Kan
Zumh ahcun Pathian A Phuang
Noah Zumhnak Nun
Noah hi a nunnak lam thluan kan zoh
tikah zei ruangah dah Noah le a inn chungkhar nih Pathian thinhung nak chung in
an luat i vawleicung thilnung vialte an thih dih lio ah annih an thih lo tiah
ti ahcun anmah nih an hngalh ruangah le an thiam ruangah le an fim ruangah le
an tuah khawh ruangah si loin Pathian bia an ngeih caah le an zumh caah a
si.
Buan chukcho a rak tlunnak a ruang
1-
Noah chan lio ah Buan chukcho a rak
tlunnak a ruang le Pathian thin a rak hungnak a ruang cu sual ruangah le tthat
lo ruangah a rak si i, cu sualnak ruang le tthat lonak ruangah a rak tlung mi
Buanchukcho chungin Noah le a inn chungkhar luatnak an hmuhnak a ruang hi a
biapi ngaimi a si i, cucu zumhnak kha a si. Buanchukcho a rak tlunnak a ruang
cu, Gen 6:1-2 {Minung tthat lonak ti kan hmuh lai} “Cu tikah cun vawleicung
khua zakip ah minung tampi an um cang i, fanu fapa kha an hrin hna. Cu fanu hna
an i dawh cu Pathian fapa hna nih khan an hmuh hna i, cucaah an duhmi kha an i
thim hna i, an tthit hna” tiah a ti. Mah kaah a chim duhmi cu minung vialte nih
anmah duh cuainak le anmah duh thimnak lawng kha an tuah cang i, Pathian duhnak
lam le, Pathian duhmi kha an tuah ti lo caah Pathian cu an cungah a thin a hung
i, cucaah dan a tat hna, cucu dan a tat hna nak cu Buanchukcho kha a si.
2-
Gen 6:5, ah “Bawipa nih minung cu khua
zakip ah an tthatlo tuk hringhran le an lung chung cu ruahnak tthalo lawnglawng
aa khat kha a hmuh tikah, {Pathian nih cun vawlei cungah}. Gen 6:6, Minung a
rak ser hna i, vawleicung i, a rak um ter hna kha a ngaih a chia i, aa
ngaihchih ee” a ti. Cu minung hna an rak sualtuk ruangah le tthat lonak an rak
tuahmi ruang ahcun Pathian cu a thin a hung i, cu ruangah vawlei cungah
Buanchukcho a rak tlunnak a ruang cu a si. Mah hi lio minung hna an rak sualnak
le an rak tthat lonak hi zei tlukin dah a rak ngan hnga, zeicahtiah ahcun
Pathian thin hmanh a hunter tuk mi le Pathian hmanh a ngaihchihter mi cu an
sualtuk ti nak cu a fiang ko. Rom 3:10-12 ah, “A ding mi ahohmanh an um lo,
Pathian a kawlmi ahohmanh an um lo, minung nih an dihlak in Pathian kha an
pialtak i, a pingah an kal dih. Tthatnak a tuahmi ahohmanh an um lo, pakhat
hmanh an um lo” a ti. “Cun sualnak man cu thihnak a si” a ti.
3-
Cucaah kannih zong nih nitinte kan
nunnak ah sualnak kan tuah ve i, tthat lonak in kan nun a si ahcun kan cungah
Pathian a lawm kho lai lo i, Pathian kan cungah a thinhung ve ti kha philh hna
hlah u sih. Pathian kan cung i, aa lawmh lo le a thin a hung a si ahcun kan
cungah Pathian dantat nak cu a tlung ve lai ti kha a fiang mi a si. Buanchukcho
a rak tlunnak a ruang cu minung hna nih tthat lonak an rak tuah ruangah le an
rak sualtuk caah le an rak zumh duh lo ruangah a si i, cucaah Pathian cu a thin
a hung i,vawlei cungah Buanchukcho a rak tlunnak a ruang cu a si. Asi nain Noah
le a inn chungkhar tu nih cun Buanchukcho thihnak chung in luatnak an rak hmu,
cu luatnak an rak hmuh khawhnak cu zeidang ruang a si lo an zumh caah a si.
Noah le a inn chungkhar nih luatnak an hmuhnak a ruang
Noah nih cun vawleicung minung vialte an
tthalo lio ah le an sualtuk lio ah le, an rak sualtuk ruangah vawleicung minung
vialte Pathian nih Buanchukcho in a rak thah dih lio hna ahcun, Noah tu nih cun
Pathian lung kha a rak ton tiah kan hmuh. “Asinain Noah nih cun Bawipa kha a
lung a ton” a ti. Gen 6:8, Cu tluk in minung tthatlo le sual lakah cun Noah nih
cun Bawipa lung kha a ton i Pathian kha a zumh caah Pathian cu Noah cungah cun
aa lawm i annih cu an zumh ruangah Pathian nih luatnak a pek hna. Noah le a
chungkhar kha Buanchukcho chungin luatnak an rak hmuh lio ah khan fawi tein an
rak hmu ve lo. Harsak nak le temhin nak an tuar hnu lawngah le an zumh hnu
lawngah luatnak kha an rak hmu ve. Noah le a inn chungkhar nih luatnak an hmuh
khawhnak dingah temhin nak le intuar nak an huah mi cu zei dang si lo. Pathian
bia an zumhnak ah le Pathian nih tuah uh ser uh, a timi hna lawng an tuah an
sermi kha a si. Noah nih cun Pathian kha a lung a ton i a lung a ton lawng si
lo, a zumh rih, a zumh lawng si lo, a nawl aa ngeih rih. Cucaah Noah te inn
chungkhar nih vawleicung thilnung vialte an thih dih lio ah annih cu nunnak an
hmuhnak kha a si.
Noah nih Lawng a ser
Noah nih Pathian cu a lung a ton
bantukin Pathian nih cun rian a fial, Noah cu Pathian nih rian a fialmi vialte
a tuah tertu cu a zumhnak a si. “Noah kha, a hmuh khawh lomi hmailei thil
kongah, Pathian nih ralrinnak a pek tikah, cu ralrinnak bia a theihtertu cu a
zumhnak a si” a ti. Hebraw 11:7. “Noah nih cun Pathian bia cu a zumh i a zumh
bantukin a tuah” Noah nih Pathian bia a zumhning hi zoh tikah, Noah nih a
zumhning hi a rak ngan ngai ti hi, hmuh khawh a si. Cucu zei ruangah ti ahcun
Pathian nih lawng ser a fial ah khan, Noah lawng ser ti lawngin a chim lo. “A
chimhmi cu Noah lawng ser cu lawng cu tlang ah va ser tiah a ti. Cuti a ti
lawng si rih loin lawng cu na ser lai i cu lawng cu a sang pe cu zet a si lai,
a kuah pe cu zet a si lai, a dot cu zet a si lai, cun a chung del zong na tuah
hna lai. Cu lawng si lo, lawng chung ahcun thilnung saram hna a hme he a ngan
he an dihlak in a Nu le a Pa cio lawng chungah cun na luh pi hna lai” tiah
Pathian nih cun a chimh a fial i Noah nih cun, cu vialte cu pakhat hmanh bau
loin a tuah dih i, hi a tuahtertu le tuah khawhnak a ngeihtertu hi a zumhnak a
si. “Pathian bia kha a ngeih i lawng pakhat a ser” Hebraw 11:7a.
Noah nih hi zumhnak ruangah lawng a
sermi nih hin “Vawleicung mi vialte cu, an palh ti kha a langhter” a ti. Hebraw
11:7b. Cun Noah nih hi lawng zumhnak ngeiin a sermi ruangah hin “Anih le a
chungkhar hna cu lawng chungah cun him tein an um” a ti. Hebraw 11:7c. Cun Noah
nih cun “A zumhnak thawngin a rami dinnak kha Pathian sin in a hmuh” a ti.
Hebraw 11:7e.
Noah
nih a zumhnak ruangah a comi
1- Noah nih mi vialte sinah a palh lo
tiah an tinak a ruang cu a zumhnak thawngin a si.
2- Noah le a chungkhar nih himnak an
hmuhnak a ruang cu a zumhnak thawngin a si.
3- Noah nih Pathian sin in a rami
dinnak a hmuhmi cu a zumhnak thawngin a si.
4- Noah nih lawng a ser i Pathian nih
a fial bantuk tein a tuahtertu le a tuah khawhnak cu a zumhnak thawngin a si.
Minung zong nih kan
tuah sermi thil hna ah hin kan zumhnak a um lo ahcun zeihmanh hi fawite cun kan
tuah kho tawi lo. Tahchunnak ah- Mi pakhat nih khualtlawn kan i timh tikah
khualtlawn kan i timhnak khua le kal kan duhnak hmuh kha kan i thawhhlan in kan
lungin cu kaa hmun ahcun, ka kal lai timi kha kan lungin kan ruah cia i kan
lungin kan ruahmi cu kan zumhnak kha a si i, cu kan ruahmi le kan zumhnak nih
cun a kan hruai i kan duhnak hmun le kan i timhmi hmun kha a kan phakter
zungzal. Cun lairam in Malaysia leiah rat na timh i kal na duh ah khan lairam
khua na um lio ah Malaysia ah ka kal lai tiah zumhnak le timhmi na ngei, cu na
zumhnak le tinhmi na ngeihmi nih cun an hruai i Malaysia cu na phan taktak ko.
Cucaah kan zumhnak hi a
biapi taktak mi a si. Kan zumhnak um lo le zumhnak hi kan ngeih khawh lo a si
ahcun, kan duhmi le kan i timhmi hi a tling kho hrimhrim lai lo.
Noah le a inn chungkhar
nih Buanchukcho in luatnak an hmuh i thihnak chungin nunnak an hmuh i him tein
an umnak a ruang cu anmah an fimthiam ruangah le an ti khawh ruangah a si lo.
Pathian bia na ngeih an zumh caah a si.
Cucaah kannih zong nih
kan zumh a si ahcun kan zumhnak ruangah kan herhmi le kan duhmi cu kan hmuh ve
hrimhrim lai i kan sinah Pathian cu kan zumh bantukin a phuang ko lai ti hi a
fiang mi a si.
Note- Noah le a inn
chungkhar cu an zumhnak ruangah annih cu him tein an um i cu hnuah vawleicung
miphun vialte hi Noah le a inn chungkhar hna hmang in run hrin thanmi kan si.
A reltu vialte kan caah Pathian nih
thluachuahnak pe ko seh.
