Hlen
in um lonak dingah Zisuh nih a cawnpiak hmasa bik hnaning cu amah sinin sui
thiang, mei in tit i thianter cangmi kha cawk ding ti a si. “Biathlam 3:18”
Sui thiang cu thil dang aa cawh
lo caah a nem i kuaih khawh a si. thil dang he aa cawh belte ah a hak i kiah a
fawi ve. “Kannih zumtu zong kan nunnak ah sui thiang bantukin kan thian lo a si
ahcun kan nunnak hi hman aa tlak lomi zoh dawh lo hmawntaam men le kiah a
fawimi kan si ve ko lai. Kan nunnak hi hmantlak mi le zoh dawhmi le kiah khawh
lo a thianghlim mi nun kan si khawh nakhnga ding caah Pathian bia thiang hi kan
nunnak in i cawk hna u sih”
A thiang mi nunnak le thinlung put cu
zeitluk in dah a tthat ti ahcun, “A thianghlimmi lungthin le nunnak cu a nem i,
chimhhrin le cawnpiak a fawi, hman a tlak i zoh a dawh zungzal, mi nih hmuh le
ngeih an duh zungzal i cawk an duh zungzal, cun sui thiang taktak cu
zeitikhmanh ah a lo tlau ballo. A vaivuan ballo, a hmun zungzal i a rawk kho
ballo. Nihin zumtu hna zong kan nunnak hi Pathian sui thiang nunnak kan ngeih
lo a si ahcun kan nun a nem kho lai lo i chimhhrin le cawnpiak khawh an si lai
lo I, cu bantuk nunnak cu hmantlak lo zoh dawhlo zeirel lomi a rawkhrelmi le a
vaivuanmi kan si ko lai. Sui thiang taktak cu an hneksak tikah anih cu a rih i
ti cungah a vuan kho lo i a taangah a tang, sui thiang tak a si lomi cu ti
cungah an hneksak tikah an vuan i annih cu hlonh dih an si. Kannih zong Pathian
hmaikaa ah kan nunnak hi sui thiang bantuk a tak a si lomi kan si ahcun Pathian
nih a kan hneksak tikah a thiang lomi kha cu kan vuan lai i hlonh kan si dih ve
ko lai” cucaah zumtu na nunnak ka nunnak hi Pathian hmaikaa ah i chek tuah hna
u sih. Sui thiang bantukin kan nunnak hi kan thiang taktak ve hna maw. Pathian
biatak ah le kan zumhnak ah kan nunnak le kan thinlung put hi a thiang lo a si
ahcun hneksaknak le temtuarnak kan ton tikah kan ing kho te hna lai lo. Pathian
nih hin hi mipa hi minu hi zumtu hi a thiang taktak maw timi hi a kan hneksak
ve te lai. ‘Ngun cu somei chungah hneksak
a si bangin temhinnak mei chungah khan kan hneksak hna. Isaiah 48:10’ a ti.
Hi ti hneksak kan si tikah Pathian hmaiah sui thiang bangin kan thian lo a si
ahcun kan vaivuan dih te ko lai, Asinain Pathian hmaiah Pathian nih a kan duh
piakmi nun sui thiang nunnak kha kan i cawk kan ngeih a si ahcun sui thiang cu
a hmunh bangin kan hmun lai i hmantlak le zoh dawhmi kan si zungzal ko lai.
Zumtu hna hi kan nunnak le kan
zumhnak ah a tak maw tak lo ti hngalhnak ah hneksak dih kan si lai. Pathian nih
hin zumtu a fale hna hi taksa thinlung thlarau temtuarnak le harnak le
vansannak a phunphun in a kan hneksak vet awn. Cu a kan hneksaknak mei lin nih
cun kan nunnak le kan thinlung put le kan zumhnak i a thurhnawmmi le a thiang
lomi a tak a si lomi cirik bang aa seng chih cangmi vialte kha a chuahter khawh
dih hna. “Hi ruangah hin lung i lawm ko
u, hneksaknak tampi nan in ruangah hin atu ahcun nan ngaihchia hmanh sehlaw i
lawm ko u. Hneksaknak nan inmi cu nan zumhnak kha a tak maw tak lo ti hngalhnak
caah a si lai. Hrawh khawh a simi thil sui hmanh hi hneksak a hau, cucaah sui
nak in let tampi in a sung deuhmi nan zumhnak cu, hneksaknak kha chuak lakin a
in khawh nakhnga hneksak a hau ve. Cun Zisuh khrih a langh Ni ah cun
thangthatnak le upatnak le sunparnak khan an hmuh lai. 1 Peter 1:6-7” a ti.
Pathian sui thiang nunnak le zumhnak taktak kan i cawk a si i Pathian hmaikaa
ah sui thiang tak bantukin kan nun a si ahcun le hneksaknak chungin a chuak
khomi nunnak kan ngaih a si ahcun Pathian nih kan nunnak caah a rem a ti tikah
thangthatnak le upatnak le sunparnak kan hmuh lai. Haleluijah Bawipa min thangthat si ko seh.
Zumtu unau nihin na nunnak ah
duhthimnak phunhnih na ngei zeidah na thim lai. “1- Sui thiang a tak nunnak
maw” na thim lai. “2- Sui thiang lomi nunnak” dah na thim lai. Sui thiang lomi
a tak lomi nunnak na thim a si ahcun hnawmtaam thur bantukin na vaivuan lai i
hlonh sawh men na si ko lai. Asinain na nunnak ah Pathian duhmi nunnak sui
thiang khan a cawk a si ahcun na nunnak cu sui thiang takmi hmantlak mi le zoh
dawhmi mi zapi nih ngaih an duhmi le cawk an duh zungzalmi a rawk kho ti lomi a
hmunmi na si zungzal ko lai. “Pathian
sui thiang nunnak cu i cawk cio hna u sih.
Biatak cu va cawk law zuar ti
hlah. Phungthlukbia 23:23a” a ti.
Bawipa nih sunparnak co sehlaw, A
bia kan nunnak caah thluachuah ko seh.
Bawi khrihah
Evan. John Ceu Mang
Chin
Evangelist Ministry Tluang
Za Uk Group
A Fekmi Dirhmun
Sihmanhsehlaw Bawipa nih a chimmi cu hihi a si; “Zion ah hin a fek i a
tthawngmi inn hram ka ser lai. cu hram ahcun innkil lung, lung cang ka bunh lai
i cu lung cungah, zumhnak fek cu a lung zong a sau, tiah tial a si lai. Isaiah
28:16”
Pa fel nih cun ruahkhak hmasa loin
rian a tuan lo. zei thil paoh ruatkhat hmasa lo le tuaktaan hmasa loin lakruak
in ti le tuah a hmangmi cu dirhmun a fel lomi, palhnak tam ngeimi an si
zungzal. Cu bantuk minung cu tukforhnak le harnak an ton tikah fawi tein an tlu
zungzal. Simon Peter nunnak hi zoh hna hmanh u sih. “Zisuh nih a zultu hna kha, Mi fapa hi mi nih aho an ka ti dah, tiah a
hal hna. Matthai 16:13” a ti. “A
zultu hna nih cun an theihning cio in an leh lulhmalh. Zisuh nih a thawh than
hna i, Nannih tah tiah a hal ve hna. Matthai 16:15” a ti. Zisuh nih a halmi
hna bia cu hohmanh nih an leh kho tiin an hngal kho ti lo. “Zultu hna cu hi lio
ah hin lung awtawm nawm in aan kaa an i aan lai i an Bawipa cu an zoh theo laid
ah ka ti. Holh a ram ngai tawnmi kha atu cu an dai dup ko hna” zultu hna nih hi
biahalnak an tonmi hi an tuaktaan bal lomi a si tak ve men lai. Zisuh cu aphi
an pe kho bak lo.
Kannih Lai miphun zumtu khrihfa
hna hi tak kum 100 khrihfa kan tling cang kan i ti ve cang i kan nunnak ah
Zisuh nih kan dirhmun hi biahalnak kan tuah ve sehlaw, Zisuh hi bia kan let kho
ve in a kan hal duhmi aphi kan pe kho ve hnga maw? Zumtu khrihfa kum 100 a
tling ve cangmi nih kan nunnak le kan zumhnak ah kan dirhmun Zisuh nih bia a
kan halmi kan leh khawh lo aphi hna kan pek khawh ve lo a si ahcun kum 100
zumtu khrih kan si nak hi a poi tak lai i, kan nunnak le kan zumhnak ah a fekmi
dirhmun kan rak ngei lo tinak a si ko lai. Kum 100 khrihfa nih Zisuh biahalmi
hna kan leh khawh lo aphi kan pek khawh lo a si ahcun kan Bawipa Zisuh khrih hi
a ngaih a chia tuk lai ka ti. Unau kan nunnak le kan zumhnak kan dirhmun i chek
tuah hna u sih.
Zisuh cu thil a tuahmi paoh hi thate
le tlamtling tein tuah a hmang. Zultu hna nih cu biahalnak cu fekte le felte in
ruat ve hna seh ti a duh. An theihmi maw, an theihlomi zongah maw felte in ruah
le tuaktaan thiamnak cawnpiak a duh hna. Midang kongkau tuaktaan set loin an um
tawn pinah anmah hrimhrim nih an Bawipa kha mi zei set dah a si ti hi an
tuaktaan tuk bal lo. “Zisuh nih hin zumtu khrihfa hna hi fekte le dirhmun fekin
kan nun khawh nakhnga ding caah hin nitin an nunnak ah hin ka tuaktaan hna in
ka ruat zungzal hna seh ti hi a kan duh piakmi a si. Cu ruangah Zisuh nih zultu
hna kha bia a halnak hna cu a si. Kannih tah Zisuh hi nitin te kan nunnak ah
Zisuh cu a ka khamhtu le a ka dawtu ka Bawipa si tiah kan ruat hna in kan
tuaktaan bal hna maw? Zisuh khrih hi kan nunnak le kan zumhnak ah kan tuahtaan
set hna lo a si ahcun zeitikhmanh ah dirhmun fek kan ngei kho lai lo i kan
nunnak le kan zumhnak cu a zor duahmah lai i a donghnak ah kan nun le kan
zumhnak cu favai bangin a lotlau dih men ko lai. Asinain kan nunnak le kan
zumhnak in nifatin in Zisuh hi kan ruah kan tuaktaan zungzal a si ahcun kan
nunnak le kan zumhnak ah dirhmun fek in kan um lai i hnangam lawmhnak kan hmuh
zungzal lai” cucaah kan Bawipa Zisuh kong hi ruah zungzal hna u sih. “Bawipa nih kan bawm ko seh”
Zisuh nih bia a halmi hna cu a
donghnak ah amah Zisuh hnu a zul zungzalmi Zisuh zong nih a minkep ah ‘Peter
Lungtum’ tiah min a sakmi ‘Simon’ lawng nih aphi hman a pek khawh. Lungtum
Peter nih cun a thawh i, “A nungmi
Pathian Fapa, Mesiah khan a si. Matthai 16:16” a ti. Zisuh nih cun, “Johan fapa Simon, mi vantha ngaingai na si.
zeicahtiah hi biatak cu minung sinin na hngalhmi a si lo i, vancung ah a ummi
ka Pa nih an pekmi a si. Matthai 16:17” a ti. Zumtu hna nih kan Bawipa
Zisuh khrih kong hi kan nunnak dihlak kan thinlung dihlakin kan ruah kan
tuaktaan i a kan dawtnak kong le veel a kan ngeihnak kong hi kan i fiang kan
theih kan hngalh i kan i nun pi hi a kan duh piak zungzalmi a si. Cucu nun cu
dirhmun fek le zumhnak tthawng cu a si. “Peter cu Pathian a duh ngaingaimi pa a
si e a ti. Cucaauh Zisuh zong nih hin zultu dang vialte nak in bia a hal bik e
a ti. Peter nih Pathian kha a ngaingai bantukin a nunnak ah le a zumhnak ah aa
donghnak ahcun Pathian nih zumhnak tthawng le dirhmun fek in a hmuhnak cu a si.
Mah tiin zumhnak tthawng a ngaihmi ruangah Peter cu ti cung zongah Zisuh sinah
a va kal kho ve” Peter cu a zumhnak le a nunnak ah zumhnak tthawng le dirhmun
fek nun a ngeih caah le Zisuh kong kha a ruat i Pathian kha a duh ngaingai caah
a cungah Bawipa Zisuh aa lawm i a fekmi le a nganmi lungtum peter tiah min a
saknak kha a si. Kannih zumtu zong Peter bantuk a fekmi dirhmun min ngeih hi
kan nunnak le kan zumhnak nih a rak herh taktak mi a si.
Hi zumhnak dirhmun fek le nunnak
dirhmun fek kan ngeih khawhnak ding caah hin kan fimthiamnak le kan chawva a
herh lo. Peter zong kha Zisuh nih a halmi hna bia aphi a pe khawhmi kha a
fimthiam caah a si lo, ‘Pathian kha a duh ngaingai caah le zumhnak nun dik
taktak a ngeih caah le Zisuh kong kau le Pathian kongkau hi tibang in a haal
zungzal caah Pathian nih a pekmi laksawng a si a ti’ “1 Johan 2:27 ah, Khrih Thlarau nan chung i a um paoh ahcun ahohmanh
cawnpiaktu nan herh hna lo. zeicahtiah Thlarau nih cun zeizong vialte kha an
cawnpiak hna i an cawnpiakmi hna cu biatak a si, a hmanlomi a si lo” a ti.
Kannih zumtu zong zumhnak ah nunnak ah dirhmun fek le tthawng in Pathian sinin
a rami laksawng kan hmuh khawh ve nak ding ahcun Peter bangin kan zumhnak le
kan nunnak ah hin Pathian hi kan duh ngaingai ve ding le tihaal in kan haal ve
zungzal ding hi a si. Pathian cu kan duh ngaingai i tihaal in kan haal ve a si
ahcun khrih thlarau cu kan chungah a um ve lai i cu nih cun zeizong vialte cu
cawnpiak hau loin a kan theihhngalhter ve ko lai. Peter cu Zisuh nih a halmi
bia aphi a pek khawhnak le chimh cawnpiak hau loin thil a theihhngalh khawhnak
cu Pathian a duh ngai caah le Bawipa Zisuh kong a ruah a tuaktaan tawn caah a
chung lei nunnak ah Pathian thlarau nih a cawnpiak i fawi tein a theih khawhnak
cu a si a ti. Cucaah Peter cu Zisuh nih a fekmi dirhmun lungtum peter a tinak
cu a si. Peter cu a nunnak le a zumhnak ah fawite in a tlu kho ti lo, dirhmun
fek le zumhnak nun tthawng Pathian nih a pek. Kannih zong nitin kan nunnak ah
zumhnak nun tthawng le dirhmun fek kan ngeih si ahcun hi vawlei thlichia lakah
le tukforhnak ahhin fawite in kan tlu kho ve ti lai lo. “Bawipa nih kan bawm ko seh”
Zisuh nih Peter le a zultu vialte hna
sinah khan, “Pathian nih (a langhtermi
hngalhnak in) hi lung cungah hin ka khrihfabu ka derh lai i cucu thihnak hmanh
nih a tei kho lai lo, tiah a ti. Matthai 16:18” Zisuh nih hi lung cungah ka
khrihfabu ka derh lai a timi kha vawlei lung cung si lo, Peter zumhnak nun
tthawng kha a chim duhmi a si. Kannih Lai miphun zumtu khrihfa hna zong Pathian
kan zumhnak le kan i nunpi nak ahhin “Pathian bia cu a fekmi dirhmun” a si ti
hi i fiang ve hna u sih law kan zumhnak le kan nunnak hi thihnak hmanh nih a
tei khawh ti lomi zumhnak nun dirhmun fek tthawngmi si ve hna u sih.
Bawipa nih sunparnak co sehlaw,
Pathian nih a bia thluachuah ko seh.
Evan. John Ceu Mang
Chin Evangelist Ministry Tluang
Za Uk Group
