Ramdang a kal mi “Chin mi” nih kan nunnak ah mah tuanbia hi inunpi ding ah kan her ko rua ka ti. A tlamtling lo ngai lai nain, zeidah a duhnak a si timi kawl buin lungsau tein na rak ka rel piak dingin zaangfah ka nawl hna.
Hlan ahcun Ui (Dog) hi arak umlo. Meheh (goat) le chizawh (Cat) tuhi an rak um ti a si. Mehe cu ki ttha ngaimi a ngeih i hramhlawng te a ei tawn mi a si. Chizawh, zawte tu cu zusa lawng te a ei mi a si. Duhnung ngai le nunnem ngai phunkhin a um. Nikhat cu Meheh lakah Chizawh te cu rawl a ei ve, Meheh pakhat nih cun Chizaw pawl i an eimi kha a zoh lengmang tikah salawng te cu a si i amah a ei mi kha hramhlawng te a si caah ahngar ngai. Mah meheh nih cun viokhat cu aa ruah ciam-mam i keizawng chizawh ah kaacang lai i an ei mi sa ka ei ve lai ati i aa chuahpimi ki ttha-ngaimi cu achiah tak i chizawh pawl sinah cun aa va ifon ve an ti.A si nain can saudeuh an um tti hnu ahcun a sinak kha alang chin lengmang. Chizawh pawl bantukin thiammi angeih kho ti lo tikah aciasa ei lei tu a ttang ti a si. Cu caah chizawh pawl cu meeting an tuah I, mah saram hi kan phunding tak a si lo i kan tuah khawhmi zong a tuah kho fawn lo. Aciasa ei lawng a thiam caah mah bantuk saram cu kan miphun a thurhnawmh tu le hmual a kan pho-tertu a si an ti. Cu caah nihin thawk in amah cu inntang a si lo ah innleng ah a um lai I, kan ei hlei mi le kan duh ti lomi saruh pawl lawng kan ei ter cang lai tiin bia an chah. Mahti cun mah saram cu acal in an nam i a umnak ding timi inntang ahcun a tla. Atak afak tuk i athang piin a au ngam lo caah “um ui um ui” tiin ahrum lengmang caah amin ah Ui an sak an ti. Ui cu umnak le ngeih tilo, hawi ei hleimi le hawiduh ti lomi lawngte pek a si fawn, a saram sinak dirhmun zong ngei tilo tluk khi a si cang. A miphun hawi Meheh pawl sinah cun akir than ko nain ki angeih tilo ruangah le zusa a ei mi a si ruangah, a hawi le nihcun an nehsawhngai. Chizawh phun ka si ti ding ah le inntang ah um ter i ei bang pekmi vasi tha ding kha a duh ti fawn lo, Mah ti cun meheh zawng aa ti ngam tilo, chizawh ka si ti zong aa ti ngam tilo I, inntang le innleng ah abawk a si lo ah khua lakah ui cu nihin ni tiang avak peng ko an ti. Fa ahrin zongah meheh le chizaw phun zongin an chuak hleilo i amah ning in a si peng ko an ti.
Ma tuanbia bantuk kansi lonak hnga.
* Khuazei na phannak paoh ah na miphun sinak vazah pi hlah.
* Kan ca,kan holh, kan bia le hla vathlau hrim hlah.
* Na hawi ramdang mi hmaiah zeihmanh a si lomi na miphun hawi kha vazah pi hlah.
* Ka ngakchiat tein Chin ram ah ka umlo I, kan holh ka thiam lo ti bantuk pawl kha miphun dang pawl nih an
chawisan mi a silo.
* Mirang, minak le misen phun ka si ti duhnak thinlung na ngeih le cang kain fapa tlau tuanbia kha I theih zungzal.
Laica ttial ka thiam lo caah ka duh bangin ka tial khawh lo ruangah ka ttial palhnak kha dawtnak in na ka remh piak dingin zaangfah kan nawl. Ca reltu nan dih lak cungah Bawipa nih thluachuah in pe ko hna seh.
Bie laitha
