Bible Caang thim: “A Sang bik van ah khin Pathian cu sunparnak hmu ko seh, Cun a dawtmi hna umnak vawilei ah hin REMNAK um ko seh,” tiah an ti. (Luke 2:14).
Biahramdomh: Nai hrawng cu kan kawl ram thawngpang rel a nuam ngai. A nuamh khunnak cu ral bantuk in a rak I hmumi hna hmun khat ah riantuan ti an van I timh I remnak leiah kar an hlan ciahmahmi hi a si. Kum 60 chung mei thal in ai do cangmi hna zong cabuai cungah remnak an ser cuahmah. Kan mah lai ralkap zong January zarhkhatnak cun Hakha ah remnak caah khua an khang lai. Kum 50 tluk hnu ai chit cangmi US le kawl cozah zong pehtlaihnak hram an thok tthan cang. Hi bantuk remnak ser (Remnak ser cu ral kha hawi I ser ) ah Jesuh zong hi vawlei a ratnak cu a si.
Nan Ral Va Daw Hna U
Minung nih cun ral cu teirul cham phung, phuhlam ding ah kan ruah. Jesuh nih cun, “A silo” a ti. “… sihmnahsehlaw kei nih cun, hitin kan ti hna: nan ral kha va daw hna u law an hremtu hna kha thla va campiak hna u,” (Matthai 5:44). Hi hi Jesuh nih a rak kan phurhmi thawngtha cu a si. Cucaah Jesuh nih, “Mit caah mit ve, ha caah ha ve, tiin an rak in ti tawn hna kha nan theih. Sihmanhsehlaw kei nih cun, nan cung I that lonak a tuahtu hna kha lehrul hna hlah u kan ti hna” tiah a ti. William Barclay nih, “Mit caah mit ve, ha caah ha ve, timi nawlbia kan zulh ahcun kan vawlei hi; micaw le habeu nih hngahmi vawlai ah aa cang hnga” tiah a ti. Suu Kyi hi kum kul reng lo ralkap nih inn thong an thlak. A phun phun in harnak an pek. Ralkap cungah na ruahnak tiah an hal tik ah, zeitikhmanhah ka hua tuk hna a ti bal lo. Ralkap cu ka pa dirhmi a si, anmah rian te an tuan lomi hi a poi ti tu in a ti hna. Nai Zarkana thong a chuah ka ah khan bia an hal le hiti thong an thlatu hi na hua hna maw an ti tik ah ka hua hna lo a ti ve. Khua tampi a ka ruahter, ziah zumlotu kan timi hna hmanh nih hi tluk hin ral dawtnak an ngei va si kaw, kan nih Khrihfa nih teh kan ral hi kan daw kho taktak hna maw ti ka ruat. Dawtmi u le nau hna na ral na daw kho ve maw? Na ral hawikom ah ser ding teh nan tim bal maw?.
Hawikom vs Ral
Nai U Thein Sein le Hillary Clinton bia an i ruahmi ah ka lung a ka su tukmi cu; “Ram rian ruangah thong a tlami pakhat hi a tam tuk (one political prisoner is too many),” tiah Hillary Clinton nih a timi hi a si. Ralkap nih thong an thlak hna cu ral hmuh in an hmuh hna caah a si. “Ral pakhat ngeih hi a tam tuk nain hawikom zakhat ngeih cu a tlawm tuk rih” an timi he khin ka lung chung ah an I peh tlai ngai. Cu caah chim ka duhmi cu hawikom hi a tam khawh chung in ser i zuam hna u sih law, ral tu hi ngeih lo I zuam hna u sih. Nangmah nih ralmi na ngei maw? Raltu ka ngei tiah teh na ruat maw? Hi pahnih na ngeih ahcun tutan Christmas thla hin cun hawi ah ser khawh I zuam ve law tiah kan sawm.
Biadonghnak: Sualnak ruangah Pathian le minung ral bantuk in kan I zoh lioah Pathian nih a fapa ngeihchun in minung he remnak a ser. Remnak a um tikah daihnak a um. Daihnak a um tikah hnangamnak a um. Hnangamnak a um tik ah a lam kip in thanchonak a um. Cucu Jesuh nih a kan phurhmi thawngtha; “Nan thinphang hlah u; zeicahtiah nan sin I ka ratnak cu nan ca i thawngtha he a si, cu thawngtha nih cun mi vialte sinah lunglawmhnak a tlunter lai” ti hi a si.
Christmas daihnak, hnangamnak le lawmhnak nan dihlak cungah um ko seh.
