By Thawngzam, Robert
GERMANY
Date: February 29, 2012
Sermi saram pawl(minung) Nunnak cu “thi chungah” a um i nan nunnak ca i biaktheng cung i remnak sernak cu thisen cu a si (Lev.17:11, NIV, Heb. 9:12).
Unau, hihi zungzal nunak lam a rak umtuning kong a nungmi PATHIAN Thlarau Thianghlim sin in a rami Biathli cu a si caah rak thei hram ve ding Jesuh min in dawtnak he kan sawm: -
Part one:
I. Krih Jesuh thisen (tiva) cu tanglei in cunglei ah a luangmi a thiangmi tiva, zungzal nunnak phakpitu lam a si.
Azei bantuk mi (cawnak a ngeimi he ngeilo he) paoh nih kan hngalh bantukin hi Vawleicung tiva vialte cu cunglei in tanglei ah, a sannak in a niamnak lei ah an luang dih hna. Cucaah minung fimnak le thluak nih a sining kha theih khawh le tuak khawh dih a si caah cu tiva hna cu khuaruahhar thil ah chiah khawh an si hna lo. Sihmanhsehlaw, Krih thisen cu tanglei in cunglei ah, a niamnak hmun in a sannak hmun lei ah a luangmi tiva phunkhat a si.
Scientifically (teihpan fimnak) le Mathematically (tinchia-ni fimnak, 2+2=4) in tuak khawh lomi le tuak thiam lomi phun asi i, minung fimnak, hngalhnak le thiamnak in fianglakin (approve) tuah khawhmi le theikhawhmi phun tiva a si lo. Zeitluk in cawnnak sang ngei ko hmanh u si law, Krih thisen kong le sinak cu amah Krih Jesuh nih a kan pekmi Thlaru fimnak tel loin cun hngalh khawh le theih khawh dih taktak a si lo. Cucu khuaruahhar tiva a sinak cu a si.
Cu Khuaruahhar tiva; Krih thisen tiva cu Vailamtahnak cung in a hram a put (aluang) i a sangbik hmun a nungmi PAHIAN thinlung chungah khin a va dong. Cucaah cu Krih thisen chungah a pil i aa hnimmi hna cu, kanmah tein Pa PATHIAN sin (zungzal nunnak vanram) phanh khawhnak ding caah fak piin (heh le chih tiah tuahsernak, le phung le phai ning in) zuam hau lo tein zumhnak le PATHAIN vel thawngin (Efe. 2:8-9) kan ih bu, kan thut bu, kan dir bu, le kan hrilh bu pi zong in (kan sining tein) cu thisen tiva pi nih cun Vailamtahnak hmun in a kan fet (a kan kalpi, put ciammam) i sualnak le thihnak a um ti lonak hmun, a kan sertu PATHIAN thinlung chungah cun a kan luhpi. Amen!
Krih thisen khuaruahhar a sinak cu, zumhnak in cu thisen tiva chung ahcun a vun i peih-hnim i, cu tiva nih a kalpimi hna paoh cu lam tantim (sualnak le sual biacek thihnak in a khatmi nun) ah a kan chia ta lo i, a kan kal tak fon lo, a dongh kik kek tiang in, Pa Pathian thinlung chung tiang kha a kan kalpi, a kan fet. Cucu fiang khun in kan theihtiam, fiannak ding caah Jesuh nih, “kei cu Alpha le Omega, a hramthawk le donghnak cu ka si (Biat.22:13) a ti. Cucaah cu Krih tisen thawngin PATHIAN sin kan phan i, PATHIAN he cun remnak kan hmu (Kolo.1: 20). Fa ah cohlan kan si i, fa kan si lawng hmanh si ti loin rocotu zong kan si chih (Rom. 8:17) Hallelujah!
Phundang deuh in kan chim a si ahcun vawleicung tiva pawl (ti) nih cun kan taksa nunnak ca le tthatnak caah a kan bomh, sihmanhsehlaw Krih tisen tiva tu nih cun kan thlarau zungzalnak nunnak ca le tthatnak caah a kan bomh i lam a kan sialpiak. Amen! Krih tisen tiva dah ti loin Pa PATHIAN thinlung le umnak vanram tiang a luangmi le a phan komi tiva an um lo. Cucaah Pa sin phanh in zungzal nun kan duh ahcun Krih tisen nih a kan awnhpiakmi lam in kan kal a hau. Krih hlei lam a um lo (Jhn. 14:6).
Krih Jesuh thisen cu vawleicung a nganbikmi Tilianh (flood) nakin a ngan deuh i a power thawng deuh fon. Vawleicung i tilianh nih cun sermi thil kha a hrawh hna i minung kha harsatnak a pek ton hna. Sihmenhsehlaw Krih thisen nih cun sermi thil kha a khamh hna i, minung kha harsatnak vialte chungin luatnak a kan pek. Setan sin in a rami tilian-harsatnak le buaibainak le sungh zatlaknak cu zeitlukin ngan ko hmanh sehlaw cu nih cun Krih thisen-tidil chung i a ummi zumtu mi hna cu a hrawh kho ti hna lo. Amen!
Krih thisen nih cun Pa sin kan phanh khawhnak ding caah le zungzal nunnak kan hmuh khawhnak ding caah donkhantu a simi le lam khamtu a simi Setan riannak le sualnak vialte kha Vailamtahnak cungah a hrawh dih cikcek hna i, nangmah lei keimah caah lam a kan sialpiak cang. Amen! Sual thawnnak le Hell ram kalnak lam vialte cu a kan hrawhpiak dih i, zungzal nunnak chungah cun a kan luhpi cang. Cucaah a ho mi hmanh kan si ah zumhnak in Krih chungah a ummi i, Krih tisen in cokciami paoh cu PATHIAN fa kan si cang, zeitikhmanh ah kan thi ti lai lo, kan thlarau zungzal nunnak kan ngei cang (Biat. 5:9-10,Jhn. 3:16). Amen! Unau atu hrimhrim ah zumhnak in ra law Krih tisen tiva chungah cun vun pil ve tuah. Na taksa dam lai, na thinlung a nuam lai i, na thlarau zungzal nunnak a hmu lai. Amen!
Unau hihi ve thei peng, "Van le Vawlei nawlngeihnak (power) vialte lak i a sangbik nawlngeihnak(power) cu Krih thisen, bia, le min chungah an um dih". Vawlei bawi le president pawl le na pawngkam i na bochanmi tangka rumnak power hna kha an si lo. Nawl ngeihnak vialte cu Krih le amah zumtu vialte hna cungah a um dih. Krih thisen, min le bia cu kan damnak, kan sual ngaithiamnak, kan luatnak le kan teinak an si. Amen!
Part two rak rel chap te, ka rak peh than te lai. Areltu dihlak cungah Bawipa thluachuah um hram ko she!
