By - Rev. Lal Pek Lian
“Keimah nih keimah kong kha kaa chim a si ahcun ka chimmi cu ahmaan taktak ti awk a si hnga lo.” Johan 5:31
Mah le hma hmunlai i rak i chiah tuk hi kan Pathian hmanh nih a duh bak lomi a si. Mah le mah ngan tuk in i hmuh zong hi nunnak ah i suknak tamtuk a chuahter. Voi khat ah ka rianttuan hawi khrihfa upa pakhat nih bia a ka ruahmi cu: “Veimu, kanmah le kanmah vui tia in kan i hmuh lio ah, midang nih cun meheh tia hrawng lawng in an kan hmuhning a si,” a rak ti. Kan fanu kan fapa hna hmanh an muichiatnak, an santlaihlonak lei in hmuh piak cu ahohmanh nih kan duh lo i phung an rak thlukmi ah “Mi hmuh ah chiakuk, mah hmuh ah tthavaang,” ti a rak si. Voi tampi cu kanmah le kanmah hi vui tia in kan i hmu sual tawn i; kanmah duhnak zong kha vui tia bak a si tik ah kan covo asiloah kan hmuhkhawh tawk kha caw tia lawng hoi hna a hun si tik ahcun lungthin buainak nih a kan nenh tawn ko. Bawi Jesuh cawnpiaknak hi a taza (fair) tukmi pakhat cu: “nangmah naa dawt bantukin na inn pa kha va daw,” ti a si. Kanmah nakin kan innpa kha zeitikhmanh ah kan dawt khawh lo ding kha fiang tuk in a rak hngalh cangmi a si.
Bawi Jesuh nun nih an nun a thlen i Amah lamhruainak aa bochanmi hna caah cun mithiang Paul le a hawi le bang kan hun chim khawh ve dingmi cu: “Kanmah kong kha ka chimmi a si lo, kan chimmi cu Jesuh Khrih kha Bawipa a si i kannih hi Jesuh ruangah nan sal kan si,” ti hi a si (II Kor. 4:5). Bawi Jesuh nih a Pa chimhta lo in amah nawl in a tuahmi a um lo. Johan Thawngtha chung ahhin kan Bawipa Jesuh Khrih a rianttuannak kan rel tik ah a thlahtu a Pa a upatning, pakhat an sining, rian an ttuan ttining vialte rel khawh a si i Johan Thawngtha duh a nun khunnak zong a si tiah ka ruah. Kan Bawipa Jesuh Khrih lungput hi cu sol lo timi khi a si ko, a zei ti lei hmanh in soisel khawhnak kan ngei kho lo; Paul bantukin kan uar tuk ve i kan i cawn ding lawng a si ko: “Pathian sinak kha a ngeih zungzalmi a si ko nain hramhram in Pathian tluk si awk kha cuh awk ah a rel lo…” a ti (Filipi 2:6-11). Tipil petu Johan a rakrat chungnak a biapit khunnak cu Jesuh Khrih kong a rak chimchungmi le tehte a khaanmi hi a si. Aho nawl in dah bia na chim tiah rapfawih an timh lio zong ah Bawi Jesuh nih Tipil petu Johan kong kha a hun charnak rel khawh a si (Matt. 21:23-27). Kan Bawipa Jesuh nih fiang tuk in a kan chimhmi cu: “Keimah lawngin zeihmanh ka tuah kho lo; Pathian nih a ka chimhmi ning lawngin bia ka ceih hna; keimah nih ka duhmi kha si loin a ka thlahtu nih a duhmi kha tuah kaa zuam caah ka biakhiahnak cu ahmaanmi a si.” A ti (caang 30).
Tuanbia pakhat te in kan hun chim ta lai. Tlang tibual pakhat a um i Chungchep le Tingala nu va nih an toh. Thal a hun chuah cun ti zong cu a reu ciahmah ve. Chungchep nih Tingala nupa cu ruahnak a cheuh hna. Pawngkam hrawng ah tidil ttha kawl a fial hna. An va kawl i an hmuh taktak. Cu ka hmun i i tthial ding ahcun Chungchep kha zuanpi ve a herh. Funghreu pakhat ah an hmur in seh veve i zuanpi a herh. Biahrennak an ngeihmi cu an zuan pi lio ah holh bak lo ding ti a si. An hun zuanpi taktak tik ahcun khua pakhat cung an phak zawn ah ngakchia rual nih: “Zah hngal lo Chungchep,” tiah an nihsawh i an hauh. Pu Chungchep cu a thin a hung tuk nain holh lo tein aa suum kho. Khua an hei lonh deng ahkhin upa fim rual biasawng a rak tlorhmi nih an hmuh ve hna. Annih tu nih cun nihsawh lo in “cu tluk fim hna cu ee, aho ruahnak le fimnak ko dah a si hnga?” tiah an i hal len. Chungchep cu aa tuar kho tilo i “keimah ruahnak cheuhmi a si,” tiah a hun chim i a ka a pau tik ahcun aa sehmi thing kha a rak thlah ve tik ah a tla i a thi an ti. “Keimah” timi tih a nunning cu thihnak tiang hmanh a chuahpi khawh ko. Nihsawhnak hi cu a tei khawh rih nain faknak cu ‘keimah’ timi nih a tei kho tawn lo. Mah kong aa chimmi si lo in; mah duhnak lawng ngan tuk in aa hmumi si lo in, Jesuh cu Bawipa a si tiah Paul le a hawile hna bantukin tehte a khaangmi si cio hna usih.
