1. A ruh tum hlah,a haang na hap lai.
A ṭha bikmi le a ṭhacem rumro lawng na duh ahcun a zaapi tein na sung dih sual lai. A haak a kau tukmi le a za tiah a tawkzawn a hngal lomi, a duh a faak tukmi hna pawl sinah chimmi bia a si.
2. Bianeem chim le lamphei kal:
Lamphei kal cu zaang a dam bantukin hmurkaneem le awneem te i biachim cu a ngaitu caah theih a nuam i, zaang a dam tinak a si.
3. Der pheh chia, paam pheh chia:
Zei si ṭung lo,der ngai ṭung i, a ṭhawng ngai bantukin i umter le sifah ngai ṭung i,a rum ngai bantukin i umter cu a ṭhalo chiat chinchin naktu a si tinak a si.
4. Ei cutmat, ṭuan cutmat:
Ei zong tampi ei ding,ṭuan zong tampi ṭuan ding. Ei lawng duh i rianṭuan huam ṭung lo cu a ṭhalo tinak a si. Rianṭuan huam lomi hna caah cawnpiaknak i hmanmi a si.
5. Forhforh ah naam khiak, phaihphaih ah ngal kiak zaam:
Vun fak,vun forh,vun forh ahcun naamte hmanh a khiak kho ding bantuk i um ṭung, ṭihnak lei i vun pheih,vun chim ah le a ngal hmanh kiak dih cikcek lak tiangin a zaam ding phun a si ṭungmi pasal tlinglo pawl hna an ziaza chimnak i hmanmi bia a si.
6. Hmur fong bia la, zaang fong ṭhahnem:
Holh tamtuk cu a ṭhalo, a herh lomi bia tiangin chim sual a fawi. Sihmanhsehlaw, hawi hlei in thazaang chuah khawhtu cu a ṭhahnem ngaingai tinak a si. (Zaanghlei cawi a ṭhatnak a si.)
7. Innpa nungak le Lam pawng thei:
Innpa i a ummi nungak he i duh cu lam pawng i a tlaimi thei fawi tein va lawh duak lengmang bantuk khi a si. Ka kal ti lai lo,ka leeng ti lai lo ti zongah i suum khawh a har ngai tinak a si. (Innpa i, nungak a ngeimi nih nan hngalh cem lai.)
Salai Biak Lian Thawng
Norway
