Bawipa nih thluachuah in pe cio hna seh.Amen. Tuanbia tawi tein thazaang la `han hna usih. A hlan ah mipa pakhat a rak um. A nupi nih fa a hrin piak kho lo. A lung a dong tuk i ka nupi hi fale a ka ngeih piak kho fawn lo i ka mak lai tiah a ti.
Amah belte ka dawt tukmi le a ka dawtu a si
caah ka ngeihmi lakah a duhmi paoh i lak law kal ka ti lai tiah a ti. A nupi cu
a auh i kan ngeihmi lakah na duh bikmi i thim law kal tiah a ti. Na cungah zei
sualnak dah ka ngeih ka ngai thiam ko tiah an nu nih cun a ti. Fa na ka ngeih
piak khawh lo caah kan inn chungah a ummi le kan ngeihmi dih lakah na duh bikmi
i lak law kal ko tiah a ti `han. Cu tikah an nu nih a si ahcun rawl kan ei ti
ta lai a ti i rawl a thawt khawh chung thaw in a chuan i an ei. An eimi rawl
chungah mit kuh si a phulh piak i an pa cu a ngilh. A hngilh karlak ah motor
cungah a khin i a ta le inn ah a kalpi. An pa cu a si a dih i a hun i hlau. khua
a zoh i an nu a hmuh. A pu le inn a si fawn. A thinhung tuk i zei ruangah dah
hi ka ah hin na ka kalpi nangmah cu kan mak cangmi pei na si cu tiah a ti. An
nu nih hmaipanh tein kan pa na chimmi bia kha na philh maw? Na ka mak lio ah
pei kan inn chung i a ummi le kan ngeihmi dih lakah na duh bikmi i lak law kal
na ka ti kha. kan ngeihmi le kan inn chung i a ummi dih lakah nangmah kan duh
bik caah nangmah kan kalpi tiah a ti. Cu tikah hi tluk i a ka dawmi hi khua zei
hmanhah ka hmu kho lai lo a ti i inn ah a tinpi `han ti a si. An ngeih mi vialte
a ngeitu an pa a thim caah an pa nih a ngeihmi vialte a mah ngeihmi ah a cang
dih. Motor i thim sehlaw a dang kha amah ta a si kho hnga lo. Sui le a dang
dang thil i thim sehlaw a thim lomi paoh kha amah ta a si lai lo. An pa a thim
caah a dih lak in amah ta ah a cang dih. Thim thiam a biapi tuk. Kan nih zong
thim zia kan thiam cio a herh ngaingai. Micheu cu zeizong vialte a ngeitu
Pathian i thim loin a ngeihmi tu thim kan hmang. Cucaah cun fimnak a thimmi nih
fimnak an hmuh nain a dang thluachuah an hmu lo. Rumnak a thimmi nih an rum zongah
a dang thluachuah an sung. Cu bantukin a thluachuah kan i thim ahcun a
thluachuah cheuchum cu kan hmuh lai nain a dih lak in kan ta a si kho lai
lo. Sihmanhsehlaw zeizong thluachuah ngeitu kan Pathian kan i thim ahcun a
ngeihmi vialte kan ta a si ve lai. Zei dang vialte nakin a pennak le a ram kha
kawl hmasa ulaw zeizong vialte chap nan si lai. Pathian kha pakhatnak ah chia
cio ko hna usih. Bawipa nih thluachuah in pe hna seh.
Arian thian ah,
Evan.Za Kian
