Khua lianngan bik Rangoon ah sihni a leih kho bak vemi mifim pa pakhat, Khuarisamat ah an khua Lai khuate pakhat a tlun lio ah, varit bawh ah a meithal he aa thawh. Varit pakhat a thlak khawh naan, midang khuami hna dum-hau chunglei ah a va tla.
Sihni pa cu hau-kulhnak cung a kai cuahmah lio ahkhin ruah loin lo ngeitu tarpa nih, “Zeidah na tuah?” tiah a hro.
Sihni pa nihcun, “Varit ka kah i, mah hi dum (lo) chunglei ah a tla, ka char lai ka ti” tiah a chimh.
Tarpa nih, “Ka vawlei a si, ka hmun chungah na ra kho lo,” tiah a leh.
Sihni a thin a khenh ziar, “Keimah hi Kawlram ah sihni minthang bik pakhat ka si ve, mah varit na ka charter lo a si ahcun, taza kan cuai lai i, na inn le na lo na ngeihchiah vialte kan laakpiak dih ko lai dawkaw,” tiah a tlerh.
Tarpa nih, “Aw, kan khua ahhin cun zeitin bia kan iceih, thil kan tuah ti na hngalh rih lo caah a si hi! Thil pakhatkhat kong ah lungtlinlonak le icuhnak kan ngeih ahcun Voi Thum Ichuih veve timi phung kan ngei,” tiah a ti.
Sihni nih, “Zeidah nan Voi Thum Ichuih Phung cu a si?” tiah a hal.
Tarpa nih, “Umm, a hmasa ah voi thum kan chuih lai, cun voi thum na ka chuih ve lai. Mah ticun kan ichuih lai i a lungdong hmasa paoh an sung,” tiah a leh.
Sihni pa nih tarpa cu a zoh, “mah tar chiahru te hui hna hi maw” tiah aa ruat i, “A ttha! Nan Voi Thum Ichuih Phung cun itawng usih, nanmah le nan phunglam te cu ka zulh ve lai ta,” tiah a ti ti si.
Tarpa nih a thapthap in aa belh cangmi a kedan hlunpi cun mifim pa ngalpacar ah a duh tawk in vuikhat a hun chuih. Sihni pa cu a kualh in ikualh a duh nain a aw a chuah bak lo. Nain duhsah tein a hung tlu.
Tarpa nih mah lio ah cun, a duh chung in a hnar bakah a hun chuih tthan. Sihni pa nih ka hnar a kiak cang ko lo maw tiah aa ruah. Arfi le thlapa lawngte a hmuh lo lawng khi si ko. Sihni nih bawh colh bak a duh. A sungkhan bak a duh pah nain aa sum chih.
Tarpa nih aa lak hui i sihni pa thin zawn bakah a duh tharek in a hun chuih hui ko. Sihni pa cu a aw hmanh a chuah kho bak ti lo. Nain, a sung a khaan duh bak ve lo hih.
Sihni pa nih a hun ihrim ihrim i, “na nu ka’n ti lo tar chiava, atu keimah caan si cang” tiah a hun ti ti si.
Tarpa nih merh zimziam tein a hei zoh i,
“Si maw??? Kei cu..... a sung ka khan, na duh le na varit cu ilak ko!”
Yrs,
Ceupi
