Baibal caang thim : Caliti 6:7 "Nangmah le nangmah naa daw maw? Mi nih a tuhmi cu a zun than lai."
Minung a simi paoh nanmah zawn naa ruat maw? tiah bia kan hal hna seh law, kaa ruat ko kan ti cio ko lai dah. Asinain mi tampi cu kanmah zawn kan i ruat kan ti tawnmi hi palh ruah in kan i ruat tawn. Mi cheukhat cunikhat, zarhkhat, kum khat ca lawng ah a thami a si hmanh ah that lonak tuah, fir, lih bia chim tuah hi kan zei a poilo. Cucu kanmah le kanmah kan i dawt lo a si. Mifim nin nihin kan tuahmi hi hmailei kan tuanbia a si an ti. Lai phungthluk ah na tuh bang in na zun lai, biachim thalo mah kung tlung, tibantuk in phungthluk kan ngei. Greek nih minung kan chimmi hi a zuang lengmang i, tlang ah aa fu, a rak kir than i futnak a theih lo caah, a chimtu pa tak cungah a tla an ti. Bible zong nih na tuh bantukin na zun lai an kan ti, cu caah minung nih hin kan tuhmi hi kan zun ko lai. Kan Bible ca chungah Zakop nih apa fa upa ka si tiah a hlan ruang ah Jacop cua fale nih na fahniang cakei nih a seh tiah an hlen ve. Cucaah Chin fanau hna nih kanmah le kanmah kan i dawt ahcun thil tha kan chim ding a si.
Voikhat ah Jesuh le a zultu hna khual an tlawng i an baa ngaingai. An paw a tam an ti a hal, Jesuh Khrih nih an retheih a theih tikah lung nanmah chal khaw tawkte pakhat cio char uh a ti hna. Piter nih a tha baat lung in a hmete a char. A dang nihcun an cawi khawh cio in an char. Jesuh nih thla a cam i, nan lung charmi zoh uh a ti hna, an zoh i changreu ah aa cang. dang cu khim tein an ei. Piter cu a eikhim lo. An i thawh than i thepse cung a si caah an ke thepse nih a linh hna. Jesuh nih Lung pahnih cio in i char uh a ti than hna. A dang nih an cawi khawh tawk cio keh orh in an i char. Piter nihcun changreu aah canter sual ah a ti i, orh lei in a nganpi aa char. A canter lo sual ah a ti i, keh lei in a hmete a char. An char dih in Jesuh nih thla a cam than i, nan lung cio zoh uh a ti hna. An zoh i, phanah ah aa cang. A dang cu an i zatawk cio a si i, Piter cu orh lei a saupi keh lei cu a tawite i aa danh kho lo.
Cun Bible chung babel innsang an saknak kan zoh a si ahcun mipphun kip an tling, saram phunkip an tling, anmah le ti khawh tawk cio in rian an tuan hna. A cheu nih tlakrawh an thir. cheu cu thepse an ril, a cheu nih ti an than. Zu fate nih a tuah khawhmi zei hmanh a um lo tikah tel lo le tuan ve lo nih a duh fawn lo cu caah ti kam ah ti a va hnim i thepse cungah aa lawng (bual). A pum cung i thepse a kep (benh) mi kha inn saknak ah a kaipi i a thik ve. Pakhat hnih in an tla. Cu ti a tuahmi cu an bawipanih a hmuh i aa lawm ngai. A vakal hnawh i zoh hmanh uh zu fate nih zei hmanh a tuahkhona lo in a tuah khawhmi hnih khat te thepse a thlak ve. Aa dawh tuk a lungput hi a ti i a keeng ah a kut zung hnih in a mawih. Cu zu te cu atu leitial khi a si. Nihin ni tiang aa dawh thai. Cucaah kan nih Chin fanau hna zong nih kan Chin caah le kan khua le kan ra caah thil tha kan tuah kan chim ahcun hmailei kan tuanbia a tha in kan tial a si. Kanmah lekanmah i dawh hna usih. Kan hmailei daw hna usih. Kan tuh ning in kan zun ko lai ti hi hngal hna usih. Thil tha tuah hna usih. Ci tha tuh hna usih. Bawipa duhnak tuah hna usih. Midang zawn ruah hna usih. A pennak le a ram kawl hna usih tiah kan sawm hna. Kan zapi caah Bawipa nih thluachuah pe ko seh.
Lawmhnak tampi ka ngei.
Rev. Biak Cin Thang
