BETHLEHEM 4

8/   Joseph.

Joseph cu Rachel nih  afa pa sakmi min kha asi. Bawipa nih ka ningzahnak a ka lak piak i cang i fadang zong ka chap ko seh ti chuan in a sak.(Lakpiak le chap). Bible ah    pa huaisen Joseph  pa 3 kan hmuh  hna.   An pathum  in  mifel,  Pathian a upatmi,  cunglei  fimnak le  thawnnak  a zummi  an si.  Pathian  nih   hi Joseph   Pathum  a hman hna ning hi  a mak, aa dawh hi duh zong a nung. Bawipa ralkap, pa  huaisen  an si.  Amah  a hmu cangmi  vulei  nih tihnak in siseh,  vulei thil in siseh, vulei bawi le biaceih hmai ah siseh,  hnu a tolh ter kho ti hna lo. 

(1)Joseph; Izipt ah  zuarmi:  Jacob (Israel) fapa. (Gen.37 in 48) :

 1st Joseph cu Israel miphun le Izipt mi hna caah nunnak hrampi: si awk ah Pathian  nih khuaruahhar in  cunglei fimnak he a hruai i:  Krih  Messiah  Israel miphun in a chuahnak ding le  cu Krih chungah  ah Thlarau in  Krihfa bu(Thlarau Israel) vun dinte nak ding  timhtuahnak  caah Pathian nih  foundation ah a hman.  Rachel  hi  minsak a va thiam dah.  Pathian khuakhan ning hi khuaruahhar asi.    Ngakchia te asi lio in  Bawipa nih  mang in   thil a hmuhsak  lawng si loin   Israel miphun  pi chuahkehnak  ding ah  Izipt ram ah  a kalpi.   Sualnak le thihnak chung in Vulei khamhtu   Messaih  a chuahnak ding ah,  Pathian  nih Abraham  hmang in  Ram le miphun  tungtlang  a dinh.  Abrahman in Jacob tiang ah khan a dang tein(Amah  BIA/NUN)nak chungah   a dang tein  a chiah, a kulh,  a chonh,  a zohkenh i a hruai hna.  Nihin zumtu(krihfa)  thlarau in cencilmi le vulei minung ka hmanthlak zong asi.   Vulei minung  he zaraan in   a hruai hna lo. Cunglei  fimnak thawnnak(Devine  wisdom le power) in  a chinchiah hna.   Cu hnu ah   Israel mi, miphun pi aa chuahnak ding  ah Joseph kaltlang in Izipt ramah  hmai ah  a kal i  thil a timhtuah.   Atlu cangmi Eden  kha  Israel miphun  ah  pumsa in  a muihmai a vun ser.  Leitlak Adam  thaw a pek i dum ah  a hruai bantuk in  saltannak  chungah  nungna thi,  mu le mal a ngei  kho tilo mi  Israel    cu  Moses hmang in a chuah hna i Kanaan ram  ah a hruai hna.   Amah caah a halhmi  ramthiang ah Amah nih a phunmi  Israel  miphun thiang  chung in Krih  mi khamhtu a chuahnak hnga caah asi.   Hihi Krih a thawhthan cangka in  Thlarau in Krihfa bu/Zumtu(Thlarau Israel)  a dinhnak ding hmelchunnak hmanthlak zong asi fawn.   Israel fale sinah a luh a chuah bantuk in nihin zumtu Krihfa cu  chungah thlarau in a lut a chuak lengmang ko.   Eden in Israel ah,: Israel in Krihfa bu ah:,  Krihfa bu  in  kum thongkhat ram ah:, kum thongkhat in zung zal Eden ah,  Amah muisam taktak lawhnak chungah a kan kirpi   than lainak darama lawngte asi.  Vulei  thil le tuanbia alo nain  Thlarau thil lawngte asi dih.    Thlarau  mit le hna in zoh lo ahcun   ichuihpah a fak  khomi asi. 

  

Joseph ah hin  Pathian  nih Krih muisam   a suai.  Judah minih  Krih an hlawt bantuk in  Joseph zong a uu le nih huatmi le   zuarmi  asi.   Krih cu  vulei ah  midang riantuan piak ding in (sal) ara.  Joseph zong sal  ah zuar asi.   Krih cu Gentail mi hna caah  khamtu asi ve lainak  hmelchunnak asi. Joseph  hi Krih hmelchunhnak asinak  tampi chim ding aum.  Atu ah chim dih khawh asi lo.  Kum 17  asi ah Izipt ah zuar asi nain     Pathian nih a umpi.   Vulei thluachuah ti cawk lo a hmu nain  cunglei khunpiuh  chiat um loin  a hmuhmi a um lo.   Auu le nih titsa thinlung nunzia an hmuhsak lio ah  Joseph nih a cungah an tuahmi sualnak a ngeithiam hna i, an nunnak hnga  Izipt ah tirawl umnak hmun ah a hruai hna bantuk in  Krih  nih  kan sualnak le palhnak  ngeithiam in  a sinah  a kan hruai. Isareal miphunpi thluachuannak hram asi rualrual in Krih muisam  a kan hmuhsak tu asi fawn.  PHaraoh nih mang a manh i a mang zong zei asi a hngal lo.  Mui padup asi.   Milai bawi le siangpahrang pi nih amang tal cu  a thawhpi awk asi nain, zei asi zong a hnga lo. Cucu  Joseph a manh lotu nih  a hngalh dih cu awh.  Cucu  Pathian nih a umpi mi Joseph caah  cun  khengah  chiah piakmi  bang a leh piak.  Cunglei  ina rami fimnak  cu  minung thawnnak, fimnak le  ceunak he tahchunh awk a tha lo.  Joseph cu cu thawnnak  in hruaimi  pa asi i cucu nihin zumtu hna nih Bawipa kan zulhnak ah kan bat nak hnga lo le lungdong in kan rilhnak hnga lo kan caah chinchiahnak zong asi fawn.

(2) Joseph(Mary pasal), Jesuh  pa(vawlei):(Mtt. 1)

“19A hamtu Josef cu thil a hmaanning in tuah a duh zungzalmi a si; sihmanhsehlaw Mary cu zapi hmaiah ningzahter a duh lo caah an i hamnak kha a thli tein ka let lai, tiah khua a ruat lengmang. 20Cu kong a ruah lengmang lioah khan, a mang ah Bawipa vancungmi pakhat kha a sinah a lang i, “David tefa Josef, Mary hi na nupi ca i lak awkah ṭih hlah. Zeicahtiah fa a pawimi hi Thiang Thlarau thawngin a si. 21Fapa a hrin lai i a min ah Jesuh na sak lai — zeicahtiah a mi kha an sualnak chungin a khamh hna lai,� tiah a ti.

Israel mi hna cu  miphun nganpi si ding in  Joseph(Izipt) a hman bantuk tuk in,  Thlarau  Krihfa bu a thoknak  ding  hram domhnak  zong ah  Pathian nih  Joseph  thiamthiam a hman.  Pathian nih a chonh hlan ahcun anih zong   titsa thinlung in khua a khan lio ah  Cunglei fimnak in   a hruai.  Nawl a pek.   Acung le Bible zoh ah Josepht hinlung hi duh anung  ngaingai.    Jacob fapa  Joseph  bantuk in a min a thang lo  nain  Vulei minung vialte  a khamhtu,   thlarau  le vulei thluachuah  nunnak hrampi  asimi  Pathian Fapa zohkenh  rian a pek bak  ko.  Joseph bantuk in Pathian nih rian a pek vemi kan si ahcun  cunglei thlarau fimnak le thawnnak tel loin cun kar khat zong kan kar kho lai lo.  Izipt Joseph  nih cun  Izipt le Israel lawng a huap lio ah   2nd  Joseph  cun  vulei  miphun dihlak  caah thluachuahnak phawrtu  zohkhenh rian  pek asi.  Sunparnak le rumra khumh asi lo.  Niam tein  kawh  asi nain  Krih cu a sunparnak  taraphu  asi.

Bawipa nih a chawnh hlan ahcun,  minung khuatuak in  khua a ruat.  Mary nun ah Kri a luh cangka in a nih arak buai colh.  Vulei titsa thinlung hi Bawipa nih   cunglei fimnak in a tei lo ahcun cansaupi  a kal kho lo.    Buainak tlawmte a um hlek ah a hninsai i a tlu colh tawn.  A ngeih a chia, a lung a fak.  Zeiti hlei in phisin awk a hngal lo.  Pasal pakhat nih  a ho fa ti hngalh lomi  fapawi thit lak nih a celh fawn tung lo.  Asi nain Bawipa niha chonh tikah a lung a khong lo.  A thinlung a hawn i   a har a nuam zoh loin  Bawipa hruainak poh ah akalmi pa asi.

Asi ning tein tuah a duhmi cu zei dah asi hnga?. Mary a thian tilo caah  a  pawm kho lo.  A pasal hawi hmai ah  fapawi cia a thimi pa  ti asi  lai.  Anupi cungah  zeitik hmanh ah a lung a tling kho ti lai lo.  Joseph lei kap in zoh ahcun hihi  a dik ning asi ko.  A khuaruah a har lo awk a tha ve lo. Mi fanau pa.  Amawh ve ruam lo. Dem ding le mawhchiat ding zong aum lo.  Zaaran le ordinary khuaruah cio asi ko.  Judah pa ve lo bang, a tlawm ruaimai lai hih.  Pasal pakhat caah sungh le mualphonak fakbik  asi. 

A ngaknu Mary nih le...... a thiamnak le tlinnak chim tim ve hlah.  Bawipa ahcun aa din ziar i ngawi khip khep tung.   Joseph cu a sian lo zong ah  a chung minung ruangah a pasal thinlung ah  milaang le khual bantuk asi fawn.   Joseph caah cun kuttum in vampang thongh len phu asi lai.  Hika zawn ko ah hin  Bawipa CU KHUARUAHHAR, FIMCHIMTU, A THAWNGMI  PATHIAN, DAIHNAK BAWI, ZUNGZAL PA  ASINAK A LANG.  Afale hna lungdong  vansang in an um a sian hna lo ning le an caah tlingzo le  dir ngam a sining a lang. 

Joseph lungharnak cu Bawipa nih a hmuh I a chonh.  Bawipa le minung an irem ahcun  minung le minung zong ah remnak a chuak colh.  Ramkhelhnak  le miphun kong ah, sipuazi kong ah, hawikom kong ah  ui le kel bantuk asimi zong   Biatak chungah hrinmi si hnu ahcun   Bawipa nunnak  rawlkeng pakhat purhti khawh asi. Joseph cu  Mary le Jesuh  himdamnak caah   Body Guard thabik ah   Bawipa ni a ser.  Bethlehem ah Mary a hruaining,  nau neih liuo ah tha tein a umpi.  Jesuh chuah hnu ah Bawipa nih Mary a chawn tilo. Joseph tu  a chonh deuh cang.   Mary vuikhat a chonh lio  ah Joseph cu vuithum khengte a chawnh.  Vui(1) Mary phiat a timh lio ah, (2) Izipt ramah  naute le anu zampi  ding in (3)  Izipt in  Israel ram  kirpi hna ding in  a chawnh.   A harnak le pasal ka si lomaw ti loin  Bawipa ah  a thinlung a hawnnak le   Divinne  power  hngetchen in kar a hlan ruangah   Vulei  khamhtu Bawipa  cu  him tein  Bethlehem ah a chuak. Izipt ram a phan, Nazareth ah arak kir.  Pafa hmunkhat ah chungkhar  rian an tuan.  Duh an nung tuk na ti lo maw?.  

Joseph cu  Lehtama asi I, lehtama cu hmanrua sertu, innsa, inn chung thilri sersiamtu an si.  Thing le hmanrua dang hmang in dikte in  a tah, a tan, a cheu, a then, a zuh, a kawp, a peh , a tonh I, hmantlak lo  thing them chung in  hmantlak thilri a sertu,  innlo thatha  thil dawh sertu a si.  Mirum le millioner innpi hmanh khi Lettama kut chuak thil loin aa  dawhnak a tling kho lo.  Pathian nih Kri ah van ram cu, misual, mifir, mithat, lainawng, mitha, michia, sifak mirum, mider, mithawng, mifim, mihrut  dawh tein a kan cher i kan phutlo vohbik duhsaknak he amah inn tamhnak ah a kan milh ti Joseph nun nih a kan hmuhsak.   Van ram tamhnak  hmanrua phunphun kan si ee.  Cu lettama  cu Pathian nih a fapa  zohkhenh rian a pek.  Mary bantuk in  Vancung mi bia cu a pawm I elhnialnak um lo tein a zulh.

Pathian bia ah si hlah selaw, khualtlawnnak in mah inn lo hlam tilo in miram ah Refugee I va vah ding cu a awl lomi rian asi. Kri ruangah Pathian aw theih in zeital sunghmi le kaltakmi kan ngeih khawh ve ahcun ilomh awk ngai kan si ko.  Thil awl belte asi lai lo nain cu bantuk hmun ahcun Bawipa cu  a hngilh ko lai lo.  Joseph dinhmun  ah hin Pa mawlmang deuh si ahcun ‘Nangmah mah nu ruang ko ah hin, a herh lo tiang in na ka buaiter’ tiin zailen phu asi hnga.  Pathian biatak ruangah Joseph nih thil tampi a kaltak I Nausem Bawikri cu  him tein  a zohkhenh, a hruai.  Vulei nunnak caah ahruai I Pathian bia  ah ahruai fawn ti a fiannak cu  Jesu kum 12 a tlin I Jerusalem  I an kal zong ah khan  kan bawipa cu  Temple ah mipi a cawn piak hna I an thlau. Kha zong ah khan  akir vima I Jesu cu Mary he an va kawl ti kan hmuh.  Pathian nih a pekmi rian hi a ho nih hngalhpi lemlomi  rian fate a lo na le Bible ah a min a langtuk lo nain, khuaruahhar in  Pathian nih a mah kaltlang in thil lian ngan an tuah. Bawipa nih an fialmi rianah  mi nih hngalhpi theng loin  na tuahmi hi let tampi in Pathian nih thlua chuah hrimhrim lai ti hi philh  lo awk asi.  Kri he iton hnu ah a nawlngeihnak nih hin zumtu hi khuaruahhar in  thluachuah apek hna ti hi Joseph  zongah hin  fiang tein a lang. Harnak bel kaltlang lengmang ve a hauh caah  harnak in chung  le kan zangder lio ko ah hin a der ve bal lomi, a tlawm ve bal lomi: kan chung le ka cungah a ummi Kri in  Pathian thang that nak in idinh  thiam hi zumtu caah nun hnin hno nak asi.

(3)Joseph (Aramethia khuami) cu Jesu ruak a vuitu:

Mirum Joseph asi.  Anih cu Jesu kha a thli tein arak zulmi  asi.   Mah Joseph zong hi, Judah  tlangbawi le phungthiam mifim lawngte 70 hrawng ah umnak Senhedrin council, ah aa tel vemi asi I  Jesuh thahnak kong biachanmi ah khan a lung a tling lo ti Gospel Mark nih a chim.    Tihnak ngei loin      Pilat hmai tiang a dir ngammi mihuaisen  asi ve.  Jesu ruak a tuam muaining le a veining zoh ah Kri cu fiang tein a hmutu asi ti a fiang. “Amah zong cu Jesuh zultu pakhat asi ve.  Jesuh ruakvui ah khan John 3 ah  Jesuh a tongtu Nikademus  he an si  hngahnga.  (Mtt.27:57). “Judea ram khua, Arimathea an timi ah hin mipa pakhat a min Josef a simi a um. Amah cu miá¹­ha le hmaizah awktlakmi a si i Pathian Pennak a tlun lainak a hngakmi kha a si. Amah cu Khawngsil chungah khan aa telmi a si ve nain an biachahnak le an thil tinak kha a hna a tla lo. 52Pilat hmaiah khan a vung lut i Jesuh ruak kha a hal. 53A ruak kha a á¹­humh i puan rang in a zual i lungkua i an cawhmi thlan ah a vui. Cu thlan cu thlan thar a si i ahohmanh nih an hmang rih lo. 54Cu caan cu Cawnningani a si i Sabbath ni kha aa thawk dengmang cang. 55Galilee ram in Jesuh a zulmi nu hna kha Josef sinah cun an kal i thlan le a chungah zeitindah Jesuh ruak cu an chiah ti kha an hmuh.â€�

“Amah cu biaceihtu bu chung i an upatmi pakhat a si ve i Pathian Pennak a rat lainak aa ruahchihmi a si. Cu ni cu cawnningani a si (cucu Sabbath ni a nizan kha a si). Cucaah Josef cu ralṭha ngaiin Pilat sinah khan a vung lut i Jesuh ruak kha a hal�.(Mrk.15:43)

 Khuaruahhar asimi cu,   Bawipa nih   Krih chuahnak ding ah  Israelmi a timhtuah ah hin, miphun nganpi an sinak ding ah  JOSEPH(Izipt) a hman. AFapa  zohkhenhtu ding ah   lettama JOSEPH a hman i,   Eden muisam PUMSA in a dinhmi  donghnak  dingah JOSEPH Judah council  chung mirum le thilti khahwnak ina khatmi a hma hi asi.   Hi hna pathum hi   devine power in a thomh hna i,  AMAH CAAH  RALKAP HUAISEN  AH  a hman hna. Jospeh pathum hna nunnak hi  zoh ah  an hmuhmi Kri  hi an umpi sawsawh kho men lo ti fiang tein a lang.

Hi nih fiang tein a kan chimmi cu,  sal asi ah  sifah asi ah, mirum asi ah,   Bawipa nih  an nun a tongh hna i, cunglei fimnak in  a hruaimi  hna mizei hmanh, zei bantuk tihnak le harnak tang zong ah  an thu kho menmen lo ti hi asi.  Zumtu na zummi Bawipa  ah hin lung awtawmnak  na ngei ve maw.  

Bawipa lomhnak nan cungah um ko seh.