Atu ka ttial mi hi Laimi le peem ti a si i Joel ling nih a ttialmi lungput chungah ka lak mi a tam deuh cu a si a thei rih lomi kan ca deuhah siseh ti ka duh. Ka palh sualnak a um ahcun nan rak ka ngaithiamnak lai kan nawl hna. Nihin Laimi nih kan ram kan chuahtak in kan peem thluahmahmi hi nihin Mino nih zeitindah ka ruah cio ti hi ruah a cu cang lo maw? tiah a hmasa ah kan sawm hna kan dihlak in.
Kan peem awk a si le si lo nakin kan lungput dingtu hi tlawmpal ceihtti usih ti ka duh. Laimi hi miphun dang sin kan phanh tikah zei lungput dah kan ngeih ti hi ruah a hau. Cu hlan kan hmanthlak kan zoh tikah miphun dang sin i khua kan sak le cangka in miphun dang sining fawitein aa lak colhmi kan tam. Miphun fa kan si ruangah a si rua, Kanmah sining nakin miphun dang sining a uar deuhmi miphun kan si. Laimi lak hmanhah hin kanmah Hakha lei hi kan zualhma. UKtu cio hmanhah laitlai nakin miphun dang uktu kha kan upat deuh hna kan ttihzah deuh hna (Miphun dang uk kan i ziak deuh rua). Zu ri ciocio zongah kawl holh in a holhmi cu kan ttihdeuh ving hna. Mah sining nakin midang sining a uar deuhmi miphnu cu miphun dang he i cawhbak lo lawngah a him kho ding khi kan si. Atu kan dirhmun tiang kan phanh zong hi Lairam nih a kan khamh caah a si kan ti khawh. Lairam ah sui le ngun a chuaklo sipuaizi mitin kan cuanh tikah miphun dang rathnawh phu a si lo, Cu nih cun a kan himter bik rua ka ti. Laimi hi ramdang ah kan kal awk a si lo, kan peem awk si hrimhrim lo tiin ahohmanh nih kan i thluah kho lai lo. Kan kal ko lai a kal kho tawk cu kal a si peng ko lai, Hi ahhin ruah awktu cu, Cu hlan kan sining le kan hmanthlak ning cun a peem poah tlau thluahmah kan fawi. Kan peem in kan tlauthaitu ahcun kan miphun caah sungh le zatlak taktak a si hnga. Kanmah nih a poi in kan ruah lo zongah hringtu kan nu lairam cu lileng le lungkuai in fazuun a ngai camcin ko lai. Hringtu nule pa lung a lawmhtertu hi an kehram i a tthumi fale theng an si lem lai lo,Hmun dang le tluangdang i khua a sami fale zong khi an lunglawmtertu an si tawn; Phundang in chim ahcun nulepa cungah dawtnak a ngeimi nule pa sining a philh lotu fale paoh hi nule pa lunglawm-tertu an si tawn. Kehram i umhnawh le hmundang i um nih lai a rel lem lo .
Lairam lengah a ummi nihin Mino pawl nih kan ruahawk tu cu kan peem zong ah kan miphun sining hi zeimawzat cu kan i peempi chih ahau. Khoika ka phanh paoh zongah Laimi si khawh peng kan i zuam a hau(Rom na phanh ah cun Rom sining in nung ) timi phungthluk ningin kan nun a hauh caan a um. Asinain mihrut thingfung tlaih in kan i tlaih peng awk a si lem lo. Hi phungthluk hi miphun fa deuh ko nih hin kan uar khun rua kan zulh khun rua ka ti. Tahchunhnak ah Kawlram kan phanh tikah kawl sinning kha zakhat chungah zakhat in zulh i nun kan i zuam. Tlawmpal te lai sattaal i kan vun um deuh ah, kanmah le kanmah kan i hro, Kawlram a si hi, Lairam ah maw na rel kan i ti. I ti a herhnak zong cu a um ve tawn nain a herh lo tiangin kan sining vialte thuh dih le thlau dih aa timmi kan tam. Anmah kawl tu cu Lairam an rat tikah kawl sining kha a ningte in an vun i ken i an i kenning tein khan kan cohlan hna. Lai sattaal le sining deuh in kan van umhnawh hna zongah, (na oh tuk) lai ah maw naa rel kawl a si hih, kan i ti. A taktak ti ahcun aa khat lomi pahnih kan i ton tikah, kan i khah lonak kha kan i cohlan piak veve awk a si. Laimi zong vawileicung ah miphun pakhat kan si ve bantukin miphun dang he kan i ton tikah an sin i khua kan sak tikah miphun pakhat kan sinak kha kan i nunpi peng awk a si bantukin miphun sang zong nih anmah miphun he aa khat lomi miphun pakhat kan si khan kan cohlanpiak awk a si. Cu ti a si khawhnak dingah rian a ngei bikmi cu miphun dang an si lo kanmah kha kan si ko. Kanmah le kanmah kan i upat hlan lo cu aho nih a kan upat bal lai lo mah le mah kan i nautat chung cu nautat nakin kan luat kho bal lai lo. Lairam chuaktak in kan peemmi hi kan lungthlitum le kan saduhthah cu a si bal lai lo kan ram sining ruangah a chuakmi hi a tamdeuh cu kan si ko lai, Kan pumsa a peem ko zongah kan thinlung a peem thai lo ding hi a biapi. Kan phanhnak hmun cio ah kan miphun sining kan nunter peng ding tu kha a herhbik. Cu nakin a biapi deuh in kan ruahding pakhat cu hawi an kal cio an peem ai ti pat in ramchung ah siaremte in a um kho zong nih umkal cio duhnak thinlung kan ngeih lo ding hi a si. Ramdang kal i fiimthiamnaak va cawn hna cu kan uar peng awk a si ko. Asinain nihin kan sining ahcun fiimthiam ca cawn si loin sining le kan harnak ruang i kal thluahmah a simi hi a poi. Hi kan sining le kan harnak hi ramdang kal le peem bak lawngin "PHISINNAAK:" lamdang kan kawl ahau. Zapi ca i kan kawl khawh lo hmanhah kanmah pumpak cio caah cun chunmang kan manh cio cang hna usih tiah ah kan sawm hna.
JBiak TTha Lian
Cheras ,Alam jaya
