Isaiah 9:6
‘Kan caah ngakchia pakhat a chuak, fapa pakhat pek kan si. Amin cu khuaruahhar….. ti a si lai’
Thlacamnak: “Ka Pa, na bia cu nangmah lila nih ttanh tthan law, nihin zong bia kan chim rih ko. Thlarau bawmhnak kan sawm. Na kan bawmh tizong ka zumh caah ka lawm. Ka Bawipa Jesuh min in thla ka cam. Amen’
Pathian fale hna, damnak le kan nunnak a zuahrih tu kan Pa Pathian a min thangthat si ko seh. Nihin ah ruahti ka duhmi cu, Fapa Jesuh a min kong hi a si. Thlacamnak he rak rel ve ding ah kan sawm. Dawtmi hna, profet Isaiah hi Bawipa Jesuh a chuah hlan kum 700 hrawng ah a rak nungmi pa a si i, Bawipa Jesuh chuah lai nak kong a rak chimchung tu a si ve. A chimmi lak ah a min kong zong hi aa tel. Baibal thiammi hna nih an kan chimhnak ah kan Bawipa Jesuh hi min 256 a ngei tiah an ti. Hi lak ahhin na uarbik mi tiah thimter sisehlaw, Khuaruahhar, timi hi ka thim ko lai. Zeicahtiah, Bawipa Jesuh cu a sining dihlak ah hin pei khuaruahhar a si cu.
Nizan nai ah kan chim cangmi cu, a chuahnak ah le a nunzia ah khuaruahhar a sinak tawite in kan langhter. Nihin ah cun, a thihnak zong ah khuaruahhar a sinak in kan thawk lai.
Pathian fale hna, a thihning hi khuaruahhar a si. A thihnak lai hi a rak chim chung khawh. A zultu chung in an ka rawi lai, timi zong a chim khawh. Aho nih dah, zeitindah timi zong a hngalh dih. Tangka sawmthum ah man ol tein an zuar lai nak zong a hngalh fawn. Gasmani dum in kalvari tlang tiang ah awn au lo tein a um kho. An puhmi bia vialte kha a let hna lo. Sual an phawtnak vialte kha biapi ah a chiahpiak hna lo. A thih lio hrawng thil cangmi kha ruat rih hmanh, khuaruahhar lawngte an si. Van a mui, nika a tlau, lii aa hnin i, thlankhar aa hung, mithi an tho. Biakinn puanzar a cung in a tang tiang a tlek dih. A thattu Rom ralbawi hmanh nih, ‘mah pa hi Pathian fa a si’ tiah a phuan. Pathian fale dawtmi hna, a thawhthannak zong khuaruahhar a si. A thawhthan lai nak kong hi a chimchung cang. Nithum hnu ah ka thothan lai a ti hna. An dihlak in an rak zumh khawh deuh lo maw a si hnga, an philh dih ai. Thlanlei kal ding ah nu lawng an rinh hna. A cheu cu khualeng ah an chuak, pahnih hna cu Emmous khua lei ah an kal khah. Lung nganpi an khuhmi thlankhar cu vanmi nih a thawn piak. A puan zong ttha tein a bil tak. A hawikom le a dawtmi hna sin ah aa phuang tthan. Hi thil vialte hi minung nih tuahkhawh phun a si lo, Pathian lawnglawng nih a tuahkhawh mi a si. Pathian fale hna, Jesuh cu khuaruahhar a si hrimhrim ko. Pathian a si nain minung ah a cang i, nangmah le keimah khamhnak lam a kan sialpiak. Amah kan zumhnak thawng in kan nung ve. Zumhnak in kan cohlan caah a tuahmi kip ah kan i tel ve. Rawl a ulhnak ah, tukforh a innak ah, Gasmani thlacamnak ah, vailamtahnak ah kan i tel ve. A thawhthannak ah kan i tel ve. Vanlei a kai lio ah kan i tel ve. A hong ttumthan tik zong ah a hmutu kan si ve lai. Haleluia!
Ule nau hna, Jesuh cu khuaruahhar a si hrimhrim ko. Keimah bantuk misual hmanh pei a ka khamh cu. Sual nencawk i kaa bualh lio ah pei a thisen in a ka tlanh cang cu. Pathian fa cannak nawl a ka pek i, Thiang Thlarau bawmtu a ka pek chih cu. Nifa tein ka chung ah, ka nun ah a Thlarau in rian a ttuan. Ule nau hna, ka mitthlam ah ka cuanter tawn. Pathian nih a kan ser lai ahhin, Nawlbia khi ruahnak hei hal sehlaw zeitindah a ti hnga: ‘Pu Nawlbia, minung hi ser ning law zeitindah na ruah? tiin. A lehdingmi cu, ‘ser nemmam hlah. Na nawl a zul lai loh, a lamhchih lehlam lai. Na min a thurter lai i, na biakinn a thurtertu men a si lai. Ser hrimhrim hlah’ tiin. Biatak kha hei hal rih sehlaw, ‘ser hlah. Na bia a kaltak colh lai, mahduh paoh in khua a sa lai. Na Thlarau kha zei ah a rel lai lo. Ser citcet hlah’ tiin.. Zangfahnak teh zeitin, ka ser lai maw? tiah hei hal sehlaw a lehding mi cu: ‘Bawipa, Biatak le Nawlbia chimmi hi a hman ko. Asi nain ser ko hna. Keimah nih zohkhenh khawh ka zuam ve hna lai. Cawmkhawh kaa zuam ve lai i, na dawtnak a philh tik ah, lam a pial sual tik ah ka cawnpiak tthan lai. Na ngaihthiamnak kong ka chimh hna lai. A kalnak kip ah ka zulh lai i, nangmah lei ah ka kirpi tthan lengmang lai,’ tiin. Pathian fale hna, Jesuh Khrih cu kan Zangfahnak a si. Phuttawknak le tthatnak pakhat hmanh kan ngei lo nain a zangfahnak vel in a kan tuam zungzal tu a si. Kan tlau tik ah a kan kawl, kan pial tik ah a kan hruai, kan lung a khon tik ah kan liang a kan bengtu a si. Jesuh cu khuaruahhar a si taktak ko.
A min cu khuaruahhar ti a si lai.
Bawipa nih sunparnak co ko seh law, kan dihlak caah thluachuahnak kan pekpiak ko seh. Amen.
