Efesa 4:32
Pakhat le pakhat cungah zaangfahnak lungthin le nemnak lungthin ngei ulaw Pathian nih Khrih thawngin an ngaihthiam hna bantuk in pakhat le pakhat I ngaithiam u. Thlacamnak: “Ka Pa, nangmah nih na kan ngeihthiamnak hmual hi pakhat cio nih kan nunpi khawhnak hnga, Thlarau bawmhnak kan sawm. Na kan bawmh tizong ka zumh caah ka lawm. Ka Bawipa Jesuh min in thla ka cam. Amen’
Pathian fale hna, damnak le kan nunnak a zuahrih tu kan Pa Pathian a min thangthat si ko seh. Nihin ah ruahti ka duhmi cu, Fapa Jesuh in a kan ngaihthiamnak kong hi a si. Thlacamnak he rak rel ve ding ah kan sawm. Dawtmi hna, kan mah cio zong nih kan ti theu: ‘Ka ngaihthiam khawh ko nain, ka philh kho lo eh’ tiin. Baibal ah ttha tein kan zoh a si ahcun, ngaithiam hna law, philh colh ti kan hmu ballo. Baibal chung ah a um loh. Kan putthing (Sehtan) nih kan thilrit chin seh ti duh ah a benhchih mi tu a si deuh! Pathian kan Pa nih a kan chimhmi cu, Khrih thawng in kan ngaihthiam hna caah pakhat le pakhat i ngaithiam ve u, tihi a si. Kan sual leiba a kan champiak cang. Cuti in kan ngaihthiam hna ahcun kan mah caah a rak ttha deuh, ziahtiahcun ngaihthiam lo nak kan ngeih ahcun kan ngandamnak tiang in a hrawk kho tu a si caah. Cucaah Pathian fale hna, nihin ah ngaihthiam ko hna law a taangmi cu kan Pathian nih tuanvo a lak ko lai. Kan ngaihthiam hna tik ah khin voi tampi cu a philh zong a kan philhter chih cu. Asi nain voi tampi cu thil ngandeuh kong hna ahcun kan philh kho lo. Kha bantuk kha hramhram in a kan philh ter lem lo. Asi nain lungfahnak he a kan hngalh termi khi a si ti lo. Hnulei ah i mer law hei zohthan hmanh, fahnak a um ti loh. Cucu a kan philhpiaknak a langhnak tu kha a si.Joseph zong kha zohhmanh u sih, a ule an rat hlan i, a hmai ah an kuun i, ngaithiam an hal hlan in pei a rak ngaihthiam cang hna cu. Zeitindah an rak tuahto ning a si ticu a hngalh peng rih ko nain lungfahnak he aa cinken ti lo. (Genesis 50:15–21) Cu bantuk te cu kan ca zong ah a si ve. Thil a cangmi maw, kan cung ah a rak tlungmi maw, kan philh khawhlo mi a um ko lai nain fahnak timi cu a lo cang, ziahtiah cun vailamtah cung ah kan Pa Pathian nih a Fapa Jesuh in a kan tuahpiakmi kha zumhnak in kan luhter cang caah a si. Cucaah ‘vancung ka Pa nih Fapa Jesuh in a ka ngaihthiam bantuk in, ka nu, kan ngaihthiam; ka pa, kan ngaihthiam; ka hawi, kan ngaihthiam; ka fa, kan ngaihthiam;…’ tiah kan ti khawhnak a si. Ule nau dawtmi hna, ngaihthiamnak kan tuah ve tik ah hmuhmi le tehmi sawhsawh in a si lo, zumhnak tu in a si deuh ticu kan philh lo ding a si. Hmuhmi in kan kal lo, zumhnak tu in kan kal (2 Korin 5:7) tiah Pathian bia nih a kan chimhve mi kha biapi ngaingai a si. A cheu cu kan si ttheo, ka lung a thawhtik ah site ko seh, kan lung a dam tik ah si te ko seh, celh awk hme a tthatlo cu kan ti ttheo... Kan lungdam hi kan hngah ahcun can tamtuk kan thlau sual men lai. Zumhnak tu in ngaithiam ko u sih. Atu bak ah khan tuah ko u sih. Thlacamnak in hal ko u sih. Na diary ah khan ttial ko: ‘Ka Pa, amah hi na hmai ah ka rat pi. Ka cung ah zeitindah a tuah timi cu na hngalh ko. Ka Pa, ka phut ka tawklo pi a si nain Fapa Jesuh Khrih in ngaihthiamnak na ka pek bantuk in, amah hi Jesuh min in ka ngaihthiam ve. Zumhnak in ka chim. Amen’ tiin. Pathian fale hna, cu tining tein na Pa hmai ah na phuan ahcun na nun ah thil ai thleng hrimhrim lai. Atu hi kan nun cio ah ngaihthiam a hau mi kan chimphuan can a si. Zumhnak in kan chim tik ah fahnak a kan pek tawnmi cu kan lungchung in a kan thawnpiak. .Kan lungchung ah Pathian sin in a ra mi daihnak le hnangamnak, lungsikhawhnak tu kha a hong chuak chin lengmang. Cu thildawh hna cu kan sining pi ah a karh chin lengmang lai. Pathian fale hna, Krismas kan cuanhnak tik ah khel tampi in cuanh a hau. Nihin ah kei nih cuan ve u sih ti ka duhmi cu, Krismas cu ngaihthiamnak kan hmuh can le kan hman can a si tiin. Kan Pa Pathian nih a Fapa Jesuh in a kan ngaihthiam caah pakhat le pakhat kan i ngaihthiam ve a herh ko.
Kan Krismas cu ngaihthiam nun nih uk hram ko seh!
Bawipa nih sunparnak co ko seh law, pakhat cio kan caah thluachuanak kan pek piak ko seh. Amen.
