Tlang Khat Par ti Lio Caan Ka Ngai

Semnak Lairam, mitthlam a cuang 

Zing khuasik caan, khuadei hlan ee 

Arkhuang ai lo, kan tlawn lio caan

Ti Ngahring dawi, Timit va hrawn
Seino leengvaal, Tiva kuang kam
Ngaleng ngapum, par phun an tling
Vaurawng par nih lunghlau tawn ee.

 

Tin caan a cu, Ni a liam cang

Ngahring sei le Nga songkhuai he

Semmawng rual le khukthirual cu

Timit chosang kaiti tawn hna.

Farkung hna le Kuhchuk theihmung
Thuro va le Fiakfai va aw
Zaihla dawh he inn lam panh ee. 

 

Kan tlonleennak nehbuar thing cu

Zaanmang bang ee, king riangmang cang

Khuachim tluangdang kan vai ai ee

Lungrualte in lengti thlaimai

Tlangkhatte in kan par lio caan

Ka ngai ruangmang, zuunthing tuar in

Tuanbia bang maw an cang ai ee.

 

Phoebe Vang