Chin Christian Church, Malaysia “Crusade”
Speaker- Tluang Za Uk Group Evangelistic Ministry
Monday- July 08, 2013; Zan Sermon- Evan. Za
Kian
A hmasa bikah caan ttha a kan
petu Pathian min thangthat si ko seh. Tuzan ah a tlang thiangah a ra kho mi
vialte Pathian nih thluachuahnak in pe ko hna seh.
Bible relnak- 1 Siang 13:4,
Kan ramah Pathian sunparnak a langh
khawh nakhnga ding caah le kan ram a dam khawh nakhnga dingah Thiang Thlarau
cawlcanghter hna u sih. Thlarau kan cawlcanghter lo a si ahcun kan ram zumtu
kan nun a dam kho lai lo. Kan ram dam ter a duhtu hi Pathian a si. Cun kan ram
dam khawh nakhnga ding caah hin kan nunnak ah Thiang Thlarau kan cawlcanghter
zungzal ding hi a si.
Kannih Laimi cu kum 100 khrihfa
kan si cang nain Pathian hruaimi si loin Pathian thlarau tu kanmah minung tu
nih kan hruai tawn. Cucaah kan nunnak ah Pathian Thiang Thlarau a cawlcangh
khawh lonak hi a si. Kan dam khawh nakhnga ding caah kan nunnak chungah Pathian
Thlarau cawlcanghter hna u sih.
Kan nunnak ah a thianglo mi
nunnak kan tei khawh lonak cu kan nunnak ah Pathian thlarau kan cawlcanghter lo
caah a si. Kan nunnak hi damnak le lawmhnak a um khawh nakhnga ding caah hin
kan thinlung innka onh hna u sihlaw, Thiang Thlarau sawm hna u sih. Cu hnu
lawngah kan nunnak a dam lai.
Solomon nih cun Pathian thlarau
kha innka a onh caah Pathian nih a cawisan, asinain a nunnak ah Pathian a lawmhter
lo caah le Pathian thlarau kha innka a khar khan caah Pathian a cungah aa lawm lo.
Cu ruangah cun Pathian nih Solomon cu na ram le na pennak cu ka cheu cang lai a
ti. Asinain Pathian nih Solomon cu atu nangmah chan ahcun a si lai lo, Nate fa
chantu ah a sit e lai a ti. Atu nangmah chan ahcun na David nih a ka ttih caah
na pa mithmai ka zoh a ti. “Pathian nih David cu a hmai a zoh, zei ruangah dah
Pathian nih David cu a hmai a zoh kan ti si ahcun David nih Bawipa a dawttuk
caah a si” Cubantukin kannih zong kan nunnak hna hi Bawipa nih kan hmai zoh
vemi si hna u sih. Pathian nih kan hmai a kan zoh khawh nakhnga ding caah
Bawipa lam hi pialnak hna hlah u sih. Solomon a cungah Bawipa a lawmh lonak a ruang cu a pa David nih a rak
ttihmi le thluachuah a petu Pathian kha lam dang a pial tak caah a si. Cucaah
Solomon cu a thih i cu hnuah cun Israel mi Siangpahrang caah a fapa Rehabom kha
thim a si. Cu Rehabom cu a hun chuah tikah a mi hna nih cun an thawh i Rehabom
na pa nih kan cungah a kut kha a rihter tuk caah nang nih cun kan cungah na kut
hi zanter ko tiah an ti. Cun na rian cu kan ttuan lai an ti. Cutikah Rehabom
nih cun ruahnak a hal hna i cu hna nih cun ruahnak thalo kha an cheuh i fungfek
in kan hrem hna lai a ti. Cu ruangah cun pennak pahnih an i cheu, cucu Israel
pennak le Judah pennak a si. Kannih zong Pathian ttih loin kan nunnak hi kan
hman si ahcun kan nunnak hi a tthen ve ko lai. “Rehabom nih cun a mi hna kha ramdang
pathian kha a biater hna” cuti cun Rehabom nih a mi hna cu a tuah hna caah a
cungah a thin hung i a cungah a lawm kho lo. Cu bang kannih zong Pathian biatak tu ttanh loin minung hruainak
tu kan ttanh sual a si ahcun kan cungah Bawipa a lawm lai lo i kan ram cu a dam
kho lai lo i kan khrihfabu hna cu a dam kho lai lo. “Kan thlarau nunnak a cer
ko lai”
Rehabom cu cutin in Pathian ttih
loin a nunnak a hman caah a mi hna cungah a kut a hluar i cucu Bawipa a lawmh
lo caah Bawipa nih a kut a certer, Cu bang kannih Laimi zong Pathian ttih loin
kan nunnak hi kan hman a si ahcun kan nunnak kut hi a cer lai i kan ram le kan
khrihfabu le kan nun a dam kho ve lai lo. Pathian biatak dohtu cu kan nun a cer
ko lai. Kannih cu Pathian biatak dohmi si loin Pathian biatak cu dirpi hna u
sih. Cucu Pathian kan cungah aa lawmhnak a si.
David nih cun Pathian kha a ttih
caah Bawipa nih a kal tak bal lonak cu a si. Kannih zong Pathian cu kan ttih i
biatak cu kan ttanh si ahcun Pathian nih a kan kal tak bal lai lo. Cucu kan i
lawmhnak le kan damnak cu a si lai. Cu ruangah Kannih nih cun Pathian
biatak i nunpi ko hna u sih. Pathian
biatak kan ttanh lo i kan i nun pi lo a si ahcun kan kut a cer lai i,
zeitikhmanhah kan ram a dam kho lai lo.
Kan ram le kan nunnak a dam khawh
nakhnga ding caah Pathian bia cohlan hna u sih. Cucu kan ram damnak a si lai.
Pathian nih hin a bia a cohlanmi paoh cu a nunnak a thleng zungzal hna i damnak
le lawmhnak a pek zungzal ko hna. Kannih nih kan tei khawh lomi vialte teitu
kan si khawh nakhnga ding caah Pathian bia cohlang hna u sih.
Laimi nih Pathian bia cohlan loin
Pathian biatak kan doh caah kan kut a cer dih. Cu ruangah kan ram a dam khawh
lonak hi a si. Kan ram damnak ding caah Pathian bia cohlang hna u sih.
Pathian nih a biatak reltu vialte
kan dihlak caah a bia thlua kan chuah piak ko seh.
