INTERNET CHUNGIN CRUSADE
The World Chin
Evangelist Ministry
Speaker : Evan. John
Ceu Mang
Nihin ah hi
ti bantukin a bia cawn kho dingin le a bia i hrawng kho than dingin lam a kan
hruai i caan ttha a kan petu le kan nunnak a hmang tu dawtu Pathian a min
thangthat si ko seh, Nihin a cawnmi le a reltu vial te Pathian nih
thluachuahnak in pe hna seh, Amen.
Thlacamnak-
Dawtnak in a khat mi ‘Ka Pa’ na min thangthat si ko seh, Atu ah na bia cawn kho
dingin le theih ngai kho dingin caan ttha na kan pek caah kan i lawm, Thiang
Thlarau in kan umpi law dawnkhaan tu vial te kan tei piak ko tiin le bawmtu
Thiang Thlarau sawm in na sinah thla ka cam Pathian, Amen.
Bible hram
thawk tein cawn piaknak kan thawk hna lai,
Cawnnak
pakhatnak- SERNAK KONG?
Sernak kong
hi minung ruahnak le thluak nih tuaktaan tikah tuaktaan khawh ding le ruah
khawh ding an rak si lo. Pathian thil ser le a tuah ning le thil um tu ning hna
hi ruah ahhin ruah cawk ding an si lo, Cucaah cun pei hla phuanhtu nih. “Bawipa
Pathian na tuahmi thil vialte hna hi ka ruah tikah ka lung nih a phan lo” a
tinak cu a si cu, zeiruangah dah mah ti hin hla phuanhtu nih a ti hnga ti hi
ruah tikah a ti awk hrimhrim a si ka ti, Keimah zong si ning law ka ti ve ko
lai. Zeicahtiah Pathian nih van le vawlei ah a sermi thil hi a hme bik in a
ngan bik tiang a tling lomi thil pakhat hmanh a um lo,
“Pathian
nih a thil sernak kong a dotdot in kan vun zoh tuah hna lai”
{1} Genesis 1:1.2- ah kan hmuhmi cu, “A hramthawk
ah, Pathian nih van le vawlei a ser hna tikah, ‘vawlei cu mui zong a ngei lo,
pungsan zong a ngei lo. Rilipi cu muihnak nih a khuh i ti cungah cun Pathian
tthawn cu aa cawk” a ti, Hi ti a ti tikah Pathian nih van le vawlei ser hram a
rak thawk ahhin van zong siseh, vawlei zong siseh, zeihmanh a rak um cia lomi
pungsan le mui sam zong zeihmanh a rak ngei lomi an si ti le muih nak lawng nih
a rak zel dih tinak a si lai cu, cu thil muihnak vialte cu Pathian nih a bia
kaa khat in ceunak hung um seh tiah a ti i ceunak cu- Genesis 1:3 chungah a
hung um, “Cun Pathian nih ceunak um seh,
tiah a ti i ceunak cu a hung um”. {1:4} ah, “Ceunak cu a zoh i aa lawm. Cun
ceunak le muihnak cu a then hna i” {1:5} ah, “Ceunak cu ‘Chun’ tiah min a sak i
muihnak cu ‘Zan’ tiah a ti” Hihi thil hi Pathian nih ni khatnak ni ah
vawleicung thil ah a ser hmasa bikmi cu a si.
{2} Genesis 1:6- ah kan hmuhmi cu, “Cun Pathian
nih cun, Ti le ti a tthentu hna ding caah aa kuaimi van pakhat in um seh law,
ti cu hmun hnih ah um seh, tiah a ti i cu tining cun a hung si” {1:7} ah,
“Cuticun Pathian nih cun van kuai cu a ser i a tang i a ummi ti le a cung i a
ummi ti cu a tthen hna; van kuai cu a min ah, ‘Van’ a sak” Hihi thil hi Pathian
nih ni hnihnak ni ah a ser mi thil cu a si.
{3} Genesis
1:9- ah kan hmuhmi cu, “Cun Pathian nih cun, Van tang i a ummi ti cu hmun khat
ah i pum hna seh law vawlei kha hung lang seh, tiah nawl a pek i cu bang cun a
hung si” Pathian bia bang cun Ti cu hmun khat ah a pumh hna i vawlei cu a hung
lang taktak, {1:10} ah, “Vawlei cu a min ah, ‘Vawlei’ tiah a sak i a pumhtermi
ti cu ‘Rili’ tiah a ti”. Pathian nih cu
thil a tuahmi cu a zoh tikah a lung a si a ti. Cun {1:11} ah, “Cun aa thawh i,
Vawlei cungah hin thingram a phunphun kho hna seh, a tlaimi kung hna le rawl a
phunphun thei a phunphun a vuimi rawlkung si hna seh tiah a ti i cu bang cun a
hung si” {1:12} ah, “Cucaah cun vawlei cungah cun thingram a phunphun an kho,
rawl a vuimi rawlkung hna le thei a tlaimi thingkung hna an si. Pathian nih a
tuahmi cu a zoh i a lung a si a ti” Hihi thil vialte hi Pathian nih ni thumnak
ni ah a ser mi thil cu an si.
{4} Genesis
1:14- ah kan hmuhmi cu, “Cun Pathian nih cun, Chun le Zan a tthentu ding le ni
le kum le caan kha zeitik in dah an i thawk cio ti hngalhtertu dingah van ah
khin ceunak um hna seh a ti” {1:15} ah, “Cu ceunak hna nih cun vawlei hi ceuh
hna seh, tiah a ti i cu bang cun a hung si taktak” Cucu ceunak Pathian nih van
ah um hna seh a timi cu zeidah an si ti ahcun, {1:16} ah, “Pathian nih cun
ceunak ngan pipi pahnih hi a ser hna, Ni le Thlapa a ser hna i Ni cu chun uktu
dingah a ser i Thlapa cu zan uktu dingah a ser; cun arfi zong khi a ser hna”
Cuticun Pathian nih ceunak ngan pipi pahnih le arfi a ser mi hna cu khoika dah
a chiah hna ti ahcun, {1:17} ah, “Ceunak hna cu van ah khin um hna seh law
vawlei hi run ceuh hna seh tiah a ti i van ahcun a chiah hna” {1:18} ah, “Chun
le Zan a uktu hna ding le ceunak le muihnak a tthentu dingah a chiah hna. A
tuahmi kha a zoh i a lung a si a ti” Cuticun nikaa le thlapa le arfi cu van ahcun
a chiah hna i vawlei cu an runh ceuh, “Nikaa cu chun uktu a si” i “Thlapa cu
zan uktu a si” Hihi thil vialte hi Pathian nih ni linak ni ah a ser mi thil cu
an si.
{5} Genesis
1:20- ah kan hmuhmi cu, “Cun Pathian nih cun aa thawh i, Ti nih hin thilnung phun
tampi a hrin hna lai i va hi thli lakah hin an zuang lai a ti i cu bang cun a
hung si taktak” cun {1:21} ah, “Cuticun Pathian nih cun rili chung i a ummi
sahrang ttihnung pipi le ti lak i a tlongmi thilnung a phunphun le va a
phunphun kha a ser hna. Cu vialte thilnung hna le sahrang ttihnung le a zuang
mi va vialte cu Pathian nih cun a bia in hung um hna seh tiah a ti i cu bang
cun an hung si taktak. Cun cu a tuahmi cu a zoh hna i a lung a si a ti. Cu a
tuahmi cu a lung a tling i cucaah, {1:22} ah, “Thluachuahnak a pek hna i, ‘Ti
chung i a ummi thilnung hi karh u law cun rili chung i a ummi thilnung hi karh
u law, va hi tampi in khat u’ tiah a ti hna” Cuticun Pathian nih a ser mi cu a
zoh tik hna ah a lung an lawmhter tuk i a ser mi thilnung vialte cu a hme he a
ngan he thluachuahnak a pek dih hna. Hihi thilnung vialte hi Pathian nih ni nganak
ni ah a ser mi thil cu a si.
Note,
Pathian nih vawlei le van le nikaa le thlapa le arfi le thingram le saram a
phunphun le thilnung vialte a rak ser mi hna hi kan zoh tikah amah Pathian lung
lawmhtertu thil lawngte an rak si dih hna. Cucu a cung lei Bible kan langhter
mi ah kan hmuhmi hna cu Pathian nih a bia in um hna ser tiah nawl a pek hna i a
bia in a ser mi thil vialte kha a ser dih tikah a ser mi cu a zoh hna i a lung
a si a lung a tling tiah kan hmuh zungzal. Cu nih a kan cawnpiak mi cu vawlei
thilnung vialte hna a hme he a ngan he Pathian lam kal tu lawngte an rak si i
Pathian lung lawmhtertu lawngte an rak si hna i Pathian nih amah sunparnak ca’h
lawngte ah a rak i ser ti hi a kan cawnpiak mi a si. Zei bantuk thil paoh hi
Pathian nih a sunparnak ding caah le amah lung lawmhtertu ding lawngte ah a rak
i ser hna ti hi a fiang. Cu ah ser mi thil vialte nih Pathian lung kan lawmhter
lo le a sunparnak kan langhter lo a si ahcun Pathian hi zei tluk in dah a lung
hi a fah hnga ti hi ruah awk a um ngaingai. Cu ahcun kannih minung zong a kan
ser ve.
{6} Genesis
1:24- ah kan hmuhmi cu le Pathian nih ni ruknak ni ah a ser mi cu, “Cun Pathian
nih cun, Vawlei nih hin inn zuat sattil a phunphun le ranlak saram a phunphun,
a hme he a ngan he hring hna seh a ti i a bia bang cun a hung si taktak” cuticun, {1:25} “ inn zuat sattil le ramlak
saram a phunphun cu a hme he a ngan he cun a ser hna. A tuahmi kha a zoh i a
lung a si a ti” cutin Pathian nih ni ruknak ahcun inn zuat sattil le ramlak
saram a phunphun cu a hme he a ngan he cun a ser hna i cu a ser dih hna cun
“Minung zong a kan ser ve” {Atu cu minung kan ser cang hna lai}
Genesis 1:26- ah kan hmuhmi cu, “Cun
Pathian nih cun a thawh i, Atu cu minung kan ser cang hna lai kanmah mui he an
keng lai i kanmah he kan i lo lai. Nga si hna seh, va si hna seh, inn zuat
sattil si hna seh, ramlak saram si hna seh, thilnung vialte hi a hme he a ngan
he an uk dih hna lai a tiah a ti” Genesis 2:7- ah kan hmuhmi cu, “Cun Bawipa
Pathian nih vawlei khan tlak tlawmpal a lak i mipa ah a ser, cun nunnak petu
thaw kha a hnar chungah a chuahhnawh i mipa cu a hung nung” tiah a ti. Cuticun
Pathian nih mipa minung cu a hun ser nak cu a si. Cu mipa Pathian a ser mi cu,
{2:8} ah, “Bawipa Pathian nih nichuahlei ah Edun dum pakhat a ser i cuka ahcun
a sermi mipa kha a chiah” a ti.
