Minung
Minung hi zeitluk a fimmi le a thiammi hmanh si hna sehlaw, a luan cia hnulei an nunzia nih mipi zumhmi le zumh lomi ah lai a rel bik ko rua lai. Zei bantuk thilțha hmanh mipi caah chuahpi hna sehlaw, an chuahpimi thilțha chungah a luan cia hnulei an tuah sernak an nunzia kha mipi nih hmuh chih lengmang a si tawn fawn rua. Cun, an tuah sernak an nunzia kha silhnalh duh ah an țhatnak le an thil ti khawhnak kong an chim a tam deuhdeuh, mipi nih zumh lo deuhdeuh a si fawn hoi rua. Hihi Khrihfabu pakhat chung zongah a um kho. Khua pakhat zongah a um kho fawn. Miphun pakhat zongah a si kho fawn i, ram pakhat zongah a si kho fawn ko. Zeicatiah, Minung a simi paoh nih kanmah le kan tawk zawn kan sining cioah limhang timi kan ngeih dih cio caah a si. Zeihmanh a si lomi keimah bantuk te hna nih a um lomi limhang kan ngeih khawh ve ko ahcun, ram hruaitu hna limhang chinchin le miphun caah thih a ngamhmi hna limhang chinchin cu a taru tuk lai timi hi chim hau lo ti ko hna usih.
Pu Thein Sein hruaimi Kawlram cozah
Thla 6 lawng a si rihmi Pu Thein Sein hruaimi cozah nih Kawlmi caah thilțha tampi an tuah kho ko. Kawlram hmanh democracy ramah an thlen khawh taktak. Kawlram thlennak ding caah an fimnak le an thiamnak nih a tlinh fawn ko hnga. Aho tal nih an thleng kho bal lai lo tiah, kan chim kho hnga lo. Asinain, mipi thinlung chungah a fiang ngaimi te pakhat cu a um ve. Cucu, “ralkap an si konain Uniform an i hruk ti lo bia sawhsawh” timi te hi a si ko. Hihi kan Laiholh ah “Buanbok le Manta” timi biafang nih a fianter bik ko rua dah.
Thla 6 chungah thil lianngan pathum
Pu Thein Sein cozah nih thla 6 an țuan ah thil lianngan pathum an tuah ve. Pakhatnak ah, an huat bikmi le an țih bikmi Pi ASSK an ton i bia an ruah(zei bia an i ruah timi aho theih a si lo). Pahnihnak ah an saduhthah ngan bik Irrawaddy Dam project an kham i, an bochan bikmi Tuluk thinhun kha a poi ah an chia lo( a chung thil taktak aho theih a si hlei lo i, mi tampi nih an zum ve hlei lo). Pathumnak ah an duh lo bikmi le an zenh bikmi thongtla minung 6359 an chuah hna(mi minthang an i tel hlei lo i, an chuah ti lai maw ti lai lo maw aho theih a si hlei lo).
Mipi lung an la kho hlei lo
Hi thil pathum hi mipi duh bikmi le i hngahhlang bik ciomi a si ko. Si kho seh an ti cio ruangah mi tampi nunnak a liam phah len cang. Mi tampi thonginn an phan phah len cang. Pu Thein Sein cozah nih mipi duhnak zulh in thil lianngan pathum an tuah lawng a si lo. Hlutdaw chungah thil zeimawzat an thlen len ve ko. Asinain, mipi lung an la kho hlei lo. Zeicatiah, mipi thinlung chungah a fiang ngaimi te pakhat a um peng ko caah a si ko. Cucu, “Buanbok le Manta” timițhiamțhiam ah a tla lengmang.
Buanbok le Manta
Kawl nih “Tadincut Lahpih” an ti i, hi ni ah kumkhua in upa a simi hna le an upat i an țihzah mi hna kha Kawlholh in an “kadawh” tawn hna. Naite October ni 12 zongah Pi ASSK, Pu Tin Oo le Pu Win Tin hna kha thongtla hlun pawl nih an “kadawh” ve, an ti. Khuaruah har ngaingai pakhat a simi cu, Pu Thein Sein cozah chungin ralkap bawi bik Buchukci Min Aung Hlaing le Thein Sein changtu Tin Aung Myint Oo homi cheukhat nih Pu Than Shwe an va“kadawh” ve, ti a si ko. Hi thil nih kanmah te hna cuanh khawh awkin le ruahdamh khawh awkin Kawlram cozah muisam le dirhmun hi a langhter ngaingai. Kawlram nainganzi hi baisakup lei biachim in cun“Action Zatlaan”kan ti hnga. Lenhloi țialtu pawl nihcun “ Thihnak he lente celh” an ti ve hnga. Zeicatiah, thongtla tampi chuahnak nawl a pe khotu pa Pu Thein Sein lila hmanh hi nihin aho tal nih "thong a tla kho bal lai lo" tiah an chim kho hnga lo dah.
ASSK nih a uar lo ngai ve rua
Buanbok le Manta ruahnak hi kan pi ASSK nih a uar lo ngaingai ve rua. A phung a si lo, a ti rua. Nangmah maw keimah kan i ti awk a si lo, a ti fawn rua. Hnulei thil vialte kan philh dih cio hna lai i, kan ram caah thilțha kan kawl ți cio hna lai, a ti hoi rua. Hi kan pi khuaruah ning hi khuaruah har tuk ding thil dangpi cu a si lem rua lo. Ram thumnak kan timi hna mirang pawl khuaruah ning deuh a si ko rua. Mirang khuaruahning a si caah Asia mi ca belte ah ti le tlang bantuk a si kho ngaingai ve hnga. A hleice in Kawlmi ca koko ahcun sullam ngeih lo hmanh a si kho ko hnga. Cucaah kei nihcun kan pi ASSK hi ”Khrih lungput a ngeimi nu” ka ti phah. Buanbok le Manta ruahnak nih maw Kawlram pi hi a mongh deuh te lai maw, Khrih lungput cingcing nih dah a mongh deuh te lai timi hi mipi nih Wrestling zoh in kan zoh a hau rih ko rua lai. A ngaingai tiahcun, Wrestling khi "atu cu a mah nih a tei ve cang lai, atu cu a mah an phomh ve cang lai" ti bantuk in khoimaw caan ahcun ruahdamh khawh lengmang a si tawn ko hi mu!
Perhkalh
