From Christmas to the marriage supper of Lamb
(Hluanku pa)
Christmas caan kan phaan. Khamhbawi messiah chuah hrawnghrang khi kan hmu taktak bal na lo in mithlaam ah kan cuanter cio. Micheu khat tu nih cun kan mah nih Christmas kan rak hman tawn ning tu khi mitthlaam ah kan cuan ter i kan lung tu hna aleng. Christmas nih hin Biatak lei ah hruai lo in lunglen lei tu i ahruai mi zong kan tampi. Keimah pumpak tu cu aluancia lei ah lung chia ti lo in ara lai mi caan i Bethlehem tlangval Nupi atthit lai ding mi kong tu ah ka rak buai, Birthday tuah lei si lo i Bride Monu dir hmun in wedding dress tu ka rak idamh. Upapi nih Monu si hna kan hei itimh ve hi cu zumhnak cu si hlah seh law " ava hruh thlaak dah" ka hei ti ve men ko hnga na in.
Zisuh khrih arak chuah hrawnghrang thil umtuning hi ttha te i research van tuah tik ah zaraan i mithlaam i kan suai ning hi arak si thlu lem lo. Caw Inn ah a chuak ti te hna khi arak si lem lo. Hlaan lio Bethlehem hrawnghrang livelihood zoh tthan tik ah Lailei bantuk khin inn ah hin Khual riahnak room hi an rak ngei cio ve i sattil azua mi an rak si ve caah inn leng ttumbut tibantuk ah sattil hi an hreen hna i rawl zong an rak peek tawn hna. Lailei khuasa bal nih cun ttha te in mithlaam ah kan suai khawh cio ttheu lai. Cu ka ah cun an rawl peknak kuang tibantuk zong khi an rak chiah ve hna. Hi lio caan hi khual chokvai tamsaling te rak si kaw Mary le Joseph nih an tlun inn i khual ca i an reserve mi room a lawn ti lo tik ah asining poh khin hei khuasa hna seh law adawh. Cuticun cawrawl einak kuang i Khrih thlim arak sinak hi sidawh asi. Hika zawn ah hin hi historical evidence hi Bible nih akan chimh duh mi message si lo in Thiangthlarau nih akan chimhmi message tu cu adang pi khi arak si. Cucu zeidah asi zoh hmanh usih.
Matthew 20:28 ah kan hmuh mi cu mifapa hi vulei ah khual um i um i mi nih aduh mi rak tuah piak ding in arak ithawh mi asi lo, amah nih rian vial te kha a hram thok in tuah avan itiim ve hrim hrim i vulei ah khual um in um arak itiim lo, lai um in um ai tiim ti khi a van fian ter. Vaanbawifa ve lobang vaanmi run nih siang lo cukmak in an van thlah ko na in vulei i lo hma adomhnak or mei akaunak zawn cu aniam hringhran ko. Messiah asi hi theih colh asi sual lai ti hi faak tuk in phaan piak arak si rua hi ta, CNF kan unau le lailei an luhchuah vial ah CNF kan si an kan thei sual lai lo ti ah show pakhatkhat tal an tuah ta tawn an ti mi he cun abingtelet ngai ngai khi arak si. Khrih nih messiah asi hi thei ter colh in um sual seh law mivialte caah rian a ttuan kho ti hnga lo. Misual pawl lebang cu Frasih pawl nih an chawhkanh dih hna hnga i zeitihmanh in khamhnak an hmu kho ti hnga lo. Cu ruang ah cun arak si. Nauta bik uniform te he vulei ah arak chuak i achuah zong ah cun khual muisam keng lo in vuleimi laikhal muisam te he ahong chuah hi asi.
Khah asi ah.. unau nang tah, Khrih hi khual don in maw na don Lai don in dah, van iruat ta...na thin lung ah khual tlun in maw arak tlun! lai tlun in??? Na thin lung ah thil dang hna tlun inn na rak pe sual ve maw? Hmunhma pe loin alenglei cawrawl kuang bantuk hna na peek ve khawh men asi ti hi van ruah ta a hau hi mu? A ngai ngai ah cun thlah sian lo mi thil hna na ngeih ah cun lenglei ah na riah ter ve ti nak asi ve ko. Asinain apoi lo, Khrih nih hin khaka lenglei hmun le hma te i um kha apoi ati lo, na thinlung innka kha amah te i ikingh chom i na hon tik poh i hong luh te ding hrim hrim khi avan itinh mi le avan ithawh ning asi. Ngaihmanh! innka ah ka dir i ka kingh. Ahohmanh an si ah, ka aw a thei i innka a ka hunhmi cu, a inn chungah cun ka lut lai i a sinah rawl ka dum lai i amah zong ka sinah a dum ve lai (Rev 3:20). Zeidah langhter kan duh ti ah cun minung nih hin Bawipa caah hin kan thinlung hi ahohmanh nih honcia in kan chia kho taktak hna lo. Asinain kan thinlung i lenglei te ah siaremlo ngai i um bu te in innka kha kan hon hlaan lo akingh i atu zong hi ahong rih lo mi hna caah cun akingh cuahmah ko. Doh! doh! doh !!...Innka a hong cangmi tu nih cun an thinlung chung ah an luh ter, hmuh hma an peek i Khrih nih aduh mi ti le rawl kha an peek i siarem in khua an sa tti cang. Asinain thinlung innka ahong rihlomi hna cu anmah siaremnak tu an kawl i anmah duhning poh in a um, an ei an ding i lenglei ah Khrih cu khuasik lak ah ti lo le rawl lo in an hrilh ko kha aruah awk an hngal kho rih lo, zei can khi dek an hei rauh rih hnga....!
Hi lawng hi asi rih lo...
Vanbawifa ve lo bang..na thinlung innka kingh ding in Bethlehem khuasik zingdamti pah hnu i carawlkuang chung i nau bang a ttah ko mi cu phun dang in chim rih hmanh usih. Zei ruang theng ah hme Bethlehem celngel ah hin achuah i cu hmanh ah nauta label te hi benh asi hnga? Biatak nih cun hi ti hin akan chim tthiam tthiam..
Sehzung pakhat i rian kan rak ttuan lio ah hin kan Boss pa hi rian arak ttuan tuk i worker pawl nak hin rian hi arak ttuan deuh, dinh caan zong ah ai diin bal theng lo. Off day khom angei rua lo ti awk in rian a rak ttuan ve tawn ko. Cutikah Workers pawl nih kan icaihmi cu.." hi tluk mirum hmanh nih hi tluk i rian a ttuan ah cun kan nih zingzaan ei lawng achuah pi kho mi nih cun zei hme kan hual ti lai kan ti i.. over time zong a um zat in kan ttuan ve cang ko.. ihneek leen kan hau ti lo. Kan mah nak i a rank asang tuk mi Bawi hna, mi rum hna, mifim hna nih rian te nau tete huam ngai le lungtho ngai i an ttuan tik ah mi sawhsawh pawl cu um sawhsawh awk a ttha ti lo, zei hmanh hual lo in kan rian cio kha kan rak tuan cio cang ko. Hi hi mi fim nih mi hruut rian an kan fial ning cu asi. An ka i cucu tuah uh.. khakha tuah uh ti nak in an mah nih an tuahsernak in thil an lanhgter tik ah zaraan cu daithlaannak kuat an rak ihmuh kho ti lo i an tuah ding cio kha an rak tuah cang ko.
Mah bantuk hi asi. Vulei bawi hmanh si hlah, Vanbawifa bak nih aniam bik dirhmun le sining ah van itthum in vulei rian i aniam bikmi nangmah le keimah thinlung innka kingh i avan hon ko mi cu maw na hon duh lai lo,!! ahofa dah na si ka si? Cinzah Khenglawt Zathang na si ruang ah nai uah kho lai maw? Phd Degree angahmi na si ruang ah nai chang kho lai maw? Boss pakhat na si ruang ah nai chimkaan lai maw? Vanbawifa nih pei vulei i aniam bik mi hmun in lohma adomh hi! Rian te nau cem pei amah te in ai awt hi, khual bantuk in an ka zoh sual lai ati rih fawn hi teh! Khrih nih ngai hmanh innka hram ah ka dir ati tik ah hin dir sawhsawh in adir lo dah kaw, lung a fim ko ah cun aran khawh chung in hon i kan thinlungchung ah umnak hmunhma peek ding asi dah kaw.
Khrih kha kan thinlung ah hmunhma kan peek tik ah Khrih cu kan thinlung chung ah a um i John 14:20 ah kan hmuh bantuk i kan mah zong Khrih chung ah kan um ve. Nulepa nih fale kan van ngeih hna tik ah kan thinglung ah an um i an thinlung ah kan um ve ti khawh asi. An fahnak kha kan tuar piak hna i an ilomhnak ah an mah tluk in kan ilawm. Chimduhmi cu pumkhat bantuk in um asi. Cubantuk cun Khrih kha athinlung i hmunhma ape taktak mi nih cun Khrih hin aduh lo mi cu zeitihmanh in thei ko na bu cun tuah piak sian ding asi ti lo. Mah ruang ah hin Matthew 10: 37 dawt cicek ai hauh nak hi asi lai, Efesa 4; 20 ah angaih chiat ter hrim hrim lo ding asi lai, Luke 12 :10 ah a volpaam mi cu ahofa hmanh ngaih thiam nansi lai lo ati phah nak te hna hi.
Phundang in kan chim asi ah cun Khrih nih hin pumkhat taktak si ding in a Thiangthlarau hmang in akan sawm i innka akingh peng ko ti khi asi. Khrih nih hin minung hi afa le bantuk zong in akan dawt i nunngak le tlangval bantuk zong in akan duh. Mi rang holh van ihlaan ta usih law Love timi lawng asi lo, Passion timi hrim hrim ai tel cu hmanh cu intimacy timi inaihniam taktak i rak um chung khi akan hau mi taktak cu asi.
Love: nulepa nih fale dawtbantuk nahchuahnak le nekneihnak ai tel bak lomi khi
Passion: Nungak le tlangval ai duh mi ihman lo le ikupreek lo i um khawh lo bantuk khi
Intimacy: nuleva karlak ah zeibantuk biathlei hmanh um lo in kan chungmuru zong
itheih dih cikcek kan iduh veve bantuk khi
Mah hi ruang ah hin Khrih athinlung i aco hlang taktak cang mi hna nih cun zeiti um awk hngal lo in Khrih he iton lai rumro an ingaih i acaan lo pipi ah Khrih ara lai an rak ti phah nak hi asi. An rak mawh hrim hrim lo, zeidang hmanh i mual apho ah hin cun hi zawn ah hin cun ichuahsual le mual pho zong hi aphu tuk mi asi. Mawhchiat sian ding, caak sian ding an si lo. Hlan lio lai tuan bia lebang ah Nungak nu nih a tlangvaalpa kha loduahka kehmiat par saling ah kan itong lai arak ti i pei ai ngaih tuk i an inn pawng phong aduah i kehmiat par cu a hngak an rak ti bal kha. Khrih kha athinlung i aco hlang taktak cangmi Thiangthlarau nih a sawm khawh cang mi hna nih cun Khrih kan Bawipa he iton sual lo lai lawnglawng hi an nunnak dihlak in an phaang ko cang. Zeidang phaan awk dang cu ti pi in a um ti lo.
Ulenau hna, kan Bawipa Zisuh Khrih nih hin vulei rian vialte aliim dih cang, van lei i arian zong aliim dih cang, zeidah atang? a Mo asi mi vulei mi tu hi kan i ready lo tuk rih i cucu caantawite akan hngaak i asi. Akan zangfah caah asi. Asinain zaangfah awk zong kan ttha ti lo, zei caah ti ah sualnak hi vulei ah akarh tuk cang i hngah deuh ah cun mivialte sualnak ai neh boih dih tthanding kan si cang caah hngah awk ttha kan si ti lo. Asinain Khrih kha athinlung innka arak honh taktak mi nih cun hngaak ti lo in atu hrim hrim ah hin Nupitthipa hi rak ra cang seh law Rawldanghnak Puai Lianngan cu tuah taktak cang usih ti hi kan duh i ngan ngan ngai in kan hngak cang ko.
“Keimah, Jesuh nih, Khrihfabu chung i a ummi nannih sinah hi bia cu thanh awkah ka vancungmi kha ka run thlah. Kei cu David tefa kha ka si, kei cu deirel arfi ceu cu ka si,” a ti.17Thlarau le va ngei laimi ngaknu nih khan, “Ra u,” an ti. Hi bia a theimi paoh nih khan, “Ra u,” ti ve hna seh.
Bawipa nih thluachuahnak in pe cio ko hna seh. Amen. | 