Bible Sianginn Kai Lo Ruangah Maw?

By - Salai Ni Peng Ling

Khuasik zanlei nitlak lai te ah a si. Hakha Khuachuah tlang ah minung pahnih daitein an thu ko. Kik zil thli a hung hrang. Nu ngak nu sam cu, thli nih a vun chem pah.A dawhnak vialte zong an lang dih. Pa cu Luchinh nak ai chunh.Pakhat nih Hakha khua thar lei a cuanh ii , nu nih Nabual lei khi hei zoh sehlaw a lo ko. Zan lei khuasik lak ah thli hran thawng dah ti lo cun, zei thawng hmanh a thang lo.

Tlawm pal a von rauh ah, aw thawng a hung thang. “Pa Bawi, tha tein I ruat ko. Zei tluk in kan dawt, kan upat ti zong na hngalh. Mifim zong na si.Na thluakzong a tha. Ziah Bible sianginn kai hi tluk in na duh lo. Engineering sianginn cu kai hmanh law, mipi nih zei ah an in rel tung lai lo. Bible sianginn na kai ahcun mi upat mi na si lai. A tu ,Engineering sianginn na kai lai. Zu din te hna na thiam lai. Phe kah te hna na thiam lai. Na feltuk ii, zei hmanh tuah lo te in na va um ko hnga!. Boih cu na la ko hnga. Mipi nihcun, Pathian thei lo mi, zu ding le mi hrut ah pei an in ruah thiamthiam ko lai cu.Bible sianghngakchia pawl cu zoh ko hna. An kai cang ka in, upat mi an si.Mipi le krifa bu nih an bochan. Pathian hmai le minung hmai ah mithmai tha an hmu. Zeiruangah  Bible sianginn kai na duh lo hi ka ruat kho lo”tiah Suipi nih cun a hun ti.

Pa Bawi cu a thaw pi a hun chuah.Van lei hun zoh. Cun duh sah te in, Suipi lei ah a hun i mer. “ Suipi, kan chim lai tha tein ka ngaih piak.Fim cawnnak ah hin zeihi dah a tha bik ti a um lo.Zeifim cawnnak poah hi an tha dih.Cun Krifa kan sibantuk in Pathian cu kan I bochan cio. Cun tu lio ii kan miphun thinlung ah a um mi, Bible sianginn kai lawng in Pathian riantuan a si tiah a ruat mi hna hi, remh ka duh bik mi cu a si.Bible sianginn kai lo zong in, Pathian riantuan khawh a si ko ti mi nangmah tel in , na Nu le Na pa tel in, kan miphun pi chung tiangah hngal kho hna seh ti hi ka duh. Cun kei ka lungput hrimhrim ah minih cong awih duh, upat duh mi si ka duh lem lo.Thilttha tampi tu kha miphun le ram caah tuah ka duh. Cu ka tuah mi hna cungah minih upat mi siding khi ka ning tu a  zak lai dah ka ti. Bible sianginn kai cu a tha lo ka tinak a si lo. An za tein an tha.Na ruahnak tu ah  hin a dang sianginn zong a tha mi an si ko tiah ruat kho law, kan duh piak. Pulpit cung ah Bible ca cang rel in mipi hmai ah kut tlir len in, biachim len nak in a dang tuah awk tampi thil a um ve ko. Pulpit in Dawtnak kong a achim thiam taktak nain, a chungah dawtnak a ser kho lo mi tampi an um ve thiamthiam ko. Engineering sianginn ka kai ruangah Satan fa bantuk in na ka hmuh mi cu,  Pathian ka zumhnak, krifa ka sinak zei na rel lo bia a si. Na chim bantuk in zuding sa ei tampi an um ko lai. Bible sianginn a kai mi zong ah an um ve ko. A thli te mi theih lo in an din bia tu kha a si ko.Mah kha huat a tlai deuh. Zudin lawng khi sualnak a si tiah na ruat fawn.Mah nak in sual nak tha lo hna cu zu rit lo zong in hlenthawinak in mithil lak hmang. Jesu min I lak in sual palh nak tuah khi a si. Kan pumpak minung cung ah a hngat mi a si ko. Na ka dawt taktak ahcun ka thim mi lam cu harnak lam a si ah, mi nih zeirel lo mi lam asi zong ah na ka zulh pi awk a si” tiah a ti.

Suipi cu a hmai ah hung sen thluah mah. Zeitluk in dah a thin a hun ti cu a hmai ah a lang ko. Laitlang khuasik lak ah a thlan hna zong a chuak hnik mi a lo. A kam ai seh.

“A tha Pa Bawi, kei nih ka vat dingmi chung ahcun, Pathian a bochan lo mi le Pathian riantuan a si lo mi cu an I tel lo. Pathian saltha rian tuan tu tha lawng kha kei nih ka va ca ding ah ka ruah chih mi an si. Sianginn hmun khat te ah kan kai tti lio ii na bia chim na holh rel ah siseh na nunzia siseh, ni hin ni tiang zumh tlak in na um. Pathian nai bochan, a sinain a tu na zulh ding mi lam cu kei kai ruah ning bantuk a si ti lo. Bible sianginn kai hna a thatnak kong na ka chimh len mi vial te hna kha tah. Na lei cung lawng in a chuak mi lawng an si.Ziah kai na duh kun lo.Ka Va a si dingmi ahcun a sifak koseh a poi lo.Mi nih upat mi le mi nih lawmh mi pa a si lai.Khi ka ruahnak na cohlan khawh lawngah nang le kei cu kan I tong kho lai. Bible siang na kai lo ding a si ahcun, nang le kei peh tlaihnak lam a um ti lo” tiah a ti ai.

“ha.ha.haa.hah.aha” tiah Pa Bawi cu a ni ko nain a mit chung ah mitthli dor tete an hung luang.Suipi nih cun theih dawh a si lo. Cun Pa Bawi nih, “Suipi, ka sining nai fian lo ah cun zei tin kan chimh hmanh ah, na cong hlang kho hlei lai lo. Hi bantuk in na hmur dawh tein tthennak bia hi fawi te in a chuak lai ti cu kai ruat bal lo dah ngai.Asinain mawh kan phorh hrimhrim lo. A caan an luan hlan ah na thinlung tu fim hram seh, thla kan cam piak ee” tiah a hun ti. Suipi zong a mitthli a tla ve. Bawipa, ziah ka dawt tuk mi ka tta nih na rian thiang tuan hi ai timh ruam hnga lo. A thin lung run thleng law, na rian thiang cu thih tiang in a tuan tu si hram seh, nangmah hmai le minung hmai ah mithmai tha a hmu run si ter law, vawlei lei a sianginn kainak ding hi tlamtling ter hram hlah.Na Bible sianginn tu ah kai in, na bia thiang he ai nuam mi pa run si ter ko” tiah lungthli tein mit thli he thla a cam.

Suipi tin usih ! Nang le kei ii, a hnu bik kan I ton caan a si.Ni zong a liam ve.Na dawtnak hri zong an cat ve. Kei nih cun tthen lai dingin cun kan siang hrim lo.Zeiti awk tha lo.Kei cu na duhnak he ai kalh mi lam pei panh kai timh cu.tiah an ti ii, an motor cycle cung cun an hung kai inn lei ah an tin.

Pa Bawi cu , a tin ii thla a cam. Bawipa na duhnak run ka theih ter ko. Kan Miphun le ram caah a herh mi thil tampi an um.Zei thil ti khawhnak lei hi kei nih na dawtmi minung hna caah ka that hnem khawh lai.Run ka chim ko. Engineering sianginn kai ding ah kai tim. Na ka umpi tung lo ding asi ahcun, ka kai ter hram hlah!.Ka caah a tha na ti lawngah lam hun ka hruai ko” tiah mitthli he thla a cam.

Pa Bawi hi mino te a si ko nain,khua a ruat ngai mi a si.Kan ram le kan miphun kong a ruah tik ah a lung a fak.Tanghra awng ka tete mino hna nih University ah an kai.Kai tlorh in an kai.An mawh hrim lo.Zei kan herh.Zeidah kan duhmi a si ti hmanh an mah le an mah an I thei hna lo.Thei lo ding in kan uknak pi nih a kan tuah.Chin mi cung ah kawlpawl nih tleidannak tampi an tuah mi a ruah tik ah a celh lo.A sangbik tiang phak khawh kai zuam lai tiah a ti. Rian tuan awk ngei lo minung tampi kan um.Harsa in khua kan sa hna. Video te hna a zoh tawn ah khin ram dang khua ram le kan Lairam  a tahchunh tik ah a lung a fak hringhran ko.

University sianghleiruun kai hna. Lai mipi chung ah zei an tuan khawh mi a um ti lo.An lam cu phih kanh dih a si. Mipi mit ah an tlau cang. Culio ah Bible sianginn kai hna cu, mipi thinlung ah hmunhma a hun lak tik ah Lai mino tampi nih Bible sianginn lei lawng ah a kai cang. Mipi nih an upat hna, Pa bawi nih cu a sual tiah a ti bal hna hrimhrim lo. Mino tete nih thil an ti kho ngai.Uar an um tuk tiah a ti tawn hna.Kan ram tuan zoh tik ah, fimnak kan cawn khawhnak zong hi kum zakhat hmanh a tling rih lo. Kan ram le miphun thanchonak caah a lam kip in minung um kan herh tiah a rak ruat.Cu ruangah Engineering lei lam hi ai thimnak a si.

Sihmansehlaw, ai thim mi lam cu, a dawt tuk mi Suipi he a tthen tu hna thil ah a hun chuah tik ah, Suipi maw, kai thim deuh lai. Ka Miphun tiah bia ai hal.Zei khom si ah, Suipi nih ni khatkhat ahcun  a ka theih piak te ko lai tiah lung thawnnak pe buin a thim mi lam cu zulh ai thim.

Cuticun Suipi cu Bible sianginn ah a kai.

Pa Bawi cu Technological University ahcun a kai. Pa Bawi cu Pathian Bible ca arel lengmang. Pumnak te hna zong an tuah peng. Sianghngakchia mino lawng te an si nain, Cheukhat cu Bible ca Salm te hna  a dih lak in zoh lo a chim kho tu hna zong an um. Pa Bawi cu a tha a tho tuk. Kawl in an rel , Mirang in an rel. Bible hrilh fiahnak ca hna tampi an ngei. Zarh te caan ah Library an tuahnak hmun ah an I leng hna.Ca cu an rel tawn. Cun zan dang ah cun sianginn ca he a dang tuah dingmi tampi an ngeih caah, Bible ca cu a cang te te lawng in an rel ii thla an cam tawn. Kawl pawl sin ah an um tik ah, pumhnak te hna an senh hna lo ti bantuk in thil sining a hung cang. Cutikah Sianghngakchia vialte thlacamnak tuah caan an I tthen hna, 24 hours thlacam thawng dong lo ding in thlakhat chung , an I thiah hna. Suimilam 5 in paruk kar lak ah phu khat nih an cam. 6 in 7 kar lak phu khat tiin, suimilam kul le li chung thlacamnak cu thlakhat chung  an rak tuah.

Suipi zong cu Bible sianginn Pathian kong te hna Dr. tha tha nih ca an chim hna.Bible kong an cawn piak hna.Sang mino sin ah ai tel peng.Thlacam zong a thiam tuk.A aw zong a tha .Dawh nih a dawh.Mi pi nih upat mi taktak mi cun ai chuah.Pa Bawi cu zu le sa he ai ciah len ko lai. Bible ca zong a rel theng lai lo.Ca zong athiam bal lai lo.A rawk lai tiah a ruah.

Asinain Pa Bawi cu Pathian bochan buin tein sianginn ca cu a cawng leng mang. Zing lei ah Journal te hna a rel tawn. Zu ding pawl he zong an I kom. Upat buin tein a chonh thiamthiam hna. Daw tu tampi zong a ngei. Amah tu cu thiang hlim tein um khawh ai zuam.Kum khat ah sianginn khar caan hi thla hnih chung lawng an ngei. Thla khat cu Pracitical Field ah kal a si fawn ii, Lai lei a tlun caan hi thla khat hmanh a tling bal lo. Suipi..he cun an I tong ti lo.Suipi zong hawikom tampi a ngei ve. A dawtu pa zong tampi an um. A thinlung in Pa Bawi cu a  ruat pah tawn.Bible sianginn kai ve seh law, thawngtha biachim zong a thiam ngai lai.Khual tlawn ah a mah he kan tlawng tti hnga ii, Pathian thangthat hla sa in, krifa bu le mipi sin ah thawngtha bia zong kan chim tti hnga ii, zei tluk in dah a nuamh hnga? A tu cu, ..aw...a poi tuk ai...Pa Bawi na lung nai tthumh khawh lo ruangah mu , tiah lung kil tein a ruat tawn.

Voikhat cu Mawtaw in Laitlang lei a tlunnak ah Ralkap pawl nih Driver pa cu an sik.Rang deuh mawng tuah.Motor mawngh hman cu maw, na thiam lo, tiah an hro. Cutik ah Pa Bawi cu  a lung a tha lo. Lam mah tluk a chia mi ah zeitin dah, rang te in a mawngh khawh hnga.Nan nih pawl hi  Mawtaw man zong a cheu lawng nan pek rih. Nan duhduh nan sik na raak.Lam tha tein tuah hngat uh tiah a ti hna.Laipa Matupi pa nih Kachin nu a thit ii, an nu va te in a tlung tti mi hna an um.Ralkap pawl nih, kan far nu..Lai ram ahcun um hmanh na zuam lai lo.An rawl ei zong a chia tuk.A Lu le Biscuit ,meh lawng na ei lai.Cu le fangvoi cuar lawng na ei lai. Na celh lai lo.Zeihmanh a chuak lo.Minung lawng an chuak. Cu ruangah an nu pawl zong nih Lahkhah ei mi lawng hi an kan duh deuh ngai cuh. Ahhahaha..duh tik poah ah auh khawh an ngah tiah an ti. Pa Bawi cu a thinhung tukcang ii, a si zeihmanh a chuak lo.Asinain minung    a chuak mi pakhat khi hmailei ah mifim mithiam a si ahcun, Sui cuai hra nak in a sung lawi deuh mi a si. Zei thei lo mi kan mo , miphun dang a si mi hmai ah, chim zong a hau lo.A va pa nih a chimh ding mi a rian a si. Amah nih a hmuh mi a si ko.Nan kut tang kan um mi hi da kaw, ka tlak nak bik a si cu tiah a leh hna. Mizei na si tiah ralkap pawl nih cun thinhun lei khin an ti tikah, "Laipa" ka si tiah a leh hna.Kan hnemh ti phun khin .Ralkap pawl nih cun Ralkap nih mawtaw lam te hna kan I cawh piak hna hi.Na thei lo maw? a tu bantuk mawtaw nai cit khawh nak Facang rang na ei khawh nak hi hi  ralkap nih lam kan in sial piak hna caah da kaw a si cu tiah an ti.Pa Bawi cu “hahhahahaha..” tiah fak pi a ni. " Ziah ralkap nih nan rian cu lamriantuan si tung lo. Soklohzi hna an rian pei a si ko cu.Zeiraltuk awk zong nan ngei lo ii, pei an in tuan ter mi hna a si ko cu.Mah hmanh ah cun, nihlawh nan hmuh rih. Nan lahkhah leng ah nan i miak rih. Mipi nih an hmuh ding ni hlawh man na chuh piak mi hna tu pei a si ko cu tiah nehsawh in a ti hna tik ah ralkap pawl zong nih mi sawhsawh cu a si lai lo an ti. Zeihmanh nan kan tuah kho hlei lo,  a si lo maw tiah cu Pa Bawi an ti. Pa Bawi a thin hung tuk.Miral chia pawl.Uico pawl. Nan meithal bochan in mi cu nan va tler khawn len. Nan meithal chia uh.Kan tthawng nan i ti ahcun rak chuak uh a ti ii, a angki tang cu a bauh. Culio ah Pakhat nih, Kei hi Pastor ka si.Misualnak va ngaih thiam hi krifa pawl kan rian a si.Ngaithiam hna.Minih kan cung ii an sual tik ah kan ngaih thiam hna bantuk in kan sualnak kha kan ngai thiam ve tuah tiah pei thla cam a kan fial kha Na thin dam ter ko tiah pastor pa nih cun a ti.Pa Bawi thinhunnak cu Pastor Pa sin tu ah ai thial.

Ziah Pastor pawl cu Jesus bantuk in, thiltha lo a do tu nan si lo maw? Jerusalem biakinn ah thil an zuar.tangka thlennak an tuah tik ah Jesu nih cun an cabuai zong  a leh dih da ra ka ti.Zumtu cia hna sin lawng ah le Biaknak le hruainak chung lawng ah maw, Pathian thlarau in kan khah hnu ahcun zei hmanh kan ttih ti lo. A hman lo mi cu a hmaan lo tiah kan chim ngam.Kan ral a tha nan ti.Pathian rian tuan pastor khat le khat kar lak lawng ah nan ral a tthat. Ziah hi tluk in Laimi kan miphun sinak tiang an kan ti tu.A herh lo ah an kan let ngam lai lo tiah.Mi hro mi car tu dai tein na zoh sawh ko hna,nang mah zong nan sang zuri pa nih na ttang in an tlaih lio ah khan, a bel pei na bengh ka ti.Mah zuri panih cun mi ai palh sual ii an tlaih mi a si khah.Ziah a tu cu dai tein na um.Misual ngaihthiam ding le bia tak tanh lo hi rak cawh polh hlah ! tiah biatak te a ti.

Ralkap pawl nih, kan Nau I ral ring na ngakchia tuk rih, ram cozah do tu in tlaih khawh na sin a thei maw? tiah an tler khon chap rih.Cu lak ah Pastor pa nih, ka fa na ngakchia tuk rih khua nan ruat kho lo. Jesu kri khi minih cil an chak ,an tuk an velh tiang ah thilti khawhnak a ngei ko nain, a leh tung hna lo tiah Pastor pa nih cun a ti chap ve.

Pa Bawi nih a mit fak pi a au ii a hngawng cai nawn in Pastor cu a zoh.A mit chung ah thinhun nak mit ti an chuak , “Asimaw, Saya pa, nan Bible sianginn chuak pawl cheu khat hih mipi nih Saya tiah kan in auh lo cun, nan lung tha pah lo,Sayapa, Jesu kri nih kha thil  vial te a in tuarnak cu misual vialte  khamruah ah a si tiah ka ruah. Nangzong nih Laimi vialte luatnak ding ahcun ziah, Ralkap kedenh in chuih mi si le ralkap kut tum in thongh mi si cu na ttih ee , Jesu kri cu a tti lo kha, biatak an dir pi nak in da kaw, thihnak tiang a tuar kha. Nang cu biatak le a hman mi na ttih tiah a ti.

Pastor pa nih cun, ka fa a si lo. Kan nih pakhat pahnih kan thihnak le lohnak nih kan Laimi vialte luatnak a kan pek hlei tung lai lo tiah, a ti.Pa Bawi nih cun, a si, Jesu kri a thih lio zong ah khan, nangmah le keimah zong kham kan si lai tiah.Ahohmanh nih an ruat lo,tiah a ti.

Cuticun buai lulh in Laitlang cu an phan.Zarh a rauh ah Pa Bawi cu Laimi kan nunning zei kan lawh tiah khual a tlawng.Khua te lei ah a si. Hnap tawh caak nawn tete, bawngbi kar ka lak a tlek le angki chia tete he khuasik lak ah ngakchia tam pi a ton hna.Di inn tang tete ah an um.An arr le an vok hna he khua an sa tti.An inn chung in ek zong cheuh khat cu an thawh colh ii an inn tang ah vok nih a rak ei colh. Laimi kan sining tam chinchin a hmuh tik ah a ngaih a chia ngaingai.Cun khua pakhat a phan ralkap hna he   an i tong. Lai ralkap  tlun inn na onh  hna, rawl nan pek hna.An mah a bawmtu nan si.Kawl cozah do tu nan si tiin an khua bawipa cu an rak velh len lio a si. Pa Bawi cu a thin hung tuk ii, ngol uh tiah a au hnawh hna.Ralkap pa li nih cun, Meithal in kah bawh in an timh. Cu hna lak ah Sen hnih pa cu Mawtaw cung ah an i tong mi a si.Cupa nih cun ka theih mi a si tiah a ti hna. Lairal kap pawl an tlun ter hna tiah a ti tik ah. PaBawi nih Laimi kan nunphung hrimhrim ah khual ,mileng a daw mi kan si.Ral kap nan tlun ah siseh, mizei poah kan khua chung an phan mi poah cu kan rawl lak ah a thaw bik mi chuan piak in kan pek lengmang hna.Cucu tapung thazang a pe tiah nan ti ii, nan velh mi cu, Laimi kan nunphung.Zei nan rel lo a si.Kan nun phung nan kan hrawhhralh piak duh mi a si. Mizei an si kha lai mi kan ruat hna lo.Nan ral an si ahcun nan mah tein nan tlaih khawh nak ding I zuam ve uh.Thah nan duh zong ah an mah va kawl hna uh law, that hna hngat u.Zei a thei lo mi khuami mipi hna harnak nan pek  hna awk  a si lo,mipi khamh tu ralkap nan si nak cu Laimi sin ah cun, Laimipi hna hrem tu ah lahkhah pek mi pei nan lawh hi, tiah a ti hna. Cun ralkap pawl cu, an thin a hung ii, bia phunphun kawl in a mah tu kha tapung mei thal hriam tlai  he a pehtlai mi na si tiin an velh. Ka kut nih kawlpa taksa tep ve seh a ti ii, Pakhat pa cu a hmai ah tlork lak in a thong manh ve.Cuhnu cu a let duh ti hna lo.Cuticun a mah lawng cu an velh.An chuih an lamh.Amah le mah ai theih ti lo hnu ah an kal tak.Cuticun Sizung ah a um.An sang upa hna nih a felnak le a umkalnak vial te zungah an chim piak ii, cun an thlah tthan.Pa Bawi cu, An velnak ah a kal(kidney) zong a tha lo.Pa Bawi cu a nunnak caah a hum him ti lo. Amah nih cun, ka hman tiah kai ruah mi cungah cun ka tuar zong ah a poi lo a ti.Chungkhat Nu le Pa u le nau nih, ramdang lei ah a duhna lo in an kal ter. 

Aw ,,,,,,,,ka tinh mi vial te,

Engineering lei in Ph.D tiang ka cawng kho lai tiah kai ruah mi cu khua zei ahdah an tlau a ti. Asinain Bawipa na duh bang si ko seh! tiah thla a cam.

Suipi nih cun a zum chinchin ti lo.Ka ruah bantuk te a si ko.A nun nem mi Pa Bawi cu mi he a si a vel mi misual bik ah pei ai chuah cang ko hi. Bible sianginn kai seh law, hi bantuk hi a tong hnga lo. Vawlei fimcawnnak lei in a kal ca ah mu, tiah ngaihchia in a um. Cun Suipi nih internet email in ca a kuat.

Dear PaBawi

kan chim hi ngai law, hi bantuk na tong hnga lo mu. Zung lei siseh, mipi lei in zumh lo minung ah nai chuah cang.Miza pi dawt mi si nak in a tu cu, minih an ttih ah nai chuah cang. Na caah ka lung a tha lo.Cun Nang le kei cu zeitik hmanh ah kan I tong kho ti lai lo. Kei zong dawtmi dang ka ngei cang. Asinain, thla kan cam piak zungzal lai mu.

Suipi.

tiah tthennak darkhing voi hnih nak a tum tthan.

Pa Bawi nih cun,

Dear suipi

    “ Na ca kuat cung ah kai lawm. Pathian rian na tuannak ah Jesu nih ,Lam le Biatak le Nunnak ka si a ti bang. Amah Jesu bantuk in biatak a tanh tu sikhawh I zuam ko. Cun Kan Lai ram , Lai mi, hna nih Thlacam piaktu hmurka nakin, Harnak chung in luat khawhnak ding ah bawm tu kut kha kan herh deuh ti rak philh hlah mu.Cun nihin ka ton mi vialte cung ah ka ngaichih bal lo. Pathian nih ka tuahmi a hman lo ahcun fim ka chim sehlaw, hngalhkhawhnak ka pek ko seh! Na ruah ningbang in ka palh thiamthiam a si ahcun nangcu Van ram na kai lai caah ka lawm.Laimiphun Lairam caah Hell ka tlak zong ah ka lawm thiamthiam ko. Paul zong nih a krifa bu hna Hell an tlak ding nak in, kei mah tu hi Hell ah ka kal ter ko tiah a ti kha.A krifa hawi hna temh in nak in a mah temh in tu kha ai thim deuh.Bible sianginn kai bantuk in a ca cang cu ka thei  ti lo.Kai chinchiah lo.Asinain, ka caah cun a bia lawng kha man a ngei ii, a ca cang cu kai cinken lem lo.Khua zei zawn ti sawh piak awk kan thei lo.

Na tum valpa he nuam in rak leng ko uh mu,nan fale tu kha an za tein bible siang kai ter hna lai ci mu.Engineers hna, Economists hna, sibawi hna, kan ram kan miphun a herh nak hna ah, an mah duhnak hoih in fim cawnter le thanchoter khawh rak I zuam te hna mu.Catial thiam, hlasak thiam, Actors,Actresses, Computer lei a thiam taktak mi hna, tampi kan herh rih hi philh hlah mu.

Na duhnak kaltak in, Miphun duhnak a zul tu,

Pa Bawi “

Cun Pa Bawi cu, UN lei bawmhnak in ramthumnak ah a phan.Lai miphun caah tiah a ti khawh tawk tete ram leng in rian a tuan lengmang. Suipi nih cun Pa Bawi cu a philh kho hlei lo. Asin ah duhnak bia a chim tu tampi an um ko.A komh mi hna zong tampi an um.A dawtu taktak zong tampi an um ko.Sihmansehlaw,  a thinlung in va ngeih khi a ruat kho lo.Pa Bawi he sianginn an rak kai tinak Pyidawta sianginn pawng in a kal zawn ah, Pa Bawi he tangkua tanghra an rak kai lio ii,a rak phum mi pangpar te te a hmuh hna. An sang ngaingai cang. A hnu ah a kai mi sianghngakchia nih an tam mawih lengmang ii, an par an I dawh khun. Pa Bawi, kan rak phum tti mi pangpar hna zong an par cang. Sianginn chak ii kan phum mi Cherry kung pi zong a thang ngai cang.A par an par cang. Nang he semcawi tti uh si law, hi Cherry par dawh hna bang. Kan fa le zong an par ve cang lai mu tiin, lungkil in a ruat ii a mitthli a luang khiar mar tawn.Pa Bawi nih Suipi mitthli hna a hmuh piak kho ti lo.

Suipi cu khua a ruat lengmang. Bible sianginn kai dih in, Pathian riantuan ding a si cang. Siang uk sazaci nih, an boih lak zan lei rawl hrawmnak ah, “ Nan sianginn ca cawn cu a dih cang. Pathian rian tuan ding nan I timh bantuk in, khi Mindat khua te lei ah, khua pakhat a um.Krifa pakhat hnih an um.An thangcho rih lo.Mizoh khenh zong an thiam lo. Khual mi ral bantuk in mi an mi an nek.Pastor an ngei lo. Cu ka hmun ahcun a hodah a kal lai ? tiah a hal. An dih lak in, dai tein an thu.Suipi zong nih kei mah ka kal lai a ti ngam lo. Cu lio ahcun Pa Bawi a hlam ruangmang tthan.Aw..Pa Bawi um seh law, Bible sianginn kai a si lo nain, kei mah ka kal lai tiah a ti men lai tiah a ruah.Pa Bawi ka palh tuk cang ko rua ee tiah voi khatnak a ruat.

Cun Sianguk Sayaci nih “ Cun Chuncung ah ho dah rian a tuan lai.An nih khua khi ramdang a kal mi zong an tam.Ram thumnak a phan mi te hna an tam ngai. An khua sak zong an thang cho ngai.Pathian an thangthat ning zong a tha ngai.An fim, mizohkhen an thiam tiah a ti hna. Cu lio ahcun a kut a hlir mi Pa kua hra an si.Suipi cu  a tang lawng a zoh.

khua zei hmanh a hmu lo, a ke siapi lawng a zoh ko.A hmuh khawh ti lo mi Pa Bawi bia a ruat ii Pa Bawi hmai a khap hrim lo.

Pa Bawi nih A tu Bible cacawng mi Pathian rian tuan ai tim mi, Lai mi chung ah an tam ngai cang.An mah hna nih tha tein rian an tuan lai ii, kan ram krifa ram kan si dih te ko lai.thanchonak lei ah, uknak lei ah tampi kan I duh rih.Salvation timi khamhnak ah pum lei khamhnak zong kan herh.Thlarau lei khamhnak zong kan herh.Pum le khamhnak a tlamtlin hma sat lo ahcun thlarau lei khamhnak zong a hrawh tawn.Rawl ei awk ngei lo in, rawl tam in a um pi pa khi, mi pakhatkhat nih rawl ei awk an pek lo ahcun a fir lai ii, a ei a hau.Fir timi ah khan sualnak cu a si cang fawn. Pakhat hmai ah a sual ah sual lo ah, a thinlung ah misual ka si tiah ai ruat cang. Mizong nih ruah a si.Cutikah sualnak tuah lawlaw ding ah a kut hna an nuar ti lo.Cucaah Lam dang lei kan chan bau ii, thangthar hna nih a tlamtling rih lo mi lam kan tlin ter a hau tiah, a ti lio caan hna.A ruah tthan tik ah a ning a  zak tuk.Pulpit cung ah dawtnak kong chim thiam ngai nain, chungkhar ah dawtnak a leng lo mi zong an um a ti mi bia hna. A ruat than. Aw..Dawtnak taktak kan ngeih tung lo. A thei rih lo mi, mizohkhen zong a thiam lo mi.Mitlamtling rih lo mi hna sin ah kal cu kan duh cio lo hi ta. Kei mah zong kai ruat kho lo.Nu fafa ka si rih tiah ai ruat.

Rawl dumnak cun a chuak ii, inn lei ah a tin. An nu le pa cu ka ba tuk a ti hna ii, a ihkhun lei ah a kal ii, a mitthli hna an luangthluah mah.Pa Bawi,..ka ngai thiam ko mu. Ka thinlung nih zeidah a ruah ti mi zong , ka rak i thei lo. Pathian min bunh mi , mi nih conglomh mi le upat mi,Bawi bantuk in zoh mi siding men ah pei Bible siang kai kan fial ko hi. Pastor pawl cu ram mui ramchung ah rian tuan lo in, Ram dang ah thawngtha bia chim te hna an kal mi hna hi.Mi nih upat an si tiah ka rak ruah sual ko hi ta.Zeirian hi dah upat awk a si tiah ka thei kho lo hi ta.Ramdang Theology lei Doctor an hmu.Sianginn an kai.Pathian riantuannak ah Doctor Degree tiang te hna an hmuh.Asinain, ram chung a fim rih lo mi, Pathian thei lo mi sin ah thawng tha bia taktak chim ding cu an I tim tung lo.Ka Upat mi hna le ka zohnak hna cu an rumnak le an minthannak,mi nih zohcho mi an sinak  hna pei a si ko hi. A nih Pastor Pa cu Doctor a ngah ii, ram mui ah minung cu zet cu thlarau tlau a tlaih khawh hna ti ka theih tak lo. Kha pastor Rev.Dr. cu ee, Sayapa cu ee, khi  ka ram cu ka ram ah a phan ii, Pathian thawngtha a chim ti lawng pei ka thei ii, nangmah zong si ter kan duh cu. Nangmah bantuk in sifak harsa mi sin ah le mi va bawm in, zangfahnak he an sin ah a va thu dir tu an um ti tung lo. 

Pa Bawi, Haithlan fudum kan kal lio ii, Tarnu te thing a phorh tik ah na zoh kho lo ii, a in tiang na va chiah piak kha. A tu ka sining in siseh law, thla lawng ka cam piak hnga ii, ka chiah piak hnga maw? Na angki rang te a thur lai zong ruat lo in, na tuah piak ee.

Pa Bawi aw…a caan luan hlan ah i ngai chih hram law, na ti nain, a tu cu a caan an luan cang mu.

Kan sang ii, Sangve pi kha a dam lo ii, Pastor te nih kal in thla an cam piak lo ee.Rawlchuan piak tu a ngei lo.Kei zong nih mino lei hlaremhnak ding le cawl canghnak ah ka buai ve. Biak inn tu thla ka cam piak nain a sin ah kal ii, si pumkhat hmanh ka dinh tung lo. Kan sang mi rum Thatha pa cu cumpi thlangrai nih a tlunh ii krifa upa he, Pastor he an kal hnawh ii thla an cam piak.

Mah si cu a tha tiah, Sibawi an si lo nain, Sii min thatha zong an theih ngai.

Mihrut nu sin ah kal in kan dangh mi changreu na pek lio ah khan.Ka thin a rak hung tuk ee. Zei na ka rel lo asi tiah kan ti. A rawl mi cu pek a hau cu ta.Kei cu ka rawl tam rih lo.Cu leng ah kei cu cawk piak na ka duh ahcun na ka ka cawkpiak tthan khawh ko cu ta. tiah na ka leh ee.Pek ding pei a si cu tiah na ka ti ah khan.Ka thin a hung tuk ee.Mah tluk fih nung mi cu a liang te hna na va tlaih tiah kan ti kha. Jesu nih thlei dan hmang lo in, hlawhhlang nu zong a chonh ko.Tuchan cheukhat cu, zapi sin ii zel tuaang cungah thu in rawl dum hmanh an duh tung lo.Mizapi nih zel ttuang cung ii rawl  an ei lio ah, Cabuai cungah rem tein thu in rawl an ei ko. A tu ah na mui kan hmu ti lo nain ka nun ning le ka thin lung ka ruahtthan tik ah na hmai kan khap lo ee. Pa Bawi….aw..khua zei fing le tlang ah na um cang ee tiin mitthli rial ti dai bang an sur ko.

Sihmansehlaw, Pa Bawi le Suipi tonnak dingah cun, ruah ah lung dong a si cang ko.Bible sianginn kai lo ruangah tthennak zalam an zul.An kar lak ii dawtnak hna cu thinlung ruahnak men ah  a cang cang. Zanmang bantuk an si cang.Atak tak ah hmuh than khawh ding mi thil an si ti lo. Duh lo dawt lo ruangah si fawn tung lo in, duhdawt buin tthen cu a fak hring hran ko.Sihmansehlaw, tonnak ding cu ruahnak pakhat bantuk men lawng  a si cang. Tiva nih a reu tak mi ti nga te bang .Suipi cu Pa Bawi a ngaih nak he, ni le caan a rel tawn.Pa Bawi cu, rian a tuan sianginn kai pah in, man caan le Suipi kong ruah caan zong a ngei ti lo.  Pa Bawi nih Suipi zei lam dah a panh ti zong thawng pang a thei ti lo.Hlet zong a hlet theng lo.Kei mah nak in dawt tu tha, Pathian nih a pek ko lai, tiah a zumh.A hna a ngam ko. Zei ruangah ti ahcun muidawh zong a si.Fim zong a fim fawn.Ton than nak ding cu a ruat ti lo. 

Aw...Bible Siang inn Kai Lo Ruangah Maw?....Dawt nak cu hnu lei her tak in, Thennak zalam lei. ah......