X'mas lomhnak nan cungah um ko seh. X'mas hi sullam ngei in a hmangtu kan si khawh nakhnga le Jesuh Khrih a hmutu kan si khawh nakhnga Pathian bia in kan nun i zoh tti tthan ding in kan sawmhna. Kan Bawipa Jesuh Khrih a chuah le cang ka in Van Mi hna hi Tuukhal hna sinah an i langh hmasa bik, a ruang cu mi vialte caah Tuukhal ttha a sinak kha langhter hmasa bik a duh caah a si.
Mi vialte ca ti a si caah Jesuh Khrih velngeihnak chung ahcun mi zeipaoh an i tlum i thleidannak a um lo tinak a si. A duhmi ca paoh ah chun zan hlen in ai khar bal lomi velngeihnak inn ka cu kan Bawipa Jesuh velngeihnak hi a si. Asinain Jesuh hi a kawlmi paoh nih hmuh khawh a si lo, a si kun ah Jesuh cu mi vialte caah a si kun lo maw zeiruangah dah a kawlmi paoh nih an hmuh kun lo timi bel te biahalnak a um kho men? A hmaan, Jesuh Khrih hi a kawlmi paoh nih an hmuh lonak a ruang kan zoh hmanh hna lai.Herod nih Jesuh a kawl ning
Herod nih naute Jesuh hi ton awk ah ai tim i a kawl ve lengmang ko nain a hmu kho lo, zeiruangah a hmuh lo Jesuh hi Herod caah a chuak ve lo maw? Chuak ee, Jesuh velngeihnak hi Herod ca zong ah a si ve ko nain Herod nih Jesuh a kawl tikah a poimi thinlung cu a hmaika ah kun i biak ding kha si loin (1) Vainam in a nunnak hloh ding kha ai tinh (2) A ka nih cun Jesuh hi ka biak ve lai a ti ko nain a chunglei ah cun hnahchuahnak le puarhraannak in a khah caah Jesuh Khrih a hmu kho lo. Matthai 2:8; 16.
Mifim hna nih ruahnak an i palh
Mifim hna hi Khamhtu chuahnak kong zong Pathian nih Arfi hmang in a chimh hna i lam a hruai ko hna nain hma a voikhatnak cun ah Jesuh an hmu kho ve lo. Mifim hna nih an ruahmi cu Siangpahrang a si ding mi cu sitthatnak in a rat lai caah mirum inn le siangpahrang a simi Herod sin in nau te hi a chuak ko lai amah hi panh ko usih an ti, Cu lungput an ngeih le cangka in lam hruaitu Arfi a tlau. Herod sin ah cun an kal nain naute Jesuh Khrih cu an hmu lo. Unau kan Bawi Jesuh hi misual mi le sifak hna hi daw lo in le ttanh loin rumnak le chawva hna hi rak ttanh seh law nang le kei cu kan dih bak ko hnga mu. Asinain Jesuh nih cun nang le keimah dirhmunnak niam Caw inn tu kha ai thim, Cucu a thlah tu a Pa Pathian duhnak zong a rak si
( Matthai 11:25-26 ).
Mifim hna nih Jesuh an hmuh
Mifim hna nih Herod inn an chuah taak le cangka in an cung ah hruaitu Arfi a rung lang tthan, Arfi zoh in an kal tik ah naute Jesuh cu an va hmuh i an va biak, laksawng an pek i lunglomhnak in an khat ( Matthai 2:11 ). Unau Jesuh Khrih kan kawl tik ah kan don tik ah a biapi taktak mi cu minung sinak in kawl lo in toidornak le hruaitu Arfi ceu zoh in a kawl tu kan si awk a si. Mi ca lawng ah a si lo ka ca hrimhrim zong ah asi ve timi lungput ngei law a hmai cu kawl tuah. A luan cia na sing kha ruat hmanh, nuamhnak sawh le din ei bu men in kan rak don tawnnak, lengkomh nuamhnak men, chungttuan pah in biasawng tlorhnak men, huaha lo sawhsawh in can kan liam ter tawnnak hna kha mertak in amah Jesuh Khrih zoh in a thangtthat tu si cang u sih. Mifim bang in laksawng tampi kan pek khawh lo zong ah laksawng can ah na nunnak, na thinlung kha pe tuah. Jesuh Khrih nih an put mi lomhnak cu na chung ah ni bang in a tlang lai i nai lawm ko lai.
Jesuh Cotu cu lomhnak in an khat
Khamhtu Messiah hngak in Simeon zong a um ve. Voikhat cu Thiang Thlarau hruai nak thawng in Biakinn ah a kal i naute Jesuh cu a va hmuh. Semion nih cun Jesuh cu ai pom i hitihin Pathian cu a thangtthat '' Nihin ah hin maw Bawipa nangmah nih na salpa cu ka rian na ka liim ter cang ... ff '' tiah a ti, Semion cu lomhnak in a khat. Semion hi Pathian rianttuan tu a si ko nain ka rian kai liim a ti bal lo zeiruang ah tiah cun naute Jesuh he an i ton rih lo caah a si. Jesuh a ton hnu lawng ah ka rian kai liim a ti. Khrihfa na si ruang ah ka rian kai lim ti hlah, zumtu na si ruang ah ka rian kai lim ti hlah u sih, Jesuh hi kanmah hrimhrim nih kan pom a hau hih, hna theih nak lawng si lo in kan mit hrimhrim in kan hmuh a hau. Semion bantuk in Jesuh hi kan pom i kan hmuh hnu lawng ah nunnak taktak le lomhnak taktak a ngeitu kan si lai. ( 2:27-28 ). Ka unau hna X'mas hi voi zeizatdah na hman cang, voi tampi na hman cang men lai nain a luan ciami na hman tawn ning kha ruat tthan hmanh, sullam ngeimi le Jesuh nih a duhmi thangtthatnak a si maw? Herod bang in puar hraannak le vainam he Jesuh kawl tu kan si chung paoh cu kan caah Jesuh hi ratchan a ngei lem hnga lo. Na sining pi kha thla ta law na minung si nak na Herod thinlung le inn pi kha chuah taak law hruaitu Arfi zoh in kal cang tuah Thiang Thlarau nih lam an hmuhsak lai naute Jesuh a tongtu na si ko lai. Pathian nih thluachuah kan pek piak seh. Amen.....
Khrih ah nan hawi;
Paul Za Cung Lian
Buffalo,NY
