Isaiah 9:6 ‘Kan caah ngakchia pakhat a chuak, fapa pakhat pek kan si. Amin cu khuaruahhar, Fimchimtu ….. ti a si lai’
Thlacamnak: “Ka Pa, na bia cu nangmah lila nih ttanh tthan law, nihin zong bia kan chim rih ko. Thlarau bawmhnak kan sawm. Na kan bawmh tizong ka zumh caah ka lawm. Ka Bawipa Jesuh min in thla ka cam. Amen’
Pathian fale hna, damnak le kan nunnak a zuahrih tu kan Pa Pathian a min thangthat si ko seh. Nihin ah pehthan ka duhmi cu, Fapa Jesuh a min kong hi a si. Thlacamnak he rak rel ve ding ah kan sawm. Dawtmi hna, profet Isaiah nih a rak chim chungmi kan Bawipa Jesuh min kong ah ‘khuaruahhar’ timi kong cu kan chim cang. Tuzarh ah ‘Fimchimtu’a sinak kong pehtthan hmanh usih. Pathian fale hna, Fimchimtu a sinak hi nihin tiang a lang ko lo maw? Pathian Fapa Jesuh fimchimhnak lo in zeidah kan tuah khawh taktakmi a um e? Vawlei kan cuanh tik ah mi tampi nih Fapa Jesuh cu an hlawt. Fimchimtu a sinak kha an cohlang duh lo. ‘An siangpahrang hna le uktu bawi hna nih Bawipa le Bawipa thimmi (Mesiah) doh awk ah khua an khan’ (Salm 2:2, Lamkaltu 4:26-28) tiah kan hmuh lehlam. Pathian hngallo vawlei nih vailam ah an thah. Asi nain a hngallo mi cu an hngalh lehlo cu teh tiah ti awk an si rih. A hngal ko nain a ruahnak aa hrawmlo mi, a fimnak zei ah a rello mi zumtu pei kan tamtuk leh hi. Voi tampi cu pastor le evangelist nih pei mah ruahnak lawng in kan kal tawn ko hi. Hruaitu upa hna nih mah duhning in pei Khrifabu, Khrih pum, cu khalh kan timh peng ko hi. Pathian fale hna, kan zeizong te ah amah ruahnak hal ko u sih. Amah cu kan fimnak a si, amah hngalh cu fim hram zong a si, amah he nun cu fimnak lungpi cung ah innsak a si, amah he sianginn kai, lothlawh, thingphurh in, chawdawr tuah le ramrian ttuan cu hlawknak a si. Jesuh cu kan fimnak a si. Amah cu fimchimtu a si.
Pathian fale hna, Pathian bia hi ngaihmanh u sih: ‘Ka fapa, fimnak (Jesuh) lei ah nan hna na chit i… hngalhthiamnak (Jesuh) lei ah na lung na pek ahcun, an ven lai i, an zohkhenh zungzal lai....Na lungchung ah chia law, sang pi ah an cawi lai…I pom law, upatnak an phak ter lai.. aa dawhmi pangpar rual na lu cung ah a chiah lai i, nangmah cu sunparnak luchin an pek lai.. (Phungthluk 2, 4) David tefa chung in siangpahrang thar pakhat (Jesuh) a chuak lai: Ami kha a uk khawh hna nakhnga Bawipa tthawnnak nih amah cu fimnak le hngalhnak le thiamnak a pek lai, Bawipa duhnak kha zeidah a si ti a hngalh lai i, Bawipa cu a ttih lai’ (Isaiah 11:2) Pathian fale hna, Jesuh cu Lam le Biatak le Nunnak zong a si (Johan 14:6). Zungzal nunnak a ngeitu cu amah a si. Khamhnak lam a kan sialpiak khotu cu amah lawnglawng a si. Pa sin phanhnak lam cu amah lawnglawng a si. Jesuh cu Fimnak zong a si, Fimchimtu zong a si. Zungzal nunnak tiang a kan chimh i, zeitindah cu nunnak cu kan phanh khawh lai timi zong a kan hmuhsak.
Amin cu Fimchimtu ti a si lai.
Bawipa nih sunparnak co ko seh law, kan dihlak caah thluachuahnak kan pekpiak ko seh. Amen.
