By : Salai Za Thawng
New Delhi
Khua ka hei ruah lengmang
tikah Chinmi hna nih kan ram kan kaltak hi a ttha maw a chia dah ti
hi keimah tein ka buaipi ngai tawn.Mi cheukhat nih cun kan ram an
kaltak dih cang I,a chungah a ttuantu taktak ho hmanh an um ti
lo.Pakhat pa nih a ti rihmi cu mino vialte ramdang kal nan uar tuk I
nan kal dih lai I kan khua ah inn sak kan duh tikah hodah thingput ah
a kan bawmh ti lai.Thingputu le inn hmun chunh bawmtu kan ngei ti lai
lo I inn chia lo chia in kan chanchung kan um ko lai hi tiah a rak ti
I cucu nihin tiang ka philh kho lo.Laitlang ah a ummi minung hi cu
tlamtlinglo minung bantuk in hmuh le nautat deuh khi a rak si
tak.Nain nihin Chin Miphun hna ramdang kan kalnak ah tthatnak tampi
kan chuahpi ve hrim ko ti hi ka hmuhning a si.
Laitlang ah khuakhat le
khuakhat aa theihlomi le aa hngalh bal lomi hna ramdang ah hmunkhat
teah Pathian kan thangtthat tti hna,hmunkhat ah rawl te kan van ei
tti hna tikah hlanlio kan pupa nunphung kan hluan ngai tiin ka
hmuhning a si.Theih bal lo le hngalh bal lo minung hna hmnunkhat te
ah Chin ah unau kan sinak langhter in rawlchia te hmanh si
sehlaw,dawtnak mithmai he kan van dumtti hi hei tuak tikah a sunglawi
hringhran.Khua rak um lioah zeihmanh theih bal lo mi hna zongnih
ramdang kan hunk al cun,miphun dang nun le holh kan van cawn I kan
van thiam tikah,a hme bikmi ram Chin minung hna zong vawleipi kan cul
khawh ve nak hi nang biatak tein na hei ruah bal hnga dek maw?Voi
tampi ahcun har le fe ruangah ramdang kan phan kanti I kan zai caan
tampi um ko lai.A caan caan ahcun ngaichiatnak le lungretheihnak kan
tawn caan ah khua le nu le pa u le nau ngaihin kan hram caan tampi a
um ko lai.Mi kut tangah sal rianttuan a si tikah vsik le aanchia tawn
caan ahcun intuarzia cu a har ko lai.Miphun ramdang kan um lioah Ka
miphun le kan ram le ka khua caah zei fimthiamnak dah kaa lak/cawn
vet i hi ruahlo awk ttha lo.Ramdang sinah fimnak,thiamnak hi lak
khawh kan izuam a hau.Ramdang kan phan hi kanmah pumpak ca lawng a si
sualnak hnga lo khua fak piin kan ruat hna lai.Ramdang kan phan hi
kan chungkhar ca zong a si I miphun le ram ca tiangin a si ti hi kan
philhlo ah ka duh ngai.Miphun dang sin kan um lio ahhin chance pakhat
bantuk ah ilak zau in kan miphun sersiamnak caah zei idea dah na
ngei/ka ngei ti hi pumpak cio in bia I hal lengmang kan hau.
Pengpang dangin
siseh,khuadang in siseh kan rat tikah a caan ahcun ruahnak phunkip hi
a chuak kho ko.Nain Chin Miphun kan lungah um she timi ka saduhthah
bikmi cu nang cu cu khua kha khua na si tit e pawl le pengtlang kong
hna ah buai deuh loin Chin min pakhat ah unau kan sinak ti hi kan
thinlung ah iseihchih hna uh sihlaw,kan ram hi fawi tuk in remh kho
ding dirhmun kan si ko.Hakha,Falam,Teddim ka si timi lungput hna hi
miphun tthanchotertu lungput a si bal lo.Nihin ahcun Laitlang leiah a
lar ngaimi cu Zomi Democracy Pary(Ka palh sual kho men) pawl nih Chin
timi min hi Zo tiin thlen dingin President Thein Sein sinah ca an
kuat tiah thawngtheih asi.Chin Common Language ah Laiza holh siseh ti
hn in President Thein Sein sinah cakuat rak ttial arak si.Nihin
kanmah le kanmah,Chin party cio cio hmanah ruahnak khah loin cun
zeitindah Chin miphun huap in rian cu kan ttuan khawh kun hnga?Nihin
ni ah Miphun le ram caah kan pa le hna an izuam cuahmah mi an theih
fiang taklo a si rua tiin ka hmuh.CNP le CPP hna he ifonh dingin
meeting an rak tuah lioah Pu Cin Sian Thang nih a duhlo ti a si
hoi.Miphun le ram caah rianttuantu ciocio am si ko ahcun Miphun
tthatnak caah cun zeicahdah an duh hnga lo ti hi ruah ngai awk a
si.CNP le CPP le an van I fonh I CPP in minung pali nih an chuahtak
hoi hna.Hi bantuk ruahnak hi keimah party tinak lungthin nih kan
miphun le kan ram tthatnak dontu a si zungzal ttheu.2015 thimhnak
zongah Chinmi vialte awkhat on chuah kho hna uh sihlaw,zeidah in dah
a hei tthat hnga mu.Miphun dothlennak tuah cuahmah lio le tthatnak
caah izuam cuahmah lio zongah Chinmi lakah kan lung kan tthulh duhlo
hi a poi ngai ka ti.
Ramdang phan cangmi Chinmi
hna nih lungruall tein miphun le ram caah kan ttang cia a
herh.Hmunkhat teah nang e,kei e ti um loin Chin ah unau kan si timi
ruahnak he lungrual in Miphun le ram caah kan ttang cio a hau.Nang le
keinih Miphun le ram caah biachim thiam hlah hmanh sihlaw,Miphun le
ram caah kan ti kho mi thil pakhat cu Miphun caah lungrual in kan
ifuntomh hi miphun dawtnak pakhat a si ve.Kan pahrang cio in Miphun
le ram caah fek tein kan dir ko ahcun a hodah kan ram cia kan vawlei
cia ah a kan tei hnga?Mi ramdang kan um lio zongah Miphun ramdang nih
zohchunh awktlak ding tiangin lungrual in um cang uh sih.Zei khua
ruah loin nuamhnak men ah kanmah le kanmah isik ti loin nu khat
chuahtti bangin suktung bantuk fek tein dir uh sihlaw,zohchun awktlak
miphun si izuam hna uh sih.Nihin kan ram le kan miphun nih a herhmi
Mah tein khuakhan lairelnak kan hmuh khawhnak hnga cu nang le kei kan
lungrualnak cungah aa hngatchan ve ti hi kei cu ka hmuhning a si.Chin
Miphun vialte lungrual in awkhat kan chuah khawh ahcun a rauh ti lai
lo a par zau ko lai kan Chinram cu.Teinak sui luchin he kan Chinram
ah nikhat khat ah tawnnak caanttha zong Cung Pathian nih a kan
serpiak tthan zau ko lai.Chin mino hna lung dong naisai hlah,hacang
rial in kan tummi ram kanmah kut phan tthannak caan cu kan hmaika ah
a um cang.Joshua le Kaleb Canaan ram an kal lioah Pathian kan cungah
aa lawm ahcun cawhnuk le khuahliti luannak ram cu kan phan ko lai an
ti bangin,Pathian kan cungah aa lawm ko ahcun kan tummi Chinram cu
fawi tein Chinmi kut cungah khuakhan lairelnak caan cu a phan zau ko
lai.
Salai
Za Thawng
