7/Mary.....a peh/sect 3
Kanu khaka ah khan na fapa a um kha” tiah a vun ti. A dawtmi zultu cu ‘Khaka ah khan na nu a um khah’ tiah avunti ve(Jhn.19:26-27). Zumtu tampi nih kan Bawipa zulh hi cross lawnglawng putnak ding le sifahnak lawngte tuar ding ah kan ruah tawn. Cuti asi lo. Bawipa nih kan thlarau atang chungah a khamh rualrual hin, kan vulei taksa zong hi a dawt ti, nganfahnak a sangbik a tuar lio ah vailam cung in a nu a chonhnak ah kan hmuh khawh. Tukfornak fakpi chungah cross a pumi na si ahcun hi bia hin ihnem ve tuah. Krih Cung Nung Bik Pathian fapa na pawi lai tiah Gabriel vancungmi nih a chimh lio ah khan, “pa ka hngalh rih tung lo” tiah a leh. Mari a khuaruah a har.
Joseph he anei ding an si caah a thin zong a phang kho men. Asi nain vancungmi nih “Thiang Thlarau khan a cungah a phan lai I, Pathian thawnnak cu na cungah a fu lai”(Luke.1:34-35) tiah a chimh. Bawipa nih minung sinah thil pakhatkhat a tuah lai ah hin chim ta loin a um bal hna lo. Can lak tein a chimh cia tawn hna. Anmah lawng in a kaltak hna lai lo ti a fainter cia. Cu hnu ah Arualchan Elizabeth , tipil petu Johan nu zong a tarlei sang ah nau a pawi zia a chimh I Pathian thawnnak cu lunghrinh rual lo asi zia a fehter. Mary cu lomhnak in a khat. “Thanh tuah ka lung thin Bawipa lianhngannak cu. I lawmtuah ka lungthin,kalung thin na khamhtu cungah. Asalnu nu hitluk innauta ka si ko nain a ka philh lo. Nihin thok in hmailei ahcun mi thluachuaknu an ka ti lai. Bawipa a thawngmi Pathian nih ka cungah khuaruahhar tukin rian a tuan”(Luke.1:40:46) ti tiang in hla asa. Lei le Vanbawi khamhtu a chungah a chuahni ahcun a lawmhnak a luang liam. Zumtu tampi nih, Krih cu ka thihnak ding ah a thi, Vailam ah Amah he ka thih hnu ah Amah sinah a ka thawhpi tiah Bawipa chungah nunthar in hrinthan kan sinak cu thlarau in kan co, kan hngalh ni cu, lomhnak luangliam ah mithli a tla: kan hlim I kan lam pi tawn. Mari bantuk in mi thluachuak ka va si dah kan ti.Amah belte kan chungah Krih a chuah ni in kan vulei sinak a tla vima ve. Dawtmi zong an hel lai bantuk. Vawlei hawi nih hnulei chit i mi hrut deuh ah ruah asi. Mah duhning in khuasak awk a tha tilo. Cu hlan ah ka duhbikmi Joseph sinah tlingkhan remh a rem tilo. Vulei mithmuh ah ngaknu thiang ka sinak cu ka chungah a ummi Krih ruangah ka mualphonak a hung si. Keimah sinak a thleng. Bawipa hmai ah ka lam le ka kui, ka Haleluijah ke ka Amen cu dawtu ka timi Joseph le ka chungkhar, Krihfabu caah zahpi hruai: thlarau ka unau Elizabeth(zumtu dang) sinah ka chuah luh tikah, Krihfa bu dohtu: ka lawitawnnak ka Krihfabu le ka tuanpi hawi caah phungkalh, doctrine kalhtu tiin Ka nunphung le society hmai ah lung in thilak in cheh ding ka hung asi. Ka chuahka in ka zulhmi ka biaknak lampi cu zul loin a lingtalet in, cross hoi in lam lo ah ka kal. Hawi hmailei an kal ah hnulei ah ka kir. Chaklei an panh ah thlanglei ah ka zuang. Minung mithmuh ah mihrut le mi dawhcah lo ka hung si. Minung mithmuh le lenglang ah kan toih cuahmah lio ah chungah a nungmi Krih Pathian ci thabik tu cu a thang vima I, ka nunnak leng ah midang caah nunnak rawl si ding chuah aa tim cang. Cuti a chuah khawhnak ding ah mah inn chung puanbu lum tang lawng ah inok awk a tha tilo. Hiti asi ruangah Joseph bantuk in unau nih zuarmi, thawlmi zong na si kho. Kaltakmi zong na si kho. Tih ding a um lo. na ruah bal lonak hmun ah Bawipa nih thluachuahnak sangbik he nanmah hmang in a thawnnak langhter a duh ruangah asi. Thlarau ah asi hmasa kho. Thlarau lei a fel hnu ahcun vulei thluachuah zong nih a zulh lai ti philh hlah. Can belte a duh deuh kho men.
Ka chungah anih a than deuhdeuh bantuk in ka titsa nun a tun I hmun a lak deuhdeuh ve tikah kan nun re a thei. Ka thawchuah a tawt. Bawipa cu a hmu dingmi nih an hmuh I an biak khawhnak ding ah ka inn, ka khua le chungkhar ka chuaktak in Bethlehem panh a herh. Cuti asi lawng ah van nih hla an sa kho lai. Tukhal le minau ta nih tihphannak le ithlahrunnak um lo tein an rak chonh, an rak pom khawh lai. Cuti si caah BIATAK hmuh cu, chunglei ah Diamon lungvar tlangpi a lo nain lenglei ahcun ihkhun in ka tum I, tuangcar ah itnak, inn lum chung in ka chuak I, vam pang a um lomi caw in ah caw zun, caw ek rim le thopaw le hmaisem an ibutnak hmun ah va ih a hau. Lexus le Mercidis mongh ka timh lio ah bus in cuan a hau. Nicktie le sut hruk ka timh lio ah second hand he hna vah a hau kho men. Na krihfa bu chungah member a thongthong in na ngeih lio ah nangmah lawng hawi ngei loin na tang kho men. Na hawi nusal le pasal nih an sinak status le dinhmun hngawng sang emem in an in chuan lio ah mitthli he na thinlung atap in na khun ruangmang kho men. Hawi nih inntha lotha he tleuzurh in khua an sak lio ah mi inn hlang in um a hau kho men. Johan nih kei cu ka zor lai I a nih a lian ngan lai a ti bantuk in , cu hlan ah mifim cathiam hawikom tha bik na si tawnnak in damlo, mizaw le fihnung mi hmun ah Bawipa chuahnak ding hmun ah kal a hau. Lengkhomh thawng le a bubu in thlacam thawng a len tilonak Rammui ah, nangmah lawng tang cum in thlacam a herh kho men. Na hmaika ah Milem Pathian biak inn asimi seetii le pagoda cercin le na mit zong raa viar in a rangmi khuachia thutdan hramah na thinlung chung ah ceu maw ceu lo in a demi Immanuel hram hnawh a herh lai. Cu ti asi lawng ah lungrawh vansan cel lo ah, vutcam a phulh mi hna nih Krih sin in parthi an hmuh hnga i, Mithli can ah lomhnak chiti(Thlarau lomhnak) le Zion in a rami van hla le thangthatnak an sak khawh ve ceo lai. Kan celh lai maw ?. Tih a nungtuk si lo maw?. Cross lam cu Eden vennak caah a zeiti lei poh I a herh kho i luh aa timmi poh a chok a sam lengmang tu BIATAK VAINAM KRIH PATHIAN ASI. Kan zul ngam lai maw.
Keimah he vailam tah awk ah
Nan si kho lai maw ati
Asi thih tiang kan in zulh lai
Mithawng hna nih khan an ti.
Bawipa cu Bethlehem ah a hung chuak I, Pathian nih a timh ning te le Profet hna chim chung bantuk tein Kalvary lei panh in a nun a her bantuk in, cu lampi cungah mitcaw, Keibai, zeng, phar, mithi, thichuak, hlawhhlang, ngunkhuai khawl, rome ralbawite pafa, Gential te nunfa, Kum 38 mizeng, khuachia tuahmi, a molhmi, zawtnak le damlonak chungah a tangmi vialte cu Amah damnak, nunnak chungah a luhpi dih hna. Hi hna pawl hi, minung pumsa in an um caah tuanbia rel in kan rel tawn. Kan thlarau sining muisam lawngte an rak si. Rawltammi khimnak, thlichia tilet chungah a kalmi caah hnangamnak, sipuazi a rawkmi caah neihnak(Peter surchep), Tihal mi caah nunnak ti, community le Society chungah a tlum tilomi Samaria nu zong mipi sinah thawngtha phuangtu, mihrut thilphorh lawng ah thahnemmi La fate zong Jesuh nih a chak a rengh hnu ahcun Puanthabik cungah a kalmi… Cu hnu ah a donghnak bik, a rapthlaknak bik Thihnak le hramnak Hell innka Kalvary ah thlarau saltang vialte chuahnak thawhthannak darkhing cu lei le van ah a vun tum I, Haleluijah Bawipa nih a hmuh cang ati!!!!!!…
Mary lawng si loin, Hlan zumtu Joseph, a pa nih a dawtbik mi le Pa thuam tling in thomhmi fapa, Moses, Izipt siangpahrang inn chungkhar le Pharoah cozah misa lak ah midawh, ralttuk thiam bik ralbawi, Izipt fimnak, rumnak chung ah tirawl thawbikmi in cawmmi, thil thuam thabik in thomhmi, Salfa asi nain Izipt miphun cungah a lengmi, David Pathian nih siangpahrang siding in chiti thumi le Israel raltuk thiam bik pa, Deniel, Siangpahrang chungkhar le Siangppahrang thisen a kengmi pa, Esther, Ram 127 aukmi siangpahrang nupi le Bawi luchin chinhmi hna zong Hi Krih Biatak chungah an vulei sining phelh dih an si cio ko. Bawipa nih Amah BIATAK in a thomh khawh hnanak ding ahcun minung nih a ser chommi theipit hnah a hlonh pei a herh cu. Cu ti lo ahcun zeitin dah a dawhmi Amah thuam cu a kan belh duh lai. Bawipa hi Amah duhning, Amah duhdan phung le lam te a ngei I cucu midang he itawm a duh lo. Midang thil haln zong a duh lo. Cu ruangah Eden ah dum a kulh. Israel zong vulei miphun dang din in a dang tein Amah BIA in a kulh. Thlarau ina dinhmi Krihfa bu le, Pumpak zumtu zong Amah sin ina rami ticawh lo, nunnak le Amah thuam in thomh an duh caah asi. Misur zuthlum thar bik cu saphaw hlun he a tlak lo. A tuar fawn lo. Misur zu neitu nih zeitin chiah ding a theih dih. Cankhat chung cu titsa thinlung le pumsa ah a har ko lai.
Asi nain Mary caah Bawipa hmurka ngei loin a cat lo. Apawini thok in a zul depmap tu anu, afapa an hlorh can ah ilawm tawn ko hmanh selaw, an hlawt can le an sawsel can ah a tuar vet u, Bethlemhem in aa thok in Kalvary Hell innka tiang a zultu anu nih pumsa in a thukmi muihnak horkuang atan, I cross namhar niha thinlung vialte a chunh a thleh dih ni le, chung sivang in vansang a lamhnii ahcun Kan BAwipa niha nganfah hmanh ruat loin “Kanu..” tiah a vun hramh I, cikkhat thawnnak lawng si loin a nunchung a hnem khotu ding A nunnak dihlak in Bawipa a dawtu a dawtbikmi zultu dawtu le domhtlaitu a ruah piak. Zumtu BAwipa na zulh nak lampi ah harnak ngeichiatnak cu na tong ko lai. Cross lampi cungah cun mei phu le sahrang he calpadar na toh can a um ko lai. Asi nain Bawipa a um ko. Na thlarau lawng a dawlo. Amah cinung a chiahnak na thlarau inn na vulei pumsa hi Bawipa nih a nganfah le lungkuai hmanh ruat loin a sia a herh, I a dawt cikcek tihi philh hin lai ci. Thazaang ngeilo in an tlak hlan ah Bawipa a dir zungzal ko lai. Nan tei khaw lo tiang inn tukforhnak chungah kan kaltak hna lo. Nan tei khawh lo rualrual in chuahnak lam Bawipa nih an khan piak ko hna lai.
Bawipa lomhnak nan cungah um ko seh.
