ttp://listverse.com nih vawleicung ah a makmak 10 ti phun in a ttialmi tete umhar phenah ka rel hna i mah lakah a si ngai taktakmi ah ruah awktlak ngai ka timi cu, vawlei a nawnnok khotu cauk 10 kong hi a si. Amah bel, a pakhatnak (first a pekmi) cauk hi ka khuaruah a ka harter ngai. Minung zumhnak le pomning a rak idan deuh ruangah a rak cangmi thil a si rua.
Mah (10) lakah a kong thei awktlak deuh ah ka ruahmi pawl lawng tlawmte in hrilhfiah khawh ka von zuam lai. Rel huammi nan um ttheo lai tiah…
1) Darwin's Black Box: The Biochemical Challenge to Evolution (1996, first edition; 2006, second edition) Biochemist Michael Behe timi pa nih a ttial. Mah hi cauk cu, van le vawlei zeizong vialte le thilnung (a bikin minung) vialte hi amah tein aa tharchuah i a cangmi an si siloah amah tein a rak cangmi an si ti ruahnak Darwinism a si khawh lonak langhter khawhnak dingah alnak ttha ngaingai cauk a si tiah an ti. Amah Behe hi Fundamentalist Khrihfa zong a si lo i, Darwinism a pommi zong a si lo. Behe nih Intelligent Design timi, a fim taktakmi (Sertu Pathian) lawng nih zeizong vialte hi a rak ser hmasa ti kha a cauk chung cun a kalpimi a si. Tikah, Khrihfa kan caah cun kan zumhnak a bawmtu scientific cauk a si kan ti ko lai. Sinain…
Minung a buaitertu cauk cazin chungah an khumhnak a sullam cu;
Scientist miza taktak nih mah ti’n a kalpi tikah, Khrihfa zumhnak lei ah fundamentalists timi pawl nih mah cu a cauk cu itlaih in Darwinism cu a hmaan lo ti dohnak ah an hman i, cu lawng si loin sianginn tampi nih Darwinism cawnnak kha an khapter hna (Scientific truth kawlnak an khenkham an ti). Zei ruangah dah mah ti’n an ti ngam ve tiah cun, mah cu Behe i a scientific research cauk cu adangdang amah bantuk thiamnak a ngei vemi pawl kha cauk chuahtu nih an rak chuah hlanah a rak zohter ve hna lo (peer review a tuahter hna lo) tiah an ti. A hramthawk ahcun, peer review a tuah ko tiah thli an thlah. A tuahpiaktu minung 6 an timi nih, “kei cu ka tuah lo!” a timi le “a ttialmi hi a dik deuh lo!” “scientific truth a si tiah proof a pe kho lo!” tiah an ti tikah a cauk kha man ngei lo bantuk ah amah bantuk (amah fimnak field minung) pawl nihcun an cohlang lo tinak a si hnga.
Hi cauk kong ah cun cu vial in si rih sehlaw…
2) The Manifesto of The Communist Party (1848)
Communist ruahnak pa bik Carl Marx le Friedrich Engels nih an ttialmi cauk a si. Saihkuyin communist ram dik taktak va um kho ko hmanh sehlaw, hi cauk nihhin thil tthalo ruahnak le tuahsernak tampi a hrinter tiah an ti. Bianabia an lakmi chungah cun, minung pakhat nih vawlei kaupipi ngaih khawhnak tehna hrawh dihnak, mipem (mi ram in a hung lutmi hna) ngeihchiah chuhnak tehna, ngunkhuai tor le cheng thawhternak tehna, roco khawhnak tehna hrawhpiak ti tehna an si caah tiah an ti.
3) The Protocols of The Elders of Zion
Mah hi cauk a ttialtu hi an thei lo. Judah miphun a huatu nih an ttialmi a si hrim lai tiah an ruahmi cauk a si. Judah miphun hna nih anmah miphun an ikilven tuk tik, an ram le an vawlei hlam duh tthannak tehna an ngeihmi kha a rak huatu nih ttial dawh a simi cauk a si.
Cauk chung ttialmi kong:
Judah miphun hna nihhin vawlei cung pumpi ah anmah a bawi bik, anmah lawng a thiangmi miphun kan si tiah an upa hna nih an iceih i hmailei vawlei pumpi uk dih dingin an itimhtuahnak kong an ttial. Mah hi cauk ruangah Hitler nih Judah miphun cu a fih in a fih hna. Russia pawl zong nih Judah miphun cungah huatnak a ngeihter hnanak cauk a si. Cu lawng loin, Nichuah Laifang kan timi Middle East hrawnghrang ah mah hi cauk hmete cu nihin ni tiang an zamh peng rih. Cu nih Judah miphun cungah huatnak a chuahter tiah an ti.
4) Baby and Childcare;
Siibawi Benjamin Spock nih 1946 ah ngakchia zohkhenh ning kong a rak chuahmi cauk a si i, ngakchia zohkhenhning kong ah a rak ipalh ruangah ngakchia thihnak a let in an rak karh ti kha nihin ni siilei thiamnak a ngeitu hna nih an hun hmuhtthanmi a si.
5) Democracy and Education;
John Dewey (1916). Hi cauk ruangah “zeihmanh hi a dik bik ti a um lo, a hmaan bik ti a um lo” timi ruahnak a chuahter ruangah, cacawn a herh leem lo timi ruahnak a chuahter lawng si loin, cacawn nakin a min degree a biapi deuh timi ruahnak a chuahpi tiah an ruah. Library fimhlawm ningcang i Dewey System timi a rak chuahpitu Melvil Dewey he cun an ikhat lo!
6) The Pivot of Civiliazation;
Margaret Sanger nih 1922 ah a ttial. Ca rel huam nih nan hmuh balmi cauk si ttheo lai. Nain, a rel cu nan zuam theng lai lo, ka zuam phun si ve lo!
7) Mein Kampf;
Adolf Hitler nih 1925 ah a rak ttialmi a si. Hitler nihhin The Protocols of the Elders of Zion timi a rel hnu, cun Shakespeare ttialmi Shylock ti bantuk tehna a teh hnu, le a mit hmuh ah huat chuak tlai in a nungmi Judah miphun huatnak karhnak lawng si loin, vawlei pumpi uktu dingah aa tlakmi miphun an sinak kong a ttialmi cauk a si. Cu nihcun German mi tamtuk lam a rak pialpi hna lawng si loin vawlei pumpi tiangin a rak buai ti cu zapi hngalh a si. Kawlram zalennak hmuh hlan deuh, U Saw chuahmi Thuriya tadinca (The Sun)nih Mein Kampf timi cauk chung bia kha Kawlholh ah let in a serial in an rak chuah ve.
8) The Prince;
Italy miphun Niccolo Machiavelli an timi siangpahrang fapa ruahnak petu pa cu Florence khua ah an rak tthawl lio 1532 ah a umhar tuknak ah uktu tleihtleng phun cauk kha a rak ttial. A thih hnu ah The Prince tiah an chuahmi cauk a si. “Hruaitu hna caah cun,” a ti, “velngeihnak, dinnak, zumhtlak sinak, minung upat thiamnak le biaknaklei ah ipeknak tehna hi a biapimi le a herhmi an si lo,” a ti. Mah tthatnak vialte a ngei bantuk in i-umter khawh ding tu khi a herh bakmi a si tiah a ti. A tlangpi cun, “Hruaitu caah tthatnak nakin, zirtiannak a biapi deuh” ti khi hi cauk nih a kalpimi cu a si. Stanlin, Hitler, Mussolini, le Napoleon i tehna kha hi cauk nih zirtian fimnak a rak chimhmi hna a si tiah an ti.
9) Coming of Age in Samoa;
Hngakchia psychology tthanchonak kong ah cauk tthattha a ttial khotu mifim nu Margaret Mead nih 1928 aha rak ttialmi a si. A research tuahmi ah ‘an chimmi bia paoh kha, ee a ti hna ruangah’ tampi a rak ipalh i, hmuhthiam lonak a chuahtertu cauk a si tiah an ti.
10) Malleus Maleficarum;
Heinrich Kramer le Jacob Sprenger nih 1486 kum ah an rak chuahmi cauk a si. Kan hnulei YCCF ah rak ceih lulhmi hnam dawi pawl le hnam kong biaceihtu hna caah kutken caah an rak chuahmi cauk a si. Zeitindah hnam cu nan tlaih hna lai i, an cii nan hmih hna lai timi kong ttialmi cauk a si. Voi tamtuk an nam tthang lengmang. Hi cauk ruangah kum a zaa zaa in hnam dawi le thahnak an rak tuah ti si.
Sincerely,
Ceupi
