By Thawngzam, Robert
GERMANY
Date: January 26, 2012
Jesuh nih, “Bawipa Bawipa tiah a ka timi paoh in Vancung Pennak chungah an lut dih lai tinak a si lo, sihmanhsehlaw Vancung i a ummi PA nih tuah hna seh ti a duhmi a tuahmi lawnglawng kha an lut lai” a ti (Mt.7: 21).
Hikazawn i “Vancung Pennak” timi hi a hnu ah PATHIAN Thlarau Thianghlim nih nawl a ka pek ahcun ka rak tial tthan te lai. Acung i Mt. 7:21 he pehtlaiin, asiahcun: - Vancung Pennak luhkhawhnak ding caah “Vancung i a ummi PA nih tuah hna seh ti a duhmi” cu zeidah a si kun? Apakhatnak ah: - Cu Vancung i a ummi PA PATHIAN nih tuah hna seh ti a kan duhmi asiloah PA duhnak tuah” ti cu a tawifiannak in “Ti le Thlarau in Hrintthan hi a si ko” (Jh.3: 3,5), cu tin Thlarau in Hrinthan/Pianthar lo ahcun Vancung Pennak chung luhnak lam pakhat tehmanh a um lo. Jesuh Krih hrimhrim nih nan Hrinthan/Pianthar hrimhrim a hau ati. Hrinthan loin Vancung Pennak (Vanram)luhnak lam dang a um lo tiah PA lungthin duhnak a theibiktu Jesuh Krih nih a ti caah minung nih al khawhnak nawl kan ngei lo. BAWIPA Bia kha zuh (lakdih lo) in chapchih (achimi nakin perh le bet) fon hlah u a ti (Biathlam.22: 19). Hrinthan/Pianthar loin lam a um ko timi Cawnpiaknak a um sual ahcun cucu Setan pa Bia cawnpiaknak chiahru, thlarua tthihtertu a si, i ralring kan herh. Vawlei cung i zeibantuk tthatnak tuahmi hmanh hi Thlarau in Hrinthan/Pianthar nak a um lo ahcun Vancung i a ummi PA duhnak si loin thinhunnak chuahpitu tuahsernak tu an si deuh. Vancung i a ummi PA cu Thlarau a si caah Amah duhnak kan tuah khawhnak ding ca ahcun Thlarau in hrinthan kan hau ve (Jh. 3:7-8, 4:24).Zeiruangdah/Zeitindah cucu a si khawh?
A si khawhnak ruang cu Sualnak ci he kan Nu le pawchungin hrin asiloah sualcia in hrinmi kan si caah (Psam.51: 5) a si. “Sualnak Ci” (Bible nih cu Sualnak Ci cu: taksa sinak, pumsaduhnak, vawlei tiah min a pek fon) kha kan chungah a um caah a hohmanhnih cawnpiak lo tein kan Nu le pawchung kan um lio hrimhrim in sualnak kan tuah cang. Zeitlukindah kan tuah ti ahcun kan nu le hmanh kha ttha tein anmah duhning in kan umter thiam hna lo, an re kan theih hna, kanmah duhning tu kha kan i zulhter hna. Hika zawnah “sualcia in hrin kan si ti tikah sualnak kha kan tuah khawh chungin kan tuah, kan duh chungin kan tuah tinak si loin, kan tuahmi paohpaoh ah sualnak aa tel tinak tu a si deuh”.
Minung mithmuh ah tthatnak tampi zong kan tuah kho taktak ko, zumlotu Buddhists pawl zong nih tthatnak-good works, deeds cu an tuah taktak ve ko, sihmanhsehlaw, cu Sualci in hrin kan si caah a tthabik kan tuahmi zongah sualnak te kha aa tel peng tinak tu khi a si deuh. Kan tuahmi paohpaoh ah sualnak aa tel caah cu Sualnak (sualnak ah a ngan a fa aa khat dih, an dihlakin sualnak an si ko) a huatu/duhlotu PATHIAN nih cun sualnak ci aa tel lomi Thaing Thlarau in Hrinthan/Pianthar loin kan tuahmi cu zeitluk ttha hmanh sehlaw, ka duhnak asi ko hi tiah a kan cohlanpiak kho lo.
Curuangah cu thil a umtuning cu Jesuh Krih nih fiangtein kan lungpiang ding tein a chimh, “ Cu Ni cu a phak tikah, mi tampi nih Keimah cu, ‘Bawipa Bawipa na min in Pathian bia kan chim i na min in khuachia kha tampi kan tthawl hna i khuaruahharnak tampi kan tuah hna’ an ti lai. Khi tikah nannih cu aho nan si kha kan hngal bal hna lo. Kal ko u, tthat lonak a tuahtu hna, tiah ka ti hna lai” a ti (Mt. 7:22-23). Hrinthan/Piangthar loin tthatnak tampi tuah khawh a si taktak ko, asinain cucu Vancung Pennak chung luhnak ding caah a za lo.
Cucaah PATHIAN lung kan ton i a Vancung Pennak chung kan luh khawhnak ding ca ahcun Sualnak ci in hrin lomi Thiang Thlarau ci in hrinmi Jesuh Krih Bia kha zumh in Sualnak ci aa tel lomi Ti le Thlarau in hrinthan kan hau. Cucu Vancung i a ummi PA nih tuah hna seh, cuticun si hna seh ti a kan duhpiakmi cu a si ko. Unau, “Vancung Pennak” cu ei le din menmen ah a si lo, Thiang Thlarau chungah lawmhnak, hnangamnak, daihnak, dinfelnak le dawtnak tu a si deuh (Rom. 14:17). Amen!
Pahnihnak ah: - Cu Vancung Pennak chung i a luh dingmi hna (Fa ah cohlanmi) caah Vancung i a ummi PA, PATHIAN tuah hna seh ti a duhmi asiloah a duhnak tuah cu “Thiang Thlarau lamhruai ningin kal (Rom.8: 9,14) le Nun thianghlim tein Nun hi a si” ko (1Thes. 4:3-8). Aruang cu Thlarau Thianghlim lamhruainak tel loin Vancung i a ummi PA a duhnak-Biatak hngalh khawh a si lo i, kan sual i hmuh khawh zong a si lo. Sual i hmuh loin BAWIPA a thianhlimnak hngalh khawh le hmuhthiam khawh a si lo. PA duhnak tling tein a hngaltu taktak cu Thlaru Thianghlim lawnglawng a si. Cucaah PATHIAN Thlarau nih a hruimi hna cu PATHIAN fa le kan si (Rom. 14). Cu Thiang Thlarau nih cun kan sualnak kha an fianter, theihter, hngalhter i, Biatak chung ahcun a kan hruai, cun cu Biatak nih cun luatnak a kan pek (Jh. 16:8-13). Amen!
Zeiruangdah nun thianhlim le lungthin thianhlim cu a herh kun ne?
Hihi an herh taktak, aruang cu Nun thianhlimnak le lungthin thiang ngeih loin a Thiangmi BAWIPA hmuh khawh le lungton khawh a si lo (Heb.12:14, Mt. 5:8). Cucaah kanmah le kanmah i hleng ti hna hlah u sih. Vuitampi cu midang nih si loin kanmah le kanmah tein kan i hleng, a pawi lo, hi thamtham cu timi ruahnak le bia pawl nih kan thlarau nun a thah ton. Thlarau lei kong he pehtlaiin BAWIPA bia ah a pawi lo timi a um lo, a pawituk timi lawng a um. Bawipa bia nih (Galti 6:7-8) ah nanmah le nanmah i hleng hlah u a hohmanh nih PATHIAN cu an deh kho lo. Minung nih a tuhmi cu a zun ko lai. A pumsa duhnak lo ah a tuh ahcun thihnak kha a zun lai i, Thlarau lo ah a tuh ahcun Thiang Thlarau nih zungzal nunnak a pek lai a ti (Vancung Pennak ah a luh lai tinak a si ko). Hallelujah!
Nun thianhlimnak ngeih lo zongah a pawi lo timi Cawnpiaknak cu Setan sin in a rami a si i, Cawnpiaknak chiahru, thihnak lam lei kalpitu cawnpiaknak asi cucaah i ralring kan hau. Hika zawnah theih ding cu, Nunthianhlimnak cu a hrinthan/piangthar ciami, Vancung Member a si ciami caah chimmi a si. Bible cathiang nih fiang tein a chim, “PATHIAN nih nannih cu a thiangmi le nu le pa sualnak aa summi si hna seh ti kha an duh hna. Nan dihlak in nan pum uk kha nan thiam awk a si, nan pum cu nan upat awk le nan thianter awk a si. PATHIAN nih sualnak tuah lengmang dingin a kan au lo, nun thianhlimnka ngeih ding tu ah a si deuh” a ti (1Thes. 4:3-8). Nan pum cu Thlarau Thianghlim biakin (a umnak) a si caah nan thianter awk a si, cu Biakinn a hrawhtu cu hrawh a si ve lai (1Kor. 3:16-17, 6: 19-20). Genesis in Biatlam tiangah nan pum-Thlarau Biakinn nan hrawh zongah a pawi lo timi a um lo. Nanmah le nanmah i hleng hlah u (2Kor. 6:9-10). Nannih an kotu hna PATHIAN cu a thian bantukin nannih zong thiang ve u, “Keimah ka thian bantukin nannih zong thiang ve u” (1Pet.1:15-16) tiah BAWIPA nih a ti.
Cucaah mi pakhat nih cun Kei cu ka hrinthan/piangthar cang, Vancung Nunnak Cauk chungah min tialmi ka si cang tiah a kaa in chim lengmang in pumhnak biakinn chung le adangdang ah Hellelujah, Amen ti zong in au lengmang hmanh sehlaw, nitin a nunnak ah “Nun thianhlimnak” a ngeih lo a si ahcun cucu sualnak ci aa tel lomi Ti le Thlarau in hrintthan/pianthar mi si loin amah minung tluak (fimnak le hngalhnak le fiannak sawhsawh) in a fianmi le lungthin tel loin a kaa leng in a chimmi tu a si deuh. Phundang in kan chim a si ahcun Jesush nih a chim duhmi PA duhnak kha a tuah si loin, amah minung duhnak a tuah tu kha si deuh. PATHIAN dawtmi fa kan si cu kan tluak nih si loin kan nunnak nih a hngalh deuh awk a si.
Cubantuk nunthlennak a um lomi nunning in hrinthan/piangthar le Krihfa si cu BAWIPA nih a fihmi phun, cunglei i ka langhter cang bantuk in Jesuh nih nannih cu a ho nan si kan hngal hna lo a timi pawl kha an si. Ka hrinthan/piangthar ti lengmang ttung i nuntlennak hmelhchunnak le langhtertu tthabik a simi nun thianhlimnak ngeih lo (rithmangmi Wine, Beer, Zu phunphun, Khaini, Kuak, Sadah, Misual a tong lengmangmi, nu le pa sualnak a tuah pengmi, etc.) le lungthin thiannak a ngei lomi (mi tthatlonak kawng ceih a huamtukmi, mi huat le rem lo a ngei pengmi, mi sualnak lawng hmuh i mah sualnak aa hmuh lomi, ka palh bak tiah lungthin dih umlak in sual ngaichihnak ngeih lo le mi toi ah aa dor duh lomi, etc. pawl) cu Setan duhnak tuahtu tthabik an si tinak khi a si ko. Nannih cu nan pa Khuachia pa fa kha nan si caah tuah nan duhmi cu amah duhnak lawngte a si a ti (John. 8:44).
Anungmi PATHIAN Bia nih cun hitin ati, “Krih chungah a ummi paoh cu sualnak chungah khan an um peng lo; sihmanhsehlaw sualnak a tuah pengmi nih cun Krih kha a hmuh zong an hmu bal lo i a hngalh zong an hngal bal lo. Ka fa le a hohmanh i hlenter hna hlah u, a dingmi thil a tuahmi paoh cu miding a si ko. Cun sualnak a tuahmi paoh cu Khuachia (Setan) fa a si ko, zeicahtiah Khuachia cu a hramthawk tein a rak sualmi a si” ati (1John. 3:6-8). Cucaah a hofa kan si cu kan nuncan le ziaza le kan biachim holhrel nih chim hau loin an langhter ko. Nang a ho duhnak dah na tuah ve ton? Thingkung cu a tlai in a tthat le chiat kha a thei ko tiah Jesuh nih a ti. Zeibantuk tlai dah kan tlai timi nih hin Vancung i a ummi PA a duhnak a tuahtu kan si le si lo cu an langhter ko.
Hihi va thei peng! Pastor pakhat a si vemi le PATHIAN riantuantu pakhat ka si ve aa timi nih hi Jesuh biacah, Vancung Pennak luhnak khawhnak lam “Hrinthan/Pianthar” a herhnak kong le “Nun thianhlim” ngeih a herhnak kong a Krihfabuu sin le mipi sin ah a chim bal lomi Pastor le Riantuantu pawl cu a nungmi PATHIAN duhnak a tuahtu taktak le rian a ttuantu si loin Setan rian a tuantu le amah pawcawmnak caah Pathian min i put riangmang in rian a tuanmi an si. Cu pawl nih cun PATHIAN nih huat lai le thangchiat lai kha ttih loin Minung hawi nih huat lai le thangchiat lai kha an ttih deuh ton.
Cucaah PATHIAN biatak nakin Social Gospel-luhmuhyie thawngttha kha an chim deuh. Cu social gospel cun mi vialte kha lamping ah anmah bantukin an pialter hna. Minung nihcun tthangthatnak le upatnak cu an pek taktak ve ko hna a si nain anung PATHIAN hmai ahcun Mark an hmu lem lo. Cucaah “Nun thianhlimnak a ttanhmi cu PA PATHIAN a ttanhmi an si i, nun thianhlimnak a ttanh lomi cu Setan-Khuachia a ttanhmi an si ve”. Zeiruangdah ti ahcun PATHIAN Fapa a hung langh cu Khuachia (Setan) riantuannak (kan taksa duhnak) hrawh awkah hin a si (1John. 3: 8).
Cucaah PATHIAN fa a simi paoh nih cun sualnak (Setan duhnak, taksa duhnak) kha an tuah peng lo. An tuah sual hmanh ah chihkhat teah an sual an i ngai chih i, cu tthatlonak cu an hrial i PA PATHIAN duhnak tuah kha Thiang Thlarau bomhnak thawngin an i zuam peng. Zeicahtiah PATHIAN thlaici kha an chungah a um, cun PATHIAN cu an pa a si caah an sual kho peng lo (1John.3: 9). Hallelujah- Amen!
Cu Vancung Pennak chung luhnak ding ca ahcun “Nunnak Cauk” chungah kan min khup le tial kan hau fon. Cu Nunnak Cauk chungah min khup ciami hna, cung leiin a rami Thlarau Thianghlim in hrintthan cangmi hna cu an nunning hlun (taksa sinak-hrinthan hlan an nunning le ziaza) kha a lo i nunnung thar (nun thianhlimnak le lungthin thiannak ziaza le nuncan) in an i thawk cang (2Kor. 5:17). Amen!
Ka dawttukmi ka Laimi hawi, Unau hawidawt vialte hna, atu ah cu Vancung Pennak nunnak Cauk chungah cun na min aa tial ve cang maw? Nan Chungkhar dihlak in nan min aa tial taktak cang maw? Na fanu, na fapa, na nu le na pa, na u le na nau an bau sual maw?
Pathian ka biak ka zumh ti ve ttungin Jesuh nih kan hngal lo, nang sualnak a tuahtu pa, a tuahtu nu timi na si sual ve maw? Atu ah rak check tthan tuah. Caan a liam hnu cun naa ngaichih zongah caan a um ti lai lo. Vawlei Bawi le mirum hna Cauk chung le UN office pi i kan min aa tial hmanh ah kan i lawmh ahcun zeitlukindah Vancung Pennak Nunnak Cauk chuangah min tial kan si cu kan i lawmh chinchin awk a si. Unau, Vancung Pennak nunnak Cauk chungah min aa tial lomi paoh cu Hellram ah zungzal thih loin hremnak hmun ah tlak an si lai dah kaw (Biathlam.20:14-15).
Bawipa bia nih hi banghin a ti, “ mitthli he ka nawlh tthan rih ko lai, mi tampi cu an nuncan ziaza nih Krih Vailamtahnak ral ah a canter hna. Annih cu Hell ah an tla ko lai, zeicahtiah an Pathian cu an pumsaduhnak kha an si ko i ningzah awk a simi thil kha an i porhlaw i hi vawleicung thil lawnglawng an ruat” a ti (Filipi. 3: 18-19).
Nang na dirhmun zeitin? Cucaah ka miphun hawi hna, Zu (rithmangmi Beer, Wine, etc.) kha dingin ri ti hlah, cu pawl cu nangmah an hrawhtu menmen an si kha, cunak chalcun Thiang Thlarau tu khan khat deuh cang (Efe. 5:18). Hellram phak na duh lo ahcun Zeitindah ka nuncan ziaza a si ti kha ttha tein i zoh ve law, Mihrut bantukin um sual lai cih, Mifim bantukin um i zuam. Atu kan Nikhua hi Caan chia a si caah Caan ttha na hmuhmi kha hmanthiam i zuam cang hawidawt (Efe.5:15-16), Caan ttha na ngeih lio ah PA PATHIAN duhnak tuah cu i tim ve cang.
BAWIPA nih dawtnak in an hngah ko. Hellram tlak lai cu an siang lo. Chihkhat ca te lawng a simi Vawlei nuamnak le rumnak hmuh duh ah maw, BAWIPA duhnak tuah kha phihl sual lai cih. Thihnak nihhin Hngakchia, Upa, mirum le sifah a hrial lo, cucaah a caan lio ah BAWPA duhnak chungkhat tling tein a tuah khotu si hram ding ah Thiang Thlarau nih in bom hram ko seh! Amen!. PA PATHIAN a duhnak a tuahmi, sualnak aa tel lomi ci Thlarau in Hrinthan/Piangthar cangmi, nunnak cauk chungah min tial ciami hna cu, Vancung rammi (Vancung Member) kan si i kan Khamtu BAWIPA JESUH KRIH Vancung in a rat lai kha nganngan ngaiin kan hngah ko (Fili. 3:20). Amen!
PA a duhnak a tuahtu ca ahcun KRIH a rat than tikah atu Vawlei cung kan nun lio i a der i a thi khomi kan pum cu a sunglawimi Amah pum bantuk ah khan a kan thlen lai i cu tuahnak ahcun zeizong vialte Amah uknak tang i a chiah hnanak tthawnnak kha a hman lai (Fili. 3:21). Hallelujah!
Cucaah atu hrimhrim ah PA a duhnak tuah cu i zuam hram hna u sih tiah dawtnak he kan sawm ko hna. Jesuh nih a ti, “ PATHIAN duhnak tuah kha nan duhnak ngan bik i a chiami cu lunglawmmi nan va si dah! PATHIAN nih nan duhnak cu a tlinter lai” a ti (Mt. 5:6). Amen! Zungzal in nun na duh ahcun PA duhnak tuah kha i tim ve cang. I hrinthan i, nun thianhlimnak ram ah a kalmi, Thiang Thlarau nih uk hruaimi si ve dingah Ca reltu vialte BAWIPA nih thluachuah za in pe ko hna seh!
Jesuh na sining tein an dawt ko, rak kir ve cang!
