Luka 5:4
‘Bia a chimdih in Simon cu a thawh I, “Ti thuhnak lei ah khin na lawng hi hei thawn deuhlaw .. nan sur khan nga kha chep hna u” tiah a ti.
Thlacamnak: ‘Ka Pa, cantha pek in kan nunnak cu na zuahrih caah ka lawm. Nihin ah na bia cu a thar in ttanhtthan ko law, ngaitu, reltu, chimtu kan dihlak caah thluachuahnak kan pekpiak ko. Thlarau bawmhnak kan sawm i, na kan bawmh ti zong ka zumh caah ka lawm. Kan Bawipa Jesuh min in thla ka cam. Amen.
Dawtmi Pathian fale hna, nan dam cio hna maw? Dallas ah mino camp kan tuahnak in nizan lawng innlei ka phan. A karlak ah thawngtha thaithawh kuat ka van tlolh deuh i rak ka ngaithiam u. Thlacamnak he rak rel ve ding le rak ei ve ding ah kan sawm hna.
Kan Pa Pathian nih hin a kan duhpiak ngaingai mi le a tuah zong a tuahpengmi cu thluachuah pek hi a si ko. Hi ruang ahhin pei Simon Peter zong cu a hei auh i, ‘a thuhnak lei ah nan lawng cu hei thawnlaw, na sur kha hei chep, a tinak zong a si cu. A thuhnak hmun hi nga tamdeuh umnak cu a si taktak ko. Tikam le tipuanhnak hi cu an um tuk lemlo cu, kan theihdih bang in. Asi nain tithuhnak lei cheh ve ding le vorh ve ding ahcun tikam rumro ah i hel khawh a si ve lo.
Ule nau Pathian fale hna, kan Pa Pathian nih hin kan siaremnak hauchung te lawng ah nan can dih ter u tiah zeitikhmanh ah a kan ti ballo. Na siaremnak ri leng tu kha lonh ve a kan ti. Kan lungthin chung ah hauleeng pinlei kap siaherhnak te kha a chiah tawn cuh. Cubantuk thil cu na ruah ballo mi, na tuah ballo mi zong an si men tawn ko lai.
Tahchunhnak ah, tutan kan mino camp ah pakhat pa cu khuahlat pi in a ra ve. Ka sin ah tehte a khanmi cu, ‘pastor pa, mahka hmun rat hi ka zuam bak lo. Ka uar phun hrim zong a si ballo. A ngamh zong ka ngamh fawn lo. An ka hnektuk i ka rat bia a si nain, atu cu zumhnak lei ah tthawnnak tampi ka hmuh caah ka lawmtuk tthan cang, tiah a ka chimh. Kha kan naupa caah cun Dallas camp rat kha a tithuhnak lei lawng thawn a si hlei ah, nga a tlaih behnak hmun a si. Amah nunnak pin ah midang nunnak a tlaihchin lengmang lai ticu fiang tein a lang ko.
Pathian fale hna, tithuhnak lei ah I thawn u, tiah a tipin ah nan sur in nga kha chep hna u, tiah a pehter rih. ‘Nan sur’ tiah sur pakhatnak tamdeuh pi a chim hi mu. Kan Pa Pathian nih hin kan herhmi leng in pek a kan duh peng ko dahkaw. Kan nun khi karhseh ti a kan duhpiak tuk cu ta.
Kan chunmang hmanh ah kan ruah khawh lo tiang in karh hna seh ti a kan duh. Chunmang nganpi in manh hna sehlaw, cunak tam in cun karhter zungzal ning tihi kan Pa Pathian duhpiaknak a si. Cucu a biakam a si. (Efesa 3:20) A biakam a tlolh ballotu kan Pathian cu a min thangthat si ko seh. Amen!
Ule nau hna, ti thuhnak deuh lawng thawn I, sur cheh ding hi pumpak ca lawng ah a kan fialmi le duhpiakmi asi lo. Chungkhar caah, buu caah, community caah, miphun ca tiang ah a kan fial zungzal mi a si.
Kan mangphanh lo tiang in thluachuah pek a kan duh. Nihin ah a kan pek cang. Kan hnulei kum thonghnih lio ah Simon Peter a rak pek cang bantuk in kan nih zong a kan pek ve cang.
Mah belte Simon Peter bia hi kan philh chih lo ding a si lai: ‘Zan khuadei kan vorh tualmal ko nain zeihmanh kan tlai lo. Sihmahselaw ti ko u, na ti ahcun sur cu kan cheh rih ko lai,’. Bawipa bia in an rak tlaihnak hmun kha zankhuadei an rak vorh ttualmal lio ah an pal pah cang lai ticu a fiang ngai. Asi nain Bawipa Jesuh nih a fial hna caah an vorh tthannak a si. An tlaih taktak tik ahcun Peter cu a khuaruah a hartuk a ti khah. An tlaih khawhnak taktak cu Jesuh Bawipa nawl bang in an tuah caah a si. (Luka 5:6–7)
Miphun hawi ule nau hna, kan Pa Pathian he na siaremnak hruang chung in na chuah taktak ahcun khuaruahhar in an hman lai i, tlaihmi tampi he na tthu hrimhrim lai ticu Bawipa biakam a si!
Sunparnak cu Bawipa nih co ko sehlaw, kan dihlak caah a thar in thluachuahnak kan pek piak ko seh. Amen.
