By - Evan T.H Tial Uk
Gen 8 : 6 - 7,Iking 17 : 3 - 6,Lev 11 : 15,Job 38 : 41
Vawlei a ser hi aa ngaihchih tuk caah Pathian nih cu Vawlei cu kaharwh lai tiin khua a ruah lio ah, a khua khan le a lai rel theihter ding ah, Mifim a kawl lo i, Mirum zong a kawl lo i, amah lungatawng mi le amah he lawng bia ai ruahmi Noah lawng kha biathli ruah a tim.
Pathian nih a biathli le a biathup theihter ding ah hin Vawlei ah Mifim a kawl lo i, mirum zong a kawl lo, a mah he lawng biaai ruah i amah duhnak lawng a kawlmi kha a lung bia le a bia nung a ruah i a theihter tawn hna. Noah cu Pathian aw a theih i Nunnak Lawngser dingin aa thawh tikah a nupi le fa nih nangmah nih na theihmi cu nangmah nih va tuan ko an ti lo, an pa theihmi Pathian aw cu chungkhar dihlak caah a si an ti i an chung ning in an zumh i, an tuan ti. Pathian nih chungkhar ah Nu maw Pa maw a biathli a kan theihter tikah hin, do tu le daltu si loin chnungkhar ning in kan tan ti i kan tuan ti ahcun chungkhar damnak le luatnak a si. AmenPathian nih a fial hna bantukin Lawng cu an ser i, 120 chung dinh lo tein an tuan, bantukin Minung nunnak caan cu Pathian nih 120 lawng nung cang hna seh a kan ti caah Noah te chung khar bantukin kan nun caan dih lak hi, Khamhnak Lawngsernak ah caan hman ding mui thlam a kan hmuhsak tu a si. Noah nih lawng cu a ser i, a dih tikah,a chungah khumh ding saram vialte kha Noah nih amah duhmi paoh khumh loin amah Pathian nih a thim piak i, Sathiang he thianglo he a khumhter hna, bantukin Khrih Jesuh nunnak lawng ah hin miding mi le Mifel mi hna ca lawng ah hmun a um lo i, Misual mi hna ca zong ah hmun a umnak kha a kan hmuhsak tu a si. Noah nih lawng a ser lio i, mihrut a ti tu vialte kha, Pathian bia bantukin Ruah a sur i, Tilian a tlun ni ahcun, a ho hmanh zaangfah in Noah nih Inn kaa a hunh ti hna lo a ruang cu amah nih Inn kaa a khar lo Pathian nih a khar caah a si. Minung kharmi cu a caan a phak tikah cun ai hung than leng mang ko i, Pathian nih a khar cang ahcun ahohmanh nih On khawh a si ti lo, Cucaah Ti cu a lian chin lengmang i, Noah Mihrut a ti i, fim ai cuh mi vialte kha Ti chung ah an thi dih i mihrut hna chungtu an nung. halleluijah, Fim ngang in Hell kalnak cha cun Jesuh ruangah Mihrut si i, Van kai ka duh deuh. Amen
Ti cu duhsah in a tum than tikah, Noah nih Ti a reu maw reu lo ti hngalhnak ah Palai thlah a timh tik hna ah, a pawng i a um mi Va tam pi lak ah a holh a tam bikmi le a dang a nal ngaimi Langak tu kha a thim i, Holh lo te le dai tein Nun dawh te in a um mi, Thuro kha thim loin holh cak phun le hro kual nawn in aw chuah a thiammi Langak a thlah, cu tikah langak cu a va zuang i, Noah nih zei dah a ka thlah hnawh chan a si ti kha ruat loin Ti in a thi mi Saruak kha a hmuh tikah, cu Saruak cung ahcun a thu i caan a hmang i, a tuah tawn bantukin sathu nam ah ai lawm i, thlah tu Noah sinah a kir ti lo. Unau, Noah a lungre a thei, asinain, Langak nak in Noah tu kha mawh chiat deuh ding a si, zei ruangah Palai thlah ai palh, mihman ai palh. Mission thlah ai palh, a ruang cu Nun in kawl loin Holh thiam le chimrel thiam lei in a kawl caah a si, a liam ciami caan i, sathu ei tawn mi,Mi chuncaw fir tawn mi,a si hngal ko nain, a hmanmi kha a palh cang. Nihin ah hin, kan ram ah a herh ngaimi cu, kan Pathian caah rian tuan tu ah kan i fial , kan i thlah tik ah hin, leng lei lawng in zoh lo in le, Biachim holh rel thiam le holh a cak mi poh le hro a kual mi poh thim lo in, zei hmanh chim thiam lo zong ah Nun in a langh ter tu hna tu hi kan i thlah ah cun hlawh tlin nak a tam hnga, a ruang cu , Langak thlah cu Lungfah nak le ningzah nak a si tawn. a donghnak ah Noah a lung a hung fim i, Thoro nun nem duh nung nun ngeitu, holh setsai lomi te kha, a thlah than tikah, Thuro cu Noah nih zeidah a ka thlah hnawh chan a si ti kha a philh lo i,baa ngai in ai chawk i, rethei ngai in a Bawipa caah ah a zuang i, Oliv thing hna te he thlahtu Noah sinah a rak kir than. halleluijah Thuro nun ngeitu hna nih cun chim le rel thiam lo zongah thlah tu Pathian nih Vawlei ah zeidah a ka thlah hnawh chan ti kha an theih i, baa lengmang in chuk le cho an kai i mitthli le thlan ti he an kal i, Thlarau Oliv hnah te he thlah tu Pathian sinah an rak kir tawn. halleluijah Dawtmi Unau hna Pathian caah le a ram kauhnak caah kan hmanmi hna hi, ruah a hau ngai ko rua, Langaak hna kan hman sual ahcun ningzah tertu a si lawng si loin, Oliv hnah cu chim lo in anmah hrim kha kawl than an hau te lai, Thuro nun ngeitu a bawipa caah zumh awk a tlakmi nun te hi kawl zia thiam ko hna usih.
Cu langaak, Saruak i a tlaumi, thlahtu pa lungfah tertu, ningzah tertu cu, Pathian he an i tawngthan i, Pathian Bianih a tlaih ve tikah cun, a piangthar i, zumhawktlak le hmanrua tha ah ai chuah than. halleluijah Nihin Zuu le saa, kuak, Khaini, Phe tbk sualnak phun2 par a tlanh i a tlau mi hna zong Pathian Biatak an theih ahcun cu an theihmi Pathian Biatak nih cun a thlen hna caah hnu lei caan i zumhawk a tlak tawn lomi kha a tu cu zumhawk an tlak than cang. Amen Langaak te zong cu a piantharnak kha a kaa in a chim ti lo, a nun in a langhter i, Vuidang i, Sa aduh tuk tawnmi kha, a pianthar hnu ahcun, Elijah rawl petu ding ah Pathian nih a hman i, lampi ah Pathian nih a kenter mi Sa le Chang kha pakhat hmanh a ei ti lo, zumhawk a tlak cang. Unau, Pathian Biatak nih a thlen cangmi hna cu leng lei hmul le, Mui le sam ai thlen lo zong ah chung lei nun ai thleng cang caah, hlan i din le ei tawnmi le tuah tawnmi, thil tha lo kha an hrial cang.
langaak nun in zum tu nun cawng hna uh sih.
bawipa nih thluachuah pe ko seh
