By - Hai Vung Lian
Christmas caan cu kum khat caan ah, a nuambik mi caan a si. Siangngakchia caah a rak nuam khun. Christmas khar cu kan rak i ngaih tuk hna. A rak sunglawi tuk. Christmas sianginn khar lai, a donghnak sianginn kai ni cu a nuam khun tuk. Thinlung a dai; lunglawmhnak lawng tein a khat. Inn phak lai le nu le pa chungkhar sin phak ngaih tuk lio caan a si.
Hi lio caan ah, Illinois Ramkulh nichuahlei ummi, leituahmi hna khua khuafate pakhat cu, mithli le hnapduk he an um hna. Zeicatiah, innchungkhar pakhat cu an chung tein meithal kahnak in an thi dih caah asi. Palik nih "Mithattu hi kan kawl lo; zeicatiah a thimi hna lak ah hin aa tel ve ko rua tiah an ruah caah a si" an ti. Athimi hna hi an min an chim rih hna lo; chungkhar thawng kan thanh hmasat hna lai ti a si. Cu a thimi hna lak ah, patling le nutling, ngakchia thla 6 pakhat, tangkhat a kaimi le tang 4 kaimi pa te an itel hna. Cu hna innchungkhar cu, cuka khuafate ahcun a liamcia thla 6 ah a rak i thial mi mithar an si. Hi khua hi khuafate a si; minung 100 kuakap umnak khua, lotuahmi hna khua asi; rian zong aum lo; carek pakhat, lumehnak dawr pakhat le a um; cu carek hmanh cu cozah nih phih dingah an timh lengmangmi asi ti a si. Business tlawmte lawng a um mi khua asi; khuanu khuapa hna hi pension la ciami le lo tuahmi deuh lawngte an si; an har ngai caah cozah bawmhnak deuh bochan in a nungmi an si hna ti a si. Minung nih tlawm; sifah chinchap; tar lawngte deuh va si hawi; culio i atu bantuk in mi pemka, mino tete chungkhar dihlak meithal in an van ikah tik ah, khuachung zeitluk in dah a va muih hnga? Zeitluk in dah lung a va rawk hnga? Khuami caahcun Christmas lawmhnak hrimhrim a um kho ti lai lo. Hi a thimi an fale tang 1 le tang 4 kaimi cu, Saunemin timi khua ah sianginn bus in an kai. An thih ni hi, Ningani a si; Christmas khar lai sianginn kai a donghnak ni a si. A thimi hna unau an hna cu, "Christmas khar lai asi caah, an i nuam tuk hringhran" tiah an innpa pa, an mah he a kaitimi pa nih a ti. "Inn an phak tlawmpal ah, meithal zun 6-8 puah thawng kan theih; cu hnu ah zun 4-6 kar kan theih than" tiah an innpa pa nih a ti. Palik an auh tik hna le an va zoh tik hna ahcun, an chungkhar tein an rak thi dih cang. An unau tein nuam tein inn an rak tinmi cu, "meithal kuan" tu nih arak don hna ai! Hi bantuk Christmas caan sunglawi le siangngakchia fale hna caah a nuamh bik lio caan ah, nuam chiammal le mithmai panh tein a rak tlungmi fale hna, meithal in rak don cu dah ngai, minung fa ruah ngam asi lo ee; tuk a sum hringhran. Zeithei lo in, nu le pa sin ah nuam chialmal tein an rak tlun lio ah khan, an unau tein zeikhua dah an heri ruah hnga? Zeitik dah nu le pa sin kan phak lai tiah ngaih lengmang in rak tlun lio caan i, runinn chung in, meithal he rak don cu dah ngai lungfah celh a um hrim lo ee.. Vawlei hi sualnak in a khatmi a si. Daihnak Bawi, Messiah chuah lio hmanh ah, a chuahnak khuaram hmanh ah remnak le daihnak aum kho lo. Jesuh chuah lio ah, hringtu nu hna mitthli a rak tlak bang, nihin i a thimi hna ngakchia 3 hna ruang ah hringtu nu hna mitthli a luang than ko... "Ramah khua chung ah thawng a thang; cu thawng cu tahnak le aihramnak thawng a si. Rachel nih a fale cu a tah hna; an dihlak in an thih dih caah a tap lengmang ko i, ngamh khawh a si ti lo" (Matt 2:18) Jesuh chuah lio ah, ngakchia hna nunnak lak ruang ah, Rachel a rak tah bantuk in, nihin ni ah Illinois khuafate zong ah, zong ah Rachel a tap ve than. Rachel mitthli a luang ve than....
