Isaiah 9:6
‘Kan caah ngakchia pakhat a chuak, fapa pakhat pek kan si. …’
Luka 2: 4 ‘Josef cu Galilee ram Nazareth khua in Judea ram Bethlehem khua timi Siangpahrang David chuahnak khua ah khan an kal…. Tuzan hrimhrim ahhin David khua chung ah nan Khamhtu kha a chuak cang – Khrih Bawipa cu!
Thlacamnak: “Ka Pa, na bia cu nangmah lila nih ttanh tthan law, nihin zong bia kan chim rih ko. Thlarau bawmhnak kan sawm. Na kan bawmh tizong ka zumh caah ka lawm. Ka Bawipa Jesuh min in thla ka cam. Amen’
Pathian fale hna, Krismas hi sullam tampi in chim cio a si. Nihin ah kei zong chim ka duh ve mi cu, ‘Krismas cu Pathian nih minung a kan kawlnak tuanbia a si’ tiin. Thlacamnak he rak rel ve ding ah kan sawm.
Dawtmi Pathian fale hna, Pathian nih minung a kawlnak hi kan hnulei kum thonghnih lio i a Fapa Jesuh a hon thlahnak nih a tlinter. Bethlehem cawkuang thengte ah a hong chuak i, minung tuanbia chung ah minung in a hong lang. Cu thil lianngan nih cun minung tuanbia tamtuk a thlen i, a fianter. Khamhnak kong a fiang, Pathian tinhmi a fiang, a biakam a fehter hlei ah, Fapa Jesuh nih kum sawmthum renglo nunnak in a kan langh piakmi hmanthlak cu kan fiang ngaingai. A chuahnak kong ah khuaruahhar a sinak kong, a min hrimhrim a sunglawimi a sinak kong le ngaknu thiang in chuahnak, mifim mi le tukhal hna nih biaknak, vanmi choir saknak hna vialte pinlei ah a ratchannak te cu a um ko. Cucu sual ruang ah ningzak in nencawk lak ah aa bualmi nang le kei tlanh awk ah a rat channak a si.
Dawtmi ule nau hna, hi thil lianngan hi Bethlehem in ai thokmi a si lo. Adam le Eve umnak vawlei, Eden dum in a rak i thok cang. Cucaah cawnpiaktu tampi nih, Eden dum cu ramthar riantuannak hmasabik hmun a si an ti tawnnak a si. Genesis 3:8, ‘cu ni zanlei sang ahcun Bawipa Pathian cu dumchung i aa chawh kha an theih i…..’ tiah kan hmuh. Hihi khamhnak rian aa thoknak cu a si i, thlahmi cu Bawipa Pathian thengmang te kha a si i, a ram cu Eden dum kha a si. A rian cu, sual ruang ah aa thupmi mitlau (Adam le Eve) kha kawl i khamh kha a si. Pathian nih Judah miphun zong aa thim i, vawlei caah a timh hna nain an tlolh lengmang. Profet zong a thlah tthan lengmang hna, a sinain an hnu ah a ra dingmi Mesiah kong chimnak tu in an i hnem ve. Kum thonghnih chung zumtu hna nih kan nun hnawhmi cu Bawipa Pathian, vancung kan Pa nih a rak thokmi hi a si. Amah lungthin chung in aa thawkmi a si. ‘Ei hlah,’ timi nawl ngaihlo ruang ah sualnak chung i kan tluk ahkhan cunglei ah khuakhannak a um cang. Cu khuakhannak cu hihi a si: Eden dum in thokmi a tlaumi kawlnak rian cu Bethlehem cawkuang in a peh i, kalvari tlang ah lim a sinak kong hi a si. Haleluia! Cu rian aa hrawmmi hna, dangkhat in aa zumhmi hna cu laksawng pek an si i, Thiang Thlarau lamhruainak tang ah cawm le khalh an si. Pentikos ni pekmi Thlarau kha nihin tiang kan sin ah a um ko rih. Kan sual kan phuan i, ngaihchihnak he a hmai kan kawl ahcun kan hmuh peng ko rih. Kan lam tthalo in kan i mer ahcun aa phuang peng ko rih, kan sining pi in kan fuh ahcun cohlan kan si peng ko rih. Ule nau Pathian fale hna, Krismas cu Pathian nih minung a kan kawlnak tuanbia a si taktak ko.
Bawipa nih sunparnak co ko seh law, kan dihlak caah thluachuahnak kan pekpiak ko seh. Amen.
