Kan fanu Aching sin i Miracle Writing timi Khuaruahhar cattial kan hmuhnak hi nihin hin cun kum thum atling ve cang. Zeican a rau rih lai timi tu cu Pathian lawnglawng nih atheih i atu tiang khuaruahhar Cattial le Thiangthlarau rian ttuannak kong he pehtlai in nehhnu van khirh i thil sining tete van langhter hi aherh ko ti in kan ruah caah tlawmpal in van langhter ka duh. Ca arak rel mi le azumhnak ca ah thazang arak ilaak kho mi nan dih lak Bawipa nih thluachuah in pe chin chin ko hna seh.
Texas ah khin ka umnak pawngkam i khua asa ve mi Karen le Kaya miphun pawl kong khi an ka chimh ttheu tawn. Hi hna mi phun an hruh rih ve ning, rian ttuan zong an itimh lo ning, cacawn zong an itimh lo ning, aho afim hlei athiam hlei zong um lo i khua an sak ning, lam kam bur i zunzun hna an hman rih ning, Bill peek an theih lo ruang ah an mei an ti an phiat hna zong ah cu hmanh cu a ruah awk an theih lo ning, Bill ca kuat zong rel lo i apon i an pon ning te hna khi an ka chimh tawn i cu hna sining nih khua aka ruah ter chin mi cu Laimi Pathian i akan cawisan ning le thluachuah akan peek ning kong hi asi. Kan nih cun anmah bantuk in harnak taktak tong in ramri ah kum le khua i khua asa mi zong kan si lo, kan van isawhkalh luklak i a run run i vulei cung ram ttha cem ah khua kan hong sa hna i cu hmanh ah cawnpiaktu ttha ttha hna nih nifatin le zarhfatin ti in an theih chom le an hngalh chom in ngol lo in an kan cawnpiak tik ah High Speed taktak in tthanchonak lei ah kaar ahlang kho mi kan hong si. Hi vialte ruah tik ah Pathian thangtthat lo awk a ttha lo. Asinain..
Karen le Kaya miphun hna Bill peek hmanh athei lo mi hna kong kan ruah ah kanmah ruah khawh ning cio in kan awlok achong khim ve. An caah hin khuaruahhar thil pakhatkhat dah a um ti lo ah cun hawi sining a phaan kho ding an si ti lo.
Tahchunh awk a van ttha ngai mi cu Laimi hi hi tiangtiang Pathian nih akan cawisan i thluachuah aphun phun he akan thuam i kan kal nak kip ah Khrihfabu kan dirh i kan biak inn ah ai puummi kan khat ti awk in chim tha nuam khim pi khi cu kan si i a chim zong an kan chim leen ve cang ko na in, khatlei ah Lami Khrihfa hna kan dirhmun le kan sining taktak van izoh tthan tik ah Kaya pawl Bill peek hmanh athei lo mi hna he tluk ceo le keucheu te khi kan rak si. Laimi Khrihfa tluk i zu ading mi, kuak azu mi, sahdah le Khaini ahmawmmi, Kunya akhai mi, athur hnawmmi, hmanthlaak dawhcahlo azoh mi, hi vulei cung Khrihfa ah an um zumh asi lo. Sualnak tuah lei ah cun Olympic hmanh ah achuak ngam ding mi zutama hna ngeih leen dawh in kan um. Thantlang peng nih kan rak sunhsak ngai mi Ttawngcaw Bawlung puai phun khin Ttawngcaw i zudin zuamnak hna hi tuah taktak usih law aho te tlang nih dek an ngah hnga, champion lawngte kan si lai dah ti awk in. Van lawng cung i kuak azu mi hna kan um cang. Fa le nak in Sahdah ai duh deuh mi hna kan um cang. Mah le mah ai that Suicide atuah i athi mi hi percentage in chim usih law Lami nih hin Stars tambik kan hmuh lai ti afiang. Mah le fa tiang bur lak i ahlonh ngam ve mi ngamhsang taktak nule tiang zong kan um i nupi athat mi, nungak le tlangval ai thatmi zong kan um leen cang. Zawtnak chiahru chim ngam lo mi i athi mi hi zeizat dah kan si hnga i atu ah hin akuah cuahmah mihna hi zeizat khi dek kan hei si rih fawn hnga. Hi thil vialte ruah khomh tik ah Laimi hi Khrihfa kan sinak nih hin akan chiatchuah dih tthan iti usih law kan palh hnga dek maw? Thluachuah timi hi chiatchuah ti hna in leet usih law ai tlaak deuh cang men hnga. Cu ruang ah Khrihfa mi le fa hna abawm tu ding le zohkhenhtu ding i thlah asi mi Thiangthlarau hi angaih achia tuk cang i Laimi caah hin ahlei ce in rian zong hi aphun phun in a ttuan cang. Cu ti i rian a ttuannak lak ah atu i kan aupi lengmang mi Khuaruahhar Miracle Writing zong hi pakhat ah ai tel ve mi asi.
Hi khuaruahhar ca ttial hi 2008 December ni 14 zing 8 Am ah avoikhat nak arak ittial asi i cu lio ah cun an khuaruah arak har tuk ve i zeiti um awk an rak thei ve lo mi fanau hna. Hawi sin zong ah chim ngam lo in a tuam in an rak tuah piak i cuticun chunnitlaak lungrethei in an rak umpi. Pawngkam i Pastor le Pathian mi le fa hna thlacamnak le zohkhenh kilkawinak hmang in hi thil hi Thiangthlarau rian ttuannak asi ko an ti hnu lawng ah mipi sin ah an langhter ngam mi asi. Chim duhmi cu ral ring ngai in hi thil hi rak zoh pengmi asi ti khi asi. Khuaruahhar ca ttial adong tu " Aching" hi 2008 July ah hin hrintthannak arak co i cu hnu cun prophesy bantuk phun khi peek arak si hmasa, mah hlaan ah hin cun Khrihfa ka si le si lo zong hi kai thei lem lo ati.
Hi Khuaruahhar ca ttial arak ithok ka hrawnghrang ah hin ca ttial lawng hmanh si lo in Thiangthlarau nih amah pum hrimhrim hi ahman i amah nih zei a tuah hmanh ai hngal lo na in cu kar ah cun vailamtah in arak itah i akut le ake, ahnaak le te hna ah thi hna an rak chuak i hmape zong caansaupi an rak lang. Cun Biathli tampi zong chimh asi i Tlang ah va kai uh ati hna tik ah zinglei dei le dei lo karlak ah khin an umnak Frederick tlang ah Pathian he an vai itong tawn. Pathian cu Arfi in ara, rang rang (White horse) in ara, Thlitu in ara ti bantuk khi asi tawn. Caan karlak ah amah hrim hrim hi Thiangthlarau nih a hman i amah nih hin Bawizisuh bantuk in mi bia aruah hna i mi acawn piak hna, thluahchuah apeek hna. Kum thum chung kan zoh tthan tik ah Thluachuah akan peek mi hi asawh an rak si lo, an hman dih ti in tehte kan khaan cio dih hna. Hlaan lio kum 2000 lio i Bawizisuh le azuultu nih an rak tonmi tuanbia kha Bible ning te khin amah ton mi bantuk khin tampi akan chimh tawn. Amah hi Bible theih mi angei mi asi lo, mi ningzah pang asi pin ah hngakchia hrim hrim asi tik ah um sawhsawh ah hin cun upa sin ah a um duh bal lo, bia zong ruah khawh asi bal lo na in cubantuk i Thiangthlarau nih arak hman caan ah cun vulei cung mivialte hmai zong ah azei hmanh apoi ding khi asi lo. Abia chim mi hi an faifim tuk i khuaruahhar taktak khi an si tawn hna. Mah ti i a hman chung pohpoh hi amah pumpaak hi Vancungkhua ah arak um chung i vanmi lak ah Gabriel Michael le Abraham, Peter, Mary, Queen Esther, tibantuk hna he khin an va um tti tawn. Cucu zeitindah kan theih khawh ti ah cun Bawizisuh thlarau nih abia angol le caangka khi amah minung sitawnning nak hngakchia deuh ruamaam khin a um i vanmi le ahmuh mi hna he bia an iruah cuahmahh i an rak capo pah lengmang zong khi theih fawi te khi asi..."kei cu vulei mi ka si i nan changreu le mitsur hang hi kei cu ka duh lo, arsa rak ka pe u, ka rawl a ttam tuk..." ti te hna hi achim tawn...Vancung akai ah hin vulei ah attum duh ti lo i Abraham nih hin vulei ah aka nam tthan tawn i cu ruang ah cun.." Abraham he kan irem lo e.." ati tawn. Mah bantuk i Thlarau i ahman chung hi cu thlathum chung hrawng asi i aduh caan poh ah a um mi khi asi. Voikhat belte ni li chung apeh peh in ka ra lai i adonghnak ah rawl zong kan hrawng hna lai ati i cu ti ning te cun zaanchiar te arak ra tak i mitampi nih kan va hmuh ve. Adonghnak zaan i rawl an ei lio hoi hna cu khuaruahhar taktak khi asi. Chim zia thiam zong a har ngai. Ca ai ttial mi lak ah hin atambik cu Bible ca hi asi i a bia in ai ttial chel, acang i ai ttial chel ti hi asi. Hebrew ca i ai ttial caan zong a um i atambik cu mirang ca in ai ttial. A hramthok ah hin holh aphunphun ca in arak ittial na in " kan theih lo mi ca cun rak kan ttial piak hlah" ti in thla an cam i cu hnu bel cu mirang ca deuh lawng te in ai ttial cang. Ai ttial milak ah khua caan ahcun hngakchia forhnak bia te te zong khi arak ittial ttheu i Love, Have Fun, Wisdom, Truth ti te hna hi asi i " I am coming soon" ti zong hi voi tampi ai ttial. I am real, I am God, ti te hna zong ai ttial pah lengmang mi asi. Ca ai ttial tik ah hin khua caan ah cun saupipi ai ttial i khuacaan ah cun minute pa khat ah alo i adang ai ttial tthan ti khin nikhat chung ah voi 30 renglo te hna arak ittial. Acheu khat hi alo colh mi an um i acheu cu lo kho lo in thla thum chung te hna acaam mi zong an um. Ahnu bik ai ttial hi nai te i Texas i online Crusade kan tuah i kan tlun pah ah hawi nih an kan thlah i cu lio ah cun an lung chung in thlahnak Bible caang rak kan ttialpiak seh law a ttha hnga an ti cuahmah lio ah.. Psalm 37: 3-6 arak ittial i mah hi hi ahnu bik ai ttial mi asi. December 5 ah asi.
Hi khuaruahhar ca ttial hi zeidah aduhnak asi hnga ti hi ttha te i azoh mi nih cun fiang te in hngalh asi. Tuan deuh i kan rak chim mi bia ah khan kir tthan cang usih law Laimi hi aphungmen in Khrihfa kan iti hna i Khrihfabu chung ah cun kan ikhumh dih nawn na in Khrihfa taktak asi mi hi kan tlawm te. Khrih he ipeh tlai lo in Khrihfabu he lawng ai peh tlai mi kan si. Cu ruang ah kan zumhnak nih kan nunnak ah rian zei hmanh attuan ti lo i asual mi kan sual ning in kan sual ko mah le sining pin ah kan zumhnak nih zei rian hmanh a ttuan ti lo. Sualnak tuah lei ah kan ral a ttha chin lengmang i Pathian sunparnak langhter tu ding si ti lo in Sehtan Credit alaak piak tu ding Khrihfabu lawng te ah kan ichuah. Cu tik ah Bill peek hmanh athei lo mi Kaya miphun hna bantuk ceo te kha kan si hna i aho nih sik le caak zong ah ai remh kho ding kan si ti lo. kan zuding ning lebang cu aluan chin lengmang cang. Cu tik ah Khuaruahhar in Thiangthlarau nih rian a van ttuan i atu keimah ca ttial tu hna hi hi thil khuaruahhar hi um hlah seh law ka Wine din bu pi he Krihfa upa a ttuan ding men khi ka si ko. Khaini zong ka hmawm rih ve fawn hnga. Cu bu cun pei maw pei maw lo khin van cung khua kai ding khi ka hnabei ava sei ve rih hnga i cu ti i ka si ding ning i asi cuahmah mi mi tampi cu kan lung afim i ceunak tang ah khua kan sa cang hna. Pumpaak in tehte akhang mi hi an tam lengluang. Cu lawng cu asi lo....
Hi khuaruahhar thil athei i an inn arak ra mi hi Pathian mi hman tampi an um. Kawl ram i a um mi Sain Kyaw Tinh timi hi Pathian nih ahman ngai mi asi i cu pa cu Aching nih hin ake arak ttawl piak. Saya Sain nih cun pa khat hnu pakhat refer atuah vima ve dik hna ah Dr. Thein Htay, te hna, Saya Naga Kyaw Naing te hna hi an rak ra i cu hna nih cun amah hrim hrim hi an rak cawn piak. Atu i khuaruahhar i Pathian nih ahman mi Saya Naga Kyaw Naing hoi hna hi cu.amah um lio bak ah amah ca hrim i ttial mi Bible ca arak ittial i Pathian nih apeek mi fimnak hrim hrim in bia achim mi khi testify atuah piak bantuk khi asi. Bible cang peek arak simi cu 1 Theselonians 2:13 asi. Chim duh mi cu mah hi khuaruahhar Thlarau rian ttuan nak nih akah chin vima mi nih Chin miphun chung ah REVIVAL pakhat achuah pi cang ko ti hi acuan tu hna nih cun testify kan duh. Atu lio i Texas i Crusade atuah cuahmah mi Saya Naga Kyaw Naing kong hi holh in chim khawh lo mi tiang khi a si taktak. Vulei cung mji vialte lak ah Pathian bia athei cem asi ko lai an ti dih. Hi cawnpiaknak ttha te i ahram thok in adongh tiang angai mi cu sualnak chung in an luat dih lawng si lo in vanram i laksawng tarpak mi pakhat tal hmuh ai tiim mi lawng te an si cang ko. Atu ah hin Texas ah aum i Hmaizarh hi Indiana ah zaan hnih ariak lai cucun Illinois ah Khrismas ahmang lai i cu dih zong cun Maryland i a um mi Khrihfabu Pathum hrawng nih an booking cia cang ti in theih asi. Saya Naga cawnpiaknak a ngai mi Khrihfabu le angai lo mi Khrihfabu cu tu le meheh bantuk in kan idang thlerhmarh cang ko lai. Research tuah phu hrim hrim zong khi asi. Challenge ngam zong asi. Chim cia ngam zong asi. Zeicah ti ah Sehtan's Strategy tampi kan theih chih cang caah asi.
Careltu miphun hawi nih Thlacamnak zong in rak kan bawm ve rih uh, hi khuaruahhar ca ttial nih kan miphun chung ah achuahpi mi Revival hi atu hi a hramthok lawng asi rih. Caan zong hi anai tuk cang caah faak chin chin in rian zong ttuan asi rih ko lai. Sualnak chung in mitampi nih luatnak kan ihmuhnak, khamhnak kan ihmuhnak, families tampi an dir hmun le an sining athlen hna, cawnpiak tu ttha ttha he introduce akan tuah i cu hna hmang cun faak chin chin in Thiangthlarau nih rian a ttuan tik ah kan Khrihfabu hna nih hin Laudesia uniform an iphoih cang i Philadelphia uniform he Bawipa ton lai a hngaak mi zong an um leen cang.
Khuaruahhar Cattial nih a hrin mi Revival hi pehzulh aherh caah Website pakhat ser asi i hika ah hin Tehte khaannak le Phungchim Sermon zong khumh an si. Biatak akawl mi nih cun tlolh lo te in rak veh le rak leen tawn ding asi te lai. Website cu Thiangthlarau.com ti asi lai.
Bawipa nih Thluahchuah in pe ko hna seh,
Hluanku pa
MD, USA
Note: Cahang color pohpoh hi link an si i Click lengmang ding an si tawn lai.
