglam hmuh theih lo mi?

·Nupa sualnak, rukruk, mithat, taangtawm sualnak, duhham, thil siava dangdang tuahnak, (lewdness) pawl hi ziang an si?

1 John 2:16

16Leilung ta a si mi thil hmuahhmuah: sualnak tisa in a hiar mi, milai in an hmuhmi le an duhmi thil, minung in hmaihngal porh awknak ih an ruahmi thil hmuahhmuah hi pakhatte hman Pa hnen ihsin a rami an si lo. A zatein leilung ihsin a rami an si ṭheh

·Sual duhnak Pathian hnen ihsin a ra mi asi maw?

·Ruahnak duhnak sual pawl khui ihsin an ra suak?

MIZIA

Romans 13:13-14

13Sun khawvang ih a ummi kan si bangtuk in kan nun ziaza cu mawiter thlang uhsi: awn-au ceelceel le zuri sabah in um hlah uhsi; nupa sual tuah le zoh mawi loin um hlah uhsi; sual aw le nahsiik aw khalin um nawn hlah uhsi. 14Kan Bawipa Jesuh Khrih kha ralthuam vekin hruk uh; tisa duhnak le hiarnak pawl cu bansan thlang uh.

·         Ziangtin nung ding kan si?

·         Ziangvek nuncan ziaza nei ding kan si?

·         Kan tisa duhnak a di kan riamter ding maw? Ziangpawl kan hrial in kan thither ding?

Acts 15:29

29Milem biaknak rawl nan ei lo pei; sathii nan ei lo pei; hngawngrek-ih thahmi sa nan ei lo pei; cule nupa sualnak nan tuah lo pei. Himi pawl tuah loin nan hrial thei a si ahcun a ṭha thluh ding. Damte in um hram uh,” tiah an ngan.

·         Leitlun mi zumlotu pawlin an tuah mi ziang kan hrial a tul?

1 Corinthians 5:1-2

1Khawvel mi pawl hmanih ningzakza an timi nupa sualnak le hurnak cu nan lakah a um an ti ka thei. Mi pakhat tla cu a nu-ei thawn an pawl-aw tiah in sim. 2Nanmah cu nan va puarthau hrih lai sapbai! Riahsia in um ding nan si sawn lo maw? Cubangtuk milai cu nan bu sung ihsin nan suah dingmi a si.

·         Korin khua ah ziangvek nupa sualnak pawl a um?

·         Paul in ziangtin tuah ding ti a sim?

Ephesians 5:3-5

3Pathian minung nan si ruangah nupa sualnak, zoh mawi loih nunnak le hamṭamnak pawl cu nan lakah a rel hman rel nawn hlah uh. 4Ṭong borhhlawh, ṭongsia le zahmawh ngainuam lo ṭong pawl cu nan ṭong dingah a mawi nawn lo. Cuhnakin Pathian hnenah lungawinak sim sawn uh. 5Nan theihfel dingih a ṭulmi cu: nupa sualnak a tuahtu, zoh mawi loih a nungtu le hamṭam pawl cu (hamṭam besia cu milem biak thawn a bang awk ruangah) Khrih le Pathian Uknak sungah covo an nei lo ding.

·         Khrihfa zumtu pawl karlakah nupa sualnak thawn a pehparmi ziangvek pawl hrial ding asi?

·         Pathian fate pawl hrangah nupa sualnak tuahtu lakah tel a thiang maw?

·         Nupa sualnak thawn pepar in fimkhur ding pawl: tongkam, rualpi pawlkom mi thu Paul in ziang a sim?

·         Zo pawl cu vancungramah an lut loding tiah a sim?

Matthew 5:27-28

27“Ṭaangṭawm sualnak nan tuah lo pei, an ti ṭheumi nan thei. 28Asinain kei cun: nunau kha hahio mit in a zohtu cu a thinlung in cu nu thawn ṭaangṭawm sualnak a tuah zo, tiah ka lo ti.

·         ZOhmen ah a sual maw?

·         Thinlung cakhiarnak thawn zoh tikah Zisu in ziang a sualzo a ti?

·         Asile Online, TV, video, internet ah zoh cu a sual maw?

·         Nunau in mipa cakhiarnak thawn zoh khal a sual ve ding maw?

James 1:27

27Pathian kan Pa in a taktak le a thiangmi biaknak ih a ruahmi cu: farah zonzai le nuhmei an harsatnak le an tuarnak ah ṭhatein kilkhawi le khawvel sualnak sungih buahcihter aw lo dingin mah le mah fingkhawi awk kha a si.

·         Pathian mithmuh ah biaknak nung nei dingin ziang in sim?

·         Khawvel sualnak sung ihsin buahciih ter lo ding cu ziang a sim duhnak asi?

Job 31:1

1Sual duhnak thawn fala zoh lo dingah siatcam in thu ka kam zo.

·         Job in a khawruah thianghlim dingin ziang a tuah?

·         Bulpak thutiamkam awknak thawn tum taktak a tul maw?

Galatians 6:7-8

7Nangmah le nangmah bum aw hlah. Zokhal in Pathian an dekcok thei lo. Milai cun an tuhmi vek cekci in an khawm ding. 8Tisa duhnakih a tuhtu cun thihnak a khawm ding; Thlarau duhnakih a tuhtu cun kumkhua nunnak a khawm ding.

·         Tisa duhnak ih a tuhtu cu zo an si?

·         Tisa duhnak ih ukmi si cingin kiangkap minung, le Pathian kan bum thei maw?

·         Tisa duhnak ih ukmi cu ziang an tawng ding?

Rome 8:12-13

12Curuangah ka u le ka nau tla, minung kan sinak daanih duhzawng in nung ding kan si lo. 13Minung nan sinak daan duhzawng ih nan nun a sile nan thi ding; sikhalsehla sualnak nan tuah ṭheumi pawl kha Thlarau bomnak in nan thah a sile nan nung ding

James 4:7

7Curuangah Pathian duhnak a thluntu si uh. Satan kha do uhla a tlan mai ding.

·         Satan do timi cu ziang asi?

·         Satan kan do tikah ziang a cang ding?

·         Pathian duhnak thlun timi ziang asi?

·         Pathian duhnak kan thlun tikah ziang kan hrangah a thatnak?

A Man

Romans 1:18-32

18Pathian ih thinhengnak cu minung sualmawhnak le ṭhat lonak hmuahhmuah parah vancung ihsin a rung lang; cuih minung ṭhat lonak cu thudik theih thei lonak dingih dawntu an si. 19Curuangah Pathian ih hremnak an tong; ziangah tile Pathian Amah in a fianter zo bangin minung ih Pathian theih theinak cu fiang zetin a lang a si. 20Pathian in hi leilung a sersiam thok ihsin hmuh theih lomi a nunzia siseh, kumkhua ih a neihmi huham le Pathian a sizia siseh, fiangtein hmuh theimi an si. Pathian ih thil tuahmi pawl parah hmuh theih an si. Curuangah zokhal in puhmawh ding an nei lo. 21Pathian cu an thei ko; sikhalsehla upat hmaizah tlak a sinain upat hmaizahnak an pe lo; a parah lungawi thu khal an sim lo. An ruahnak sawn kha thulolak ah a cang ṭheh ih an thinlung kawlawngpi cu thimnak in a khat. 22Kan fim an ti aw nain an aa a si. 23Kumkhawnung Pathian bia sawn loin a thi theimi minung le vate le ramsa le a bokih a vakmi ramsa pawl vekih tuahmi zuk sawn kha an biak. 24Curuangah cubangtuk minung pawl cu an thinlung ih an hiarmi thil ningsinza hurnak pawl tuah dingah Pathian in kham duh loin a thlahthlam. Cule pakhat le pakhat parah ningzakza thil an tuah aw. 25Pathian ih thudik thuhla cu thuphan in an thleng; Siamtu Pathian bia loin le rian loin siammi thilri sawn an rian ih an biak. Siamtu sawn kha kumkhua in thangṭhat ding a si. Amen.

26Hi thil an tuah ruangah Pathian in minung cu ningzakza a si mi an taksa hiarnak thlun lawlaw dingin a hnonta hai. Nunau hmanin nunau an sinak thil a daan vekih hmang loin cin le daan nei loin nu le nu an sualpi aw. 27Cuvek thotho in mipa khal in nunau thawn pawl awk daan an tlansan ih an taksa hiarnak ruangah mipa le mipa an sualpi aw. Mipa in pakhat le pakhat cubangtuk ningzakza thilsual an tuah ruangah an thilsual tuah ruangih an hlawhman cu an parah a thleng. 28Hi minung pawl in Pathian theihnak ngaingai cu an thinlung sungah caamter an duh lo ruangah thinlung borhhlawhnak thlun lawlaw dingin Pathian in a hnonta hai. Curuangah tuah lo ding thil pawl kha an tuah. 29Annih cu siatnak le ṭhat lonak a phunphun, hamṭamnak le sualralnak a phunphun in an khat; nahsiiknak, mithahnak, sualawknak, mi bumnak le depdet hrokhrawlnak tla in an khat. An kaa a tam ih, 30pakhat le pakhat an relsia aw. Pathian mitkem zawng in an nung, an hngal, an puarthau, anmah le anmah an porh aw, ṭhat lonak tuah dingah lamzin a phunphun an hawl, an nu le an pa thu an ngai lo; 31a ṭha le a sia thleidan thiamnak thinlung an nei lo, an thukam mi an thlun dah lo ih midang hrang zaangfahnak le zawnruahnak zianghman an nei lo. 32Hi bangtuk ih a nungmi pawl cu thi tlak hrimhrim an si, tiih Pathian daan pekmi a um ti tla an thei ko. Cuih tlunah hibangtuk thil ṭha lo anmah in an tuah lawng si loin midang in an tuah tik khalah an lungkimpi a si.

·         Pathian thudik theihthei lonak cu ziang asi? (c. 18)

·         Pathian in amai thu cu milai theih dingin a langter maw? (c.19)

·         Pathian thangthat le lungthu sim hnakin leitlun mi pawlin ziang an tuah? (c. 21-23)

·         Nupa sualnak ziangvek an tuah ih Pathian an dodal?

·         Satan in nupa sualnak tuah dingin ziangtin in bum?

·         Pathian be lo, rian lo in ziang an bia ih an rian? (c. 25)

·         C. 26, 27 nakah “Pathian in a hnonta hai” timi ziang asi?

·         Hi minung pawlin ziang an tuah? (c.28)

·         Pathian ralrin peknak ziang asi?

1 Corinthians 5:9-11

9Nan hnenih ka rak nganmi ca sungah nupa sualnak tuah ih mi sualral pawl thawn kom aw hlah uh, tiah ka lo sim zo. 10Cuti ka lo ti hai tikah khawvel mi: mi sualral pawl, hamṭam pawl, rukru pawl le milem bia pawl kha kom hlah uh, ka ti duhmi a si lo. Annih pawl thawn kom awk lo ding ti a si ahcun hi leilung hi nan taansan lawlaw a ṭul ding a sisi! 11Zokhal zumtu ti aw sii ih nupa sualnak tuahtu pawl, hamṭam pawl, milem bia pawl, mi thangsiat duh pawl, zuri pawl le rukru pawl ka ti duhnak a si. Cubangtuk mi sualral pawl thawn cun rawl ei dingah a to hman to tlang hlah uh.

·         Paul in zo pawl kha kom lo ding a ti? Ziangruangah?

·         Khrihfa ti aw si, nupa sualnak a tuahtu pawl na kiangkap ah zo an um, ziangtin na tuah ding?

1 Corinthians 6:9-11

9Miṭha lo cun Pathian Uknak a co thei lo ding, ti cu fiang zetin nan thei ko. Nanmah le nanmah bum aw rero hlah uh: nupa sualnak a tuahtu, milem a biatu, ṭaangṭawm sualnak a tuahtu, mipa hlawhhlang ṭuantu, nunau le nunau, mipa le mipa sualnak a tuahtu, 10rukru, hamṭam pawl, zuri le mi thangsiattu pawl le suamhmang pawl, cubangtuk pawl cu Pathian Uknak an co thei lo ding. 11Mi hrekkhat cu cubangtuk minung nan rak si. Sikhalsehla nannih cu sualnak ihsin thiantermi nan si zo; Pathian hnenih apmi nan si zo; Bawipa Jesuh Khrih le kan Pathian ih Thlarau thawngin Pathian thawn remtermi nan si zo.

·         Nupa sualnak a tuah tu pawl vancungram an lut ding maw?

·         Zozo pawl vanram an thleng lo ding tiah a ngan?

·         Cuvek sualnak a rak tuahdah tu pawl kha ziangtin vanram an thleng sal thei ding? (c.11)

Galatians 5:19-21

19Cule minung tisa ih a tuahmi pawl tla cu a langfiang ko: nupa sualnak, a thiang lomi ziaza, a mawi lomi thil tuahnak, 20milem biaknak le dawi le cam tla hi an si. Pakhat le pakhat ral awknak le sual awknak, iksiiknak le thinhengnak, tawh awknak, hamṭamnak le rem aw loin ṭhenṭhek awknak; 21nahsuahnak, zuritnak, zoh mawi loin laam le awn-aunak le hi bangtuk a dangdang tampi an tuah vivomi pawl hi an si. Ralrinnak thu hmaisa ih ka lo sim zo vekin ka nolh sal ding: cubangtuk a tuahtu pawl cu Pathian Uknak an co thei lo ding.

·         Tisa sual mizia ih a rahsuahmi pawl ziang an si?

·         Tisa sual mizia duhnak vekin a nungtu pawl vanram an kai ding maw?

Jude 7

7Cuih vancungmi vek thothoin Sodom le Gomorrah khua le a kiangkap khua pawl in nupa sualnak an tuah ih an tisa hiarnak an riamter ti kha hngilh hlah uh: annih pawlih kumkhua meisa ih hremnak an tuarmi kha mi hmuahhmuah hrangah ralrin peknak a si ti a fiang a si. *1:7 Seem 19:1-24

·         Nupa sualnak a tuahtu Sodom le Gomorrah pawl ziangtin hrem an si?

·         Tuisan ah nupa sualnak a tuahtu pawl ziangtin hrem an si ding?

Revelation 21:7-8

7Nehtu hmuahhmuah in himi hi an co ding. An Pathian ka si ding ih annih cu ka faale an si ding. 8Sikhalsehla ṭihhrutmi, zumnak baansantu, fihnungza tuahtu, mi a that hrimtu, nupa sualnak a tuahtu, dawithiam pawl, milem a biatu le thuphanpertu pawlih umnak ding hmun cu kaat meilipi sungah a si ding ih cumi cu voihnih thihnak a si,” tiah i ti.

·         Nupa sualnak a tuahtu pawl hrangah zianghmun retsakcia in a um?

·         Pathian in zo pawl si “ka fale pawl” a ti ding mi?

Revelation 22:14-15

14An hnipuan fai zetin an sawp ih nunnak thingkungih rah ei theinak thu le khawpi sungah kotka ihsin luh theinak thu a neitu cu mi lungawi an si. 15Sikhalsehla uico bangtuk in a nungmi, dawithiam pawl, nupa sualnak a tuahtu, mi a thattu pawl, milem a biatu pawl le an ṭong in siseh, an tuahnak in siseh, thuphanper pawl cu khuapi lengah an um ding.

·         Zo pawl si nunnak thingrah ei in vancung ram khawpi sungah a luttu ding pawl?

·         Nupa sualnak tuah rero cingin Pathian in amai umnak vancung ram khawpi sungah in lutter ve ding asi tiah ruahsannak neih mi cu a dik maw, mahlemah bum awknak asi maw?

·         Zo pawl si khawlengah a um ding pawl?

1 Corinthians 10:6-10

Hi hmuahhmuah hi kan hrangih zohṭhim dingah an si: Anmah bangtuk in thil ṭha lo duhih kan um ve lonak dingah le, 7mihrek khat in milem an biak bangtuk ih biak ve lo dingah ralrinnak in petu an si. Ca Thianghlim in, “Cuih minung pawl cu zu le sa thawn an laam ih an nuam aw ciamco,” a ti. *10:7 Suah 32:6 8Mi ṭhenkhat pawl in nupa sualnak an tuah bangin tuah ve ding kan si lo; cuti an tuah ruangah ni khat sungah minung thawng kul hluan thum an thih kha! *10:8 Mipum 25:1-18 9Mi ṭhenkhat in Bawipa cu an hniksak bangtuk in kannih in kan hniksak ve ding a si lo; cutiih an ti ruangah rul in a cuk that hai a si. *10:9 Mipum 21:5-6 10Mi ṭhenkhat an phunzai ciamco bangtuk in kannih kan phunzai ve ding a si lo; cutiih an phunzai ruangah Siatsuahtu Vancungmi in a siatsuah thluh hai a si.

·         Nupa sualnak tuahtu pawl parah ziang a thleng, ziang an cang?

·         Nupa sualnak tuahtu pawl parah a thleng mi pawl hi a luan tuk maw?

Hebrews 13:4, 4Ṭhitawknak cu zokhal in upat hmaizah ding a si. Nupi le pasal cu zumtlak in um veve haiseh. * 13:4 Nupi le pasal cu zumtlak in um veve haiseh: timi hi Grik ṭongfang ih leh ahcun, Ihkhun cu thianghlim seh ti a si. Nupa sualnak a tuahtu le ṭang ṭawm sualnak a tuahtu pawl cu thu ṭhennak an tong ding.

·         Ziangtin nupi pasal neih awknak kan thainghlim ter ding?

·         Ihkhun thianghlim ter timi cu ziang asi?

·         Nupa sualnak a tuahtu pawl parah ziang a thleng ding?

KAN TAKSA

1 Corinthians 6:13

13Mihrek in, “Rawl cu pumpi hrangah a si ih pumpi cu rawl hrangah a si,” nan ti; a dikzet. Sikhalsehla a pahnih in Pathian in a cemter ding. Nan ruangpum cu nupa sual tuahnak ah hman ding a si lo, Bawipa ih hnaṭuannak hrangah hman ding a si sawn; Bawipa khal cu ruangpum hrangah a si.

·         Kan ruangpum cu ziang hrangah asi, ziangtin kan hmang ding?

Rome 12:1-3, a nungmi raithawinak vekin Pathian hnenah pek ding asi.

1 Corinthians 6:18-20

18Nu le pa sualnak kha hrial uh. Sualnak dangdang cun milai taksa hi a siatsuah tuk lo; sikhalsehla nu le pa sualnak a tuahtu cun amah ih taksa par hrimhrim ah sualnak a tuah a si. 19Nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathian ta nan si. 20Man pek ih leimi nan si. Curuangah nan taksa cu Pathian sunlawinak ah hmang uh.

·         Nupa sualnak cu kan nitin nunah kan hrial maw?

·         Nupa sualnak a tuahtu in zo an siatsuah?

·         Khrihfa zumtu kan sungah zo a nung?

·         Khrihfa zumtu pawl taksa ruangpi cu zo ta asi?

·         Kan taksa ruangpi cu ziang tuahnak ah kan hmang ding?

SIR AWKNAK

2 Corinthians 12:21

21Nan hnen ka ra thlen sal tikah hin ka Pathian in nan mithmuh ah ningzak in i tuah ding ti ka phang; cutin kan dunglam caanih sualnak a tuahtu pawl, thil borhhlawh a phunphun, tisa hiarnak le nu pa sualnak an tuahmi sir awknak an neih lo ruangah ka ṭap rero ding ti ka phang a si.

·         Paul in Korin khua zumtu pawl thu ah ziang a phang?

·         Korin khua zumtu sualnak a tuahtu pawlin ziang an tuah a tul?

Revelation 9:20-21

20Hi minung siatsuahtu phunthum in a thah ngah lomi minung pawl cun anmah ih tuahcopmi thil kha an tlansan cuang lo. Khawsia an biaknak, sui le ngun le daar le lungto le thing in tuahmi, a hmu thei lo, a ṭong thei lo, a feh thei lo an kutih tuahcopmi milem pawl an biaknak an baang cuang lo. 21Culawng si loin mi an thahnak, dawi an hmannak, nupa sual an tuahnak le ruk an ruknak pawl cun an sir cuang fawn lo.

·         Pathian ih hremnak pawl an hmuh hnu khalah nupa sualnak an tuah mi ihsin a sir aw dah lo tu ding pawl an um maw?

Revelation 2:14

14Sikhalsehla na parah lungkim lonak malte ka nei: nanmah lakah Balaam thuzirhnak a thluntu mi ṭhenkhat an um. Milem hnenih pekmi rawl einak le nupa sualtuahnak in sualnak sungih Israel mi pawl luhpi dingah Balaam in Balak kha a rak fial

·         Himi kawhhran hnenah Pathian in ziang a duh lo mi a um?

·         Himi kawhhran in ziang an tuah a tul?

Revelation 2:20-21

20Asinain ka lo mawhthluknak pakhat a um: Pathian ih thlahmi profet ka si a ti awtu nunau Jezebel na zawi-eet theinak hi a si. Jezebel in ka minung pawl a hruaisual ruangah nupa sualnak an tuah ih milem hnenih pekmi rawl tla an ei. 21Thinlung sir awknak tikcu ka pek, a sinain a nunsualnak lamzin ihsin a kir duh lo

·         Thyatira kawhhran ah ziang a cang?

·         Himi nu cu zirhnak a neih mi ihsin a sir aw maw?

MIZIA HLUN LE THAR

Colossians 3:5-10

5Nan sungih hna a ṭuantu leilung pumsa duhnak: nupa sualnak le zoh mawi lo nuncan, taksa hiarnak le hurnak le hamṭamnak pawl tla cu nunter nawn hlah uh. (Hamṭamnak tla cu milem biak phunkhat a si.) 6Hi bangtuk in thilsual an tuah ruangah Pathian thinhengnak cu cutiih a thu a thlun lotu pawl parah * 3:6 A thu a thlun lotu pawl parah, timi hi kutngan cabu hrekkhat ah a um lo. a ra thleng ding. 7Tuih hlanah cun nanmah hrimhrim tla hi cubangtuk taksa duhnakih ukmi nan rak si ih tisa hiarnak sungih a nungmi nan rak si. 8Sikhalsehla atu-ah cun cubangtuk taksa duhnak cu nan hlonfai ṭheh a ṭul: thinhengnak, aithawhnak le mi mitkemnak pawl cu hnong thlang uh. Mi hmuhsuamnak ṭong siseh, ṭongsia siseh, nan kaa sungin nan suahter lo pei. 9Nan nun hlun nuncan ziaza cu nan phuak zo ruangah pakhat le pakhat bum aw nawn hlah uh; 10cule nun thar ziaza nan hruk aw zo ih cuih nun thar cu a siamtu Pathian in amah ih hmuihmel keng sinsin vivo dingin cat loin a tharter ringring. Cutiih a tharternak cu amah famkim zetih nan theihsuaknak ding hrangah a si.

·         Pathian thinhengnak ziangruangah a thleng ding?

·         Ziang kan thither, thah tul mi  a um? Thihter timi cu ziang asi?

·         Ziangmi pawl an tawpter a tulmi?

·         Mizia thar thawn ziangtin kan nung thei ding?

2 Peter 2:17-22

17Hi minung pawl cu a caarmi cirh le thlisia in a semmi khawdur bangtuk an si. Pathian in an hrangah a thuk bik khawthimnak hmun timtuah ciain a ret zo. 18Puarthaunak le ṭong ṭha lo an ṭong; sualpalhnak sung ihsin a ra luat pekmi pawl sualnak thang-ih awk sal dingah an taksa hiarnak kha an hmang. 19Mi an tiamkammi cu luatnak a si, sikhalsehla anmah rori cu mi siatsuahtu ziaza ṭha lo ih sal an si; ziangah tile minung cu thil ziang khal in a neh ahcun cuih a nehtu thil ih sal a si. 20Kan Bawipa le Runtu Jesuh Khrih pumpak in an theihnak ruangah hi leilung borhhlawh sualnak sung ihsin an luat ih cutiih an luat ngah hnuah cuih borhhlawh sualnak in a thlem sal ih a kaihtaar ngah ahcun a hmasa hnakin a neta deuh cu a besia sawn a si. 21Dingnak lamzin an theih hnuah le thukham thianghlim an hnenih pek a si hnu ih an pialsan hnak cun ziang hman thei lo lawlaw in rak um haisehla an hrangah a ṭha sawn. 22Hi bangtuk in an parih thil a cangmi in, “Uico cun a luak a ei sal,” tile, “Vok cu kholh hnu hmanah ciarbek sungah a bual aw kiir sal,” *2:22 Thufim 26:11 tiih ṭongṭhimnak hi a dik a si ti a langter.

·         Sualnak thangah awksal dingin ziang an hmang?

·         Zumtu pawl sualnak ah a hruaikirtu pawl hrangah ziang retsakcia asi? (c.17)

·         Sualnak sungah a kirsaltu pawl dinhmun ziang a sim? (c. 20-22)

NUN THIANGHLIM

1 Thessalonians 4:3-8

3Pathian in nannih cu nupa sualnak tuah hrimhrim loin thianghlim dingah a lo duh. 4Mipa pawl, nan nupi thawn * 4:4 Nupi thawn: timi hi nan taksa ti tla in leh a theih. thianghlim le zoh mawi in um uh; 5Pathian thei lo khawvel mi bangin taksa hiarnak thlun in nung hlah uh. 6Hi thu-ah hin Khristian nan unau pawl hmuhsuam in zawmtai hlah uh. Hi bangtuk cu tuah lo dingah kan lo sim zo ih atu-ah napi in ralrinnak kan lo pe: hibangtuk a tuahtu pawl cu Bawipa in a hrem ding. 7Pathian in nupa sualnak tuah dingah in ko lo, thianghlim dingah in ko sawn a si. 8Curuangah hibangtuk thuzirhnak a thlun duh lotu cu minung ih thu a el a si lo, Thlarau Thianghlim a lo petu Pathian ih thu a el a si.

·         Pathian duhmi ziang a si? (c. 3-4)

·         Pathian in ziangvek in nung dingah in ko?

·         Himizirhnak pawl a hnongtu in zo an hnong?

Hebrews 12:14-16

14Mi hmuahhmuah thawn rualremte in um zuam uhla nunnak thiangin nun tum uh, ziangah tile nunnak thiang neih locun zohman in Pathian an hmu thei lo ding. 15Pathian lainatnak kha zohman in siipsan lo dingin ralring uh. A sia a khami thingkung, a hung tum ih a tur ṭha loin mi tampi zonzaihnak a pek bangtuk cu zohman si hlah uh. 16Nu le pa sualnak tuah hlah uh; thlarau lam zianghman a siar lotu Esau bangtuk si hlah uh; anih cun fa upa rocotu sinak kha rawl voikhat ei-ah a zuar hlo meen a si.

·         Nun thianghlim nun kan nunpi lo ahcun Bawipa kan tawng ngah ding maw?

·         Mi zokhal an nitin nundan pawl cu khum theh asi dingih an nundan parah zo in lai a rel ding?

1 Peter 4:3-5

3Pathian awi lo khawvel pawlih tuah an duhmi thil kha tikcu tawk fang nan rak tuah ve zo. Nan nunnak cu zoh mawi lo nunnak, taksa diriamnak, zuritnak, nun nuamin nupa sualnak, ei le in in puaituah nomnak, le fihnungza milem biaknak ah nan hmang zo. 4Atu-ah cun Pathian awi lo khawvel pawlih ziang hman suupnak nei loin an nunnak ah nan tel nawn lo tikah nan parah an khuaruah a har ih an lo sulh ciamco a si. 5Sikhalsehla annih cu minung le mithi thuṭhentu ding Pathian hmaiah an nun daan an phuang aw leh ding.

 Mi zokhal zo hmaiah an nundan an phuang aw leh ding?

The Progression

Ephesians 4:17-19

17Bawipa ih hmin in nan hnenah ralrinnak thu ka sim duh: Khawvel mi bangin nung nawn hlah uh. Annih pawlih ruahnak cu thulolak a si ih, 18an thinlung cu a thim. Pathian ih pekmi nunnak sungah covo zianghman an nei lo, ziangah tile zianghman theihmi an nei lo ih an thinlung a ruh remrem. 19Ningzah khal an thei nawn lo. Sualnak sungah an paih aw ih suup awknak zianghman nei loin zoh mawi lomi thil a phunphun an tuah.

·         Khawvel mi pawl cu ziangtin an nung?

·         Nung thianghlim loin an nun tikah ziangtin an nung pehzawm vivo? (c. 19)

James 1:13-15

13Cubangtuk hniksaknak cu mi in an ton tikah, “Pathian in i hniksak a si,” tiah zohman in ti hlahseh. Ziangah tile Pathian cu sualnak in a hniksak thei lo ih amah khal in zohman a hniksak hai lo a si. 14Sikhalsehla minung cu sualforhnak a ton tikah amah ih taksa hiarnak in a thlem ih thang vekin a awh ṭheu. 15Taksa hiarnak in fa bangih a vunmi le a hrinmi cu sualnak a si; cule sualnak cu a ṭhang ih rah a rah tikah thihnak a suahter.

·         Pathian in minung  athlem maw?

·         Milai cu ziangin thlem an si a ti?

·         Sualnak, Pathian thu vekin nunlo tikah a tawpnak ziang asi?

·         Kan nitin nunah Pathian hmaiah kan sual kan sir aw taktak asi ahcun kan mit in kan zoh mi, hna in kan thei mi le kan kaa in kan tong mi pawl a thianghlim lomi kan sunzawm vivo thei ding maw?

·         Satan in nula sualnak tuah dingin a lo thlem thei dingin ziangvek hmanrua pawl na nitin nunah  a um? Tv. Internet, smart phone, ipod, tvp?

Thunetnak:

1 Corinthians 10:13 Hniksaknak nan tonmi pawl hi midang hnen khalah a thleng ṭheumi sualforhnak a si ko. Sikhalsehla Pathian cun a thukammi a kimter ih nan tuar thei lo ding tiangin hniksaknak a thlenter lo ding. Hniksaknak nan ton tikah nan tuar theinak dingah thazaang a lo pe ding ih cuticun nan luatnak dingah lamzin a lo sial sak ding.

2 Timothy 2:22. Na nolai taksa hiarnak cu tlansan awla thinlung thiangin Bawipa ih bomnak a diltu pawl thawn hmun khatah dingnak, zumnak, duhdawtnak le daihnak ngah dingah napi in zuam aw.

1 Thessalonians 4:1-8.1A netnak ah u le nau tla, Pathian duhzawng ih nan nun theinak dingah ziangtin nun ding a si ti cu kan hnen ihsin nan zir zo. Cuvek ih nan nun thei sinsinnak dingah Bawipa Jesuh hmin in kan lo forh a si. 2Ziangah tile Bawipa Jesuh hnen ihsin a rami thupekmi vekin kan lo zirhmi a si cu nan thei. 3Pathian in nannih cu nupa sualnak tuah hrimhrim loin thianghlim dingah a lo duh. 4Mipa pawl, nan nupi thawn * 4:4 Nupi thawn: timi hi nan taksa ti tla in leh a theih. thianghlim le zoh mawi in um uh; 5Pathian thei lo khawvel mi bangin taksa hiarnak thlun in nung hlah uh. 6Hi thu-ah hin Khristian nan unau pawl hmuhsuam in zawmtai hlah uh. Hi bangtuk cu tuah lo dingah kan lo sim zo ih atu-ah napi in ralrinnak kan lo pe: hibangtuk a tuahtu pawl cu Bawipa in a hrem ding. 7Pathian in nupa sualnak tuah dingah in ko lo, thianghlim dingah in ko sawn a si. 8Curuangah hibangtuk thuzirhnak a thlun duh lotu cu minung ih thu a el a si lo, Thlarau Thianghlim a lo petu Pathian ih thu a el a si.

Credit goes to: Jerry and Lynn Jones