Isaiah 9:6 ‘Kan caah ngakchia pakhat a chuak, fapa pakhat pek kan si. Amin cu khuaruahhar, Fimchimtu ….. ti a si lai’
Thlacamnak: “Ka Pa, na bia cu nangmah lila nih ttanh tthan law, nihin zong bia kan chim rih ko. Thlarau bawmhnak kan sawm. Na kan bawmh tizong ka zumh caah ka lawm. Ka Bawipa Jesuh min in thla ka cam. Amen’
Pathian fale hna, damnak le kan nunnak a zuahrih tu kan Pa Pathian a min thangthat si ko seh. Nihin ah pehthan ka duhmi cu, Fapa Jesuh min cu Fimchimtu ti a sinak kong a si. Thlacamnak he rak rel ve ding ah kan sawm.
Dawtmi hna, Jesuh cu Fimchimtu a sinak le kan fimnak a si zia tlawmpal cu kan langhter cang. Nihin ah hon peh tthan ka duhmi cu, Isaiah 28:23-29 karlak hi a si. Pathian Fimnak tiah tlang a taar i, cucu kan Bawipa Jesuh hi a si. A Baibal hi rel rih hmanh u sih: ‘Ka chimmi hi ngai tuah u, kan chimhmi hna hi ttha tein nan hna chit tuah u. Lothlo pa nih a lo cu, thlaici tuhnak caah tiiin a thuan lawng a thuang zungzal ballo. A thuan dih cun thlaici kha a tuh hna, nannan tehna, zira tehna kha a tuh hna. Changvut le barli kha a tlang a tlang in a tuh hna I a lo ri ah thlaici dang kha a tuh hna. Pathian nih a cawnpiak caah a rian kha a ttuanning a thiam. Zira ci le nannan ci kawnnak caah thingtan rit pipi kha a hmang ballo, a zaangmite a hmet a ngan aa tawkzate kha a hman tawn. Changvut fang kha rawklo tein cawleng kha a rialter. Hi bantuk fimnak vialte hi Ralkapbu Bawipa sinin a rami a si. Pathian khuakhannak cu a fimmi a si zungzal i thlua a chuak zungzal’. Dawtmi hna, minung nih hin pekcia, thiamcia, mahti khawhnak timi hi kan rak i rinh tuk tawn i, zeithil paoh hi Pathian sin in a ra mi a si tihi kan philh sual tawn. A cunglei Baibal cang nih a kan chimhmi cu a fiang ko lo maw? Lothlawhnak hmanh ah, lothlawhning le thlaicin ning tiang a kan cawnpiaktu cu Bawipa a si. Thiamnak dihlak a kan petu cu Bawipa a si. Minung fimnak kan timi vialte a hrampi cu Bawipa a si. Amah fimnak in kan luatnak hmunhma pakhat hmanh a um loh. A Thlarau in kan i thuh khawhnak, kan zam khawhnak hmunhma pakhat hmanh a um loh. Innsaknak le khuahngahnak zong ah ka tel a ti kha teh (Salm 127:1) Amah fimnak tello in, fimchimhnak tello in kan tuahkhawh mi zeihmanh a um loh. A tanglei Pathian bia hi rel rih hmanh u sih:
‘Hi ka bia a thei i a zulmi cu lungcung ah a inn a sami mifim pa bantuk a si. Ruah a sur, ti a lian, thlitu nih fak pi in a hranh. Sihmanhselaw, lungcung I sakmi a si caah khan a pur lo.’ (Matthai 7:24,25)
Dawtmi hna, a fim caah a sak silo in, lungcung (Pathian pakhatnak ah a chiah caah) ah a inn a sak ca tu ah a fimnak a si. Nangmah le keimah mit ah fim silo in, cunglei Pathian mit ah a rak fimtu a si deuh. Pathian mit ah mifim si hi kan i thim deuh a herh. Luka 12:13 in kan rel ahcun minung mit ah a fim ngaimi, mirumpa kong kan hmuh. Mirum cu kan ttihzah deuh hna cuh. Mithmai zong kan pek deuh hna, upat zong minung lei kap ahcun an tong peng. An awka zong a sang pah thulh ve, a tamdeuh cu an bongal fawn. Asi nain a rumnak le a sining lawng aa bochanmi cu Pathian mit ahcun mihrut bak an si ko. ‘Maw..mihrutpa… tuzan ah na nunnak cu lak a si cang lai….’ tiah cunglei in auhmi kan si suallai ding hi phan a um taktak.
Dawtmi Pathian fale hna, satil arva zohnak ah, ramrian ttuannak ah, lothlawhnak ah, thingphurhnak ah, innsaknak ah, khuahngahnak ah, a zeizong te ah Pathian fimnak cu aa tel. Ca cawnnak ah, lentecelhnak ah, nungak tlangval hawikomhnak ah, nuleva karlak ah, chungkhar lak ah, hawikom lak ah, miphun karlak ah, ramkhat le ramkhat karlak ah, vanle vawlei sining vialte ah Bawipa aa tel. A fimnak in a ser i, a tuak i, a cawl termi an si dih. Van arfi lengluang le van rangtang thil vialte hi a fimnak in ser an si dih. Minung kan sining zong hi zohrihhmanh: Na rawl hi zeiruang ah dah a ttam, zeiruang ahdah na ti a hal tawn, na mit a kuh tawn, na thaw te na chuah, na hngilh kar tiang hmanh ah..kan ruat bal maw? Thluak a kan serpiak i, prokrem a tuah dih. Amak le amak taktak dah kaw. Kan ruat bal maw? Kan Pathian a fimning hi.
A Min cu Fimchimtu a si lai a timi hi a diktuk ti law..
Bawipa nih sunparnak co ko seh law, kan dihlak caah thluachuahnak kan pekpiak ko seh. Amen.
