By - Rev. Lal Pek Lian
Hrial A Herh Caan A Um Tawn,
Jesuh nih cun hramhram in siangpahrang i ser awkah hung hnuh an ka duh ti kha a hngalh caah tlang cungah khan amah lawngin a kal tthan. Johan 6:15
Hmuhning i dan ahcun zumhnak zong aa dang tawn. Theihning aa dan ahcun i lunghrinhnak te hna a chuak kho. Hmuhning le theihning aa dan cang cun cohlanning zong aa khat kho hrimhrim lo. Mi thong nga rawl a peknak kong hi kan lung a pemning, kan uarning aa khat cio lai lo. Barli changreu hlum nga le nga pahnih a karhternak lei hraap kha khuaruahhar mit in a cuanmi kan um lai i, cu lio ah Barli changreu hlum nga le nga pahnih a hnulei i aa thupmi Amah Bawi Jesuh kha Khuaruahharnak nganbik in a hmumi zong an um ve ko lai. Voi tampi cu khuaruahhar Bawipa kha hmu lo in a tuahmi khuaruahhar thil tu kha ngan deuh in kan hmuh tawn caah khuaawg kan pemh khawh lonak hi a si tawn. Amah nak nakin a chungin a rung chuakmi thluachuahnak kan duh deuh tawn. A hrampi kan tlolh cangah cun kan donghnak tuanbia hi aa dawh kho bal lo.
Israelmi nih an tuanbia ah Pathian he thukpi in tuanbia an ttial tti i an philh khawh lo bikmi cu Iziptram in sal sinak in Moses nih a chuahpinak hna kong tuanbia kha a si. Israelmi nih Bawi Jesuh hi Moses bantukin Rom cozah pennak tang in a kan chuahpitu a si lai ti kha i ruahchan hna sehlaw a dawh. Cu ruang ahcun siangpahrang i hramhram i canter an timhnak hi a si (CBC, p. 745). Khrih kha a sunparnak a zik a phan cang i cu lio ahcun tukforhnak nganpi nih a hun dawi colh ve; Vailam tel lo Pathian Penak cu pennak a si lo zia kha Jesuh nih a hun hngalh tthan i a hrial i tlang cungah khan amah lawngin a kal (cf. Matt. 4:8-10). Moses nih a rak hruai lio hna ah khan an paw a ttam tik ah mana changreu kha a rak pek hna. Jesuh Khrih nih changreu le nga kha a hun karh ter ve tik ahcun mana changreu bantuk ah khan an rak ruah ve ko lai. Asinain Jesuh cu anmah i an ruahing mana changreu kha si lo in van i a rung ttummi van mana tu a si (Johan 6:58). A nih a pennak cu ral tuknak ah si lo in dawtnak tu ah khan a si. A nih a pennak cu hmuh khawhmi cozah pennak ah si lo in thinlung chung tu ah khan a si.
Toidornak lungthin le bochannak nganpi he aa semmi siangpahrang tiah Pathian kan fuhnak, kan auhnak hi cu duh a nungmi a si ti kha Salm hla ah kan rel khawh hna. Pilat nih siangpahrang na si maw tiah Bawi Jesuh kha a hal tik ah a sinak kha a chimh (cf. Johan 18:33-37). Misual pa amah he vailam i an tah vemi pa nih ngaihthiamnak a hal tik ah “siangpahrang” tiah bochannak nganpi he Jesuh cu a auh (Luka 23: 40-43). Hramhram in siangpahrang i ser an timh kha a duh lo; asinain kan Bawipa Jesuh Khrih cu kan Siangpahrang a si. Bawi vialte lak i Bawi bik a si. A nih cu rangtum rang i cit i a lal in lal hnawh ding in a kan uktu siangpahrang phun si lo in laa fa note tu i cit i kan sin ah toidornak he a rami siangpahrang a si. Kannih Laimi nih tah kan Bawipa Jesuh Khrih hi hramhram in maw siangpahrang ah kan ser tawn, asiloah upatnak le dawtnak in dah kan siangpahrang na si kan ti? Bawi Jesuh nih cun vailam tah lam nih a zawhmi pennak kha aa thim i tukforhnak cu a hrial i a tei khawh. Dawtnak le toidornak in a khatmi kan siangpahrang cu thinlung dihlak in “ka Siangpahrang Bawipa” tiah vailam cung i a rak aumi pa bantukin Bawi Jesuh cu au ve hna usih. Ngaihchihnak thinlung he kan fuhpanh ahcun “a dum dawh” chungah siangpahrang nih lam a lenpi mi pa, mi nu bantukin a kan cohlan ve ko lai.
